“Lih akan me Kin Doadoahk Laud ong Kauno”
1 Pohl doadoahngki lepin lokaia pwukat pwehn kawehwe duwen Tripihna oh Triposa, sister riemen me kin doadoahk laud nan mwomwohdiso en Rom. Pohl pil koasoia duwen Persis oh mahsanih: “E kin pil wia doadoahk laud ong atail Kaun.” Pohl pil koasoia mwahu duwen Pihpe oh mahsanih me ih “sounperepen aramas tohto.” (Rom 16:2, 12, New World Translation) Iren Paipel kan kin kasalehda me Dorkas kin “ahnsou koaros wiewia mwahu oh sewese me semwehmwe kan.” (Wiewia 9:36) Ia uwen kapai ieu sister pwukat kin wia ong mwomwohdiso kan!
2 Kitail kin kalahnganki sister kan me kin doadoahk laud nan atail mwomwohdiso? Irail me kin wia pali laud en doadoahk nan kalohk, oh onop rehn aramas tohto, oh sewese pali laud en me kapw kan. Re pil kin mweidohng arail ahnsou laud en sewese seri kan en kekeirada ni pali ngehn. Kristian lih akan pil kin kakairada ngehnen limpoak, peren, popohl oh ngoang nan mwomwohdiso. Re kin utungada, ni ahl tohto, arail pwoud kan oh tohnpeneinei teikan en kalaudehla dahme re kin wia nan doadoahk en Siohwa.
3 Sister kan me kin Doadoahk ong Siohwa Kaukaule: Kisehn irail kan me kin doadoahk laud ong Kauno iei irail sister kan me wia doadoahk en misineri, tohtohn irail kin sewese kekeiradahn doadoahk en kalohk nan sahpw doh kan. Oh pil, irail sister kan me pwoudki brother kan me kin wia doadoahk en Sounapwalih en District, Sounapwalih en Circuit oh Sounapwalih teikan me kin mwemweitla rehn mwomwohdiso kan: sister pwukat kin pil doadoahk laud nan doadoahk en kalohk, oh re pil kin kangoange sister teikan. Kitail en dehr pil manokehla irail sister kan me kin doadoahk nan Bethel, pwe re kin ngoangki arail doadoahk en utungada sapwellimen Siohwa pwihn. Oh pil, kitail men kalahnganki sister kan me kin wia doadoahk en Regular Pioneer, pwehki ni arail kin nannanti wia uwen me re kak en kapinga Koht, re kin sewese aramas kid kid kei en sukuhliki padahk mehlel.
4 Sister lelepek pwukat kin diar nsenamwahu mehlel sang ni arail kin tohnmeteiki pein arail ahnsou, kehl oh soahng teikan. (1 Tim. 6:6, 8) E konehng sister pwukat en ale kaping sang meteikan oh e pahn pil mwahu ma kitail pahn kangoange oh utungada irail.
5 Lih Kristian kan kin wia doadoahk laud nan sapwellimen Siohwa pwihn me kitail kak kapinga, oh arail papah ni lelepek kin wahdohng koaros kapai kan. Kitail en kalahnganki sister pwukat oh kapakapki me Siohwa en ieiang irail oh kapaiada irail ni arail kin “doadoahk laud ong atail Kaun.”