Koakon En Peidek

◼ Ihs me kin pwukoahki kamwakelehda Kingdom Hall?

Ma atail Kingdom Hall kin mwakelekel oh soandi mwahu, aramas pil pahn medemedewe met ahnsou me kitail kin kalohk ong irail. (Pil tehk 1 Piter 2:​12.) E kin kesempwal Kingdom Hall en mwakelekel oh soandi mwahu ahnsou koaros, oh koaros kak wia uwen me re kak en wia kamwakelehda oh koasoanehdi mwahu Kingdom Hall ahnsou koaros. Kitail en dehr kasikasik me ekeite tohnmwomwohdiso en wia met ahnsou koaros. Nan ekei wasa kan, pwihn en Pwuhk Study en Mwomwohdiso kin kohpene oh kamwakel, oh brother me kin wia Pwuhk Study kin apwalih irail. Nan wasa kan me mwomwohdiso tohto kin doadoahngki ehute Kingdom Hall, elder kan en mwomwohdiso pwukat pahn koasoanehdi tohnmwomwohdiso koaros en sawaspene.

Iaduwen kitail koaros kak wia pwukoah wet ni ahl me keieu mwahu? E pahn mwahu ma mie ehu koasoandi en kamwakelehda Kingdom Hall wihk koaros. Dipwisou en kamwakel kan pahn mihmi nan Kingdom Hall ong ahnsoun kamwakel. E pil pahn mwahu en ntingihdi soangen doadoahk dah kan me anahn nan doaropwe ehu oh doaropwe wet pahn langada ni “Information Board” pwe koaros en kak wadek oh ese dahme re pahn wia. Mwein e pahn mwahu ma mie doaropwe riau: nan ehu doaropwe, elder kan pahn ntingihdi soangen doadoahk dah kan me anahn ong mwurin mihding; oh pil ehu doaropwe, elder kan pahn ntingihdi soangen doadoahk dah kan me anahn ong kamwekel en imwin wihk koaros. Brother kan me pahn koasoanehdi rahn en kamwakel kan anahne koasoanehdi kamwakel kan en wiawi ehu rahn me mwahu ong koaros. Pwihn en kamwakel kan anahne pil kamwakelehda likin Kingdom Hall. Siment kan likin Kingdom Hall oh wasa kan me sidohsa kin peidi anahne en mwakelekel sang kihd. Ehu ehu pahr, kamwakel laud pahn wiawi, mwein elder kan pahn koasoanehdi rahno en wiawi mwohn Kataman pahn wiawi. Soangen doadoahk tohto pahn wiawi rahno, iangahki kamwakelehda wenihmwtok kan oh kahdeng kan, oh pil kamwakelehda dihd kan, oh pil kamwakelehda carpet.

Ahpw, ni mehlel, kitail koaros kak sawaspene pwe Kingdom Hall en mwakelekel ahnsou koaros ma kitail sohte pahn kihdseli mwahl nan Kingdom Hall de likin Kingdom Hall. Oh pil, kitail en dehr kesehla pwilis nan Kingdom Hall de likin Kingdom Hall. Ahnsou me kitail doadoahngki imwin kainen, kitail kak kamwakelehda mwohn kitail kohsang imwen kainen, pwehn mwakelekel ong meteikan. Kitail en kanahieng pwehn dehr kauwehla dipwisou kan me mihmi nan Kingdom Hall. Ma mie mehkot ohla nan Kingdom Hall, ken mwadang kehsehkin brother kan me kin apwalih soandi mwahu en Kingdom Hall pwe re kak kamwahuwiala.

Kitail koaros en wia uwen me kitail kak pwe Kingdom Hall en mwakelekel oh soandi mwahu ahnsou koaros. Ma kitail wia met, Kingdom Hall pahn wia ehu wasa me pahn kansenamwahu en kohla oh e pahn kasalehda me sapwellimen Koht aramas kan kin mwakelekel oh soandi mwahu oh kitail kin kawahuih Siohwa Koht ni ahl wet.​—1 Piter 1:​16.