Kitail en “Kasansalehda Dahme Kitail Uhdahn Men Koasoia”
1 Mie pak me tohnihmw kauhdi ahmw koasoiong ih, mendahki ke kaunopada mwahu ahmw padahk, oh e koasoia: “Dahme ke mwahuki? What do you want? Kasansalehda dahme ke uhdahn men koasoia!” Dahme ke sukuhliki sang met?
2 Rahnwet, aramas tohto sohte kin kanengamah. Re men ese ihs kitail oh dahme kahrehda kitail men tuhwong irail. Ni arail kin wehwehki me kitail men tuhwong aramas pwehn koasoia duwen Pwuhk Sarawi, re sohlahr men rong kitail. Rahnwet, pali moron en aramas sohte kin kesempwalki wadek Pwuhk Sarawi de koasoia duwen soahng ngenin kan. Dahme ke kak nda pwehn sewese tohnihmw kan en kak koasoi, ni minit kei, duwen oaralap ehu me pid Pwuhk Sarawi?
3 Dahme Kin Pweida: Dahme kin keieu kesempwal iei en kasalehong tohnihmwo me Pwuhk Sarawi kin kihda iren sawas tohto me kak sewese ih en kamwahuiala kahpwal kan nan mour oh kitail kasalehda soahng pwukat ni ahl me keieu mwotomwot. Soangen padahk kan me kin keieu lipwalipw kin kihda peidek me kin kahreong tohnihmw en medemedewe, iangahki iren Paipel me pahn sapengla peideko. Ke kak song padahk kan nan artikel wet. Padahk pwukat kin sewese kitail en “kasansalehda dahme kitail uhdahn men koasoia” ni ahl mwadang oh ni ahnsouwohte koasoia oaralap kan me tohnihmwo pahn perenki.
4 Nan wasahn kalohk kan me aramas kin kalapw nda me re sohte men rong, kihda peidek ehu me pein irail anahne medemedewe:
◼ “Ni atail kin kerenlahng pahr 2000, ke kin kasikasik dahme pahn wiawi de ke kin perki dahme pahn wiawi? [Mweidohng tohnihmw en sapeng.] Pwuhk Sarawi kohpada duwen soahng suwed kan me pahn wiawi nan atail ahnsou oh dahme pahn wiawi ni ahnsou kohkohdo.” Wadek 2 Timothy 3:1, 2, 5 oh Lepin Padahk 2:21, 22.
◼ “Aramas tohto nan atail wasa kin nsenohki roson en paliwar. Ke kin wehwehki me Koht inoukihong kitail me E pahn kamwahuiala soumwahu koaros?” Wadek Kaudiahl 21:3, 4.
◼ “Iaduwen koaros nan atail wasa pahn paiekihda doadoahngki Pwuhk Sarawi nan atail mour?” Wadek Madiu 22:37-39.
5 Pwe kitail pwukoahki lohkiseli duwen Rongamwahu en Wehin Koht, kitail anahne ahnsou koaros kasalehda dahme Wehio pahn wiaiong kitail. Ke kak nda:
◼ “Ke kin wehwehki me pwuhk me keieu mering nan sampah, Pwuhk Sarawi, kohpadahr me, ehu rahn, koperment ehu pahn kaunda sampah pwon?” Wadek Daniel 2:44.
◼ “Dahme ke lemeleme duwen irair en sampah ahnsou me Sises Krais pahn kaunda sampah?” Wadek Melkahka 72:7, 8.
6 Nan wasahn kalohk kan me aramas akan kin perenki rong Pwuhk Sarawi, ke kak nda:
◼ “Aramas tohto kin lipilipilki aramas pwehki irail ohl de lih, de pwehki arail pelien lamalam, de pwehki pohn kilirail. Ke lemeleme Koht kin kupwurki lipilipilki aramas?” Wadek Wiewia 10:34, 35.
◼ “Kitail wehwehki me Sises Krais wia manaman tohto ni ahnsou me E ketiket sampah. Ma ke kak idek reh ma e kak wia pil ehu manaman, dahme ke men en kamwahuiala?” Wadek Melkahka 72:12-14, 16.
7 Ma tohnihmw kahng ritingada wehnimw, ke kak nda:
◼ “Aramas tohto nan rahnwet pwangahkiher rong duwen kahpwal kan. Re men rong duwen dahme kak kamwahuiala kahpwal kan. Mwein e pil duwehte ahmw pepehm. Ahpw iawasa kitail kak diar dahme pahn uhdahn kamwahuiala atail kahpwal kan?” Mweidong tohnihmw en sapeng. Wadek 2 Timothy 3:16, 17.
8 Dahme Ke Soh Song Padahk Pwukat? Ahnsou tohto, ma kitail wia peidek ehu me mengei oh kasansalehda dahme kitail uhdahn me koasoia, e pahn kahrehong tohnihmw en men rong. Emen lih me kahng rong mahso luhke sister riemen nan ihmwe mwurin re wia peidek wet ong ih: “Ke kak kasalehda mehnia Wehi me kitail kin kapakapki nan Kapakap en Kauno?” Liho men wehwehki pasepeng en peidek wet, oh mwurin mwo, e tepida onop Paipel. Met, liho wiahla emen Sounkadehdehn Siohwa me pepidaislahr!
9 Ni ahnsou me ke kin koasoiong tohnihmwo, kasalehda uhdahn ahmw kamehlele dahme ke kin koasoia. Koasoi sang mohngiongomw. Ma ke kasalehda me ke uhdahn nsenohki irail, aramas kak mwekidki dahme ke kin koasoia.—Wiewia 2:46, 47.
10 Doadoahk en kalohk kin apwal rahnwet. Ekei tohnihmw kan kin perki aramas kan me re sehse. Ekei tohnihmw kan kin inenen kedirepw oh sohte arail ahnsou laud en wia soahng teikan. Ahpw, kitail kak kamehlele me miehte irail me perenki rong. (Madiu 10:11) Ma kitail doadoahngki soangen padahk kan me mwotomwot oh kin kasansalehda dahme kitail uhdahn men koasoia, e pahn sewese kitail en diarada irail kan me perenki rong!