Kitail Anahne Kamwakel oh Onehda Sapahl Atail Wasahn Kaudok Ahnsou Koaros
1. Ia kahrepen Kingdom Hall?
1 Mie mwomwohdiso en Sounkadehdehn Siohwa kan daulih 94,000 nan sampah pwon. Pali laud en mwomwohdiso pwukat kin tuhpene ong onop Paipel oh miniminiong riarail Kristian teikan nan ihmw sarawi me adaneki “Kingdom Hall” oh wasao kin wia arail wasahn kaudok.
2. Dahme kahrehda e kesempwal Kingdom Hall en mwakelekel oh mwahu ong aramas ni ahnsou me irail pahn kilang?
2 Koasoandi en Kamwakel Ahnsou Koaros Mie: Doadoahk en kamwakele oh onehda sapahl imwen Kingdom Hall de dipwisou kan me mihmi loale kin wia doadoahk kesempwal ong atail papah Siohwa. Pwuhken Our Ministry ni pali 61-62 koasoia: “Brother oh sister kan en kilangwong doadoahk wet nin duwen pwais kaselel oh doadoahk wet kin wehwehki kaidehn ihte utungada doadoahk en kalohk ni sawas en mwohni ahpw pil irail en tohnmeteiki arail ahnsou ong kamwakele Kingdom Hall iangahki kamwahuwihala wasa kan me ohla oh pil dipwisou kan me ohla oh pil onehda sapahl. Ni mehlel, Kingdom Hall—loale oh pil liki—pahn kasalehda mwahu duwen sapwellimen Siohwa pwihn.” Mie anahn en koasoanehdi kamwakel oh onehda sapahl kaukaule pwehki kitail kin doadoahngki Kingdom Hall pak tohto nan wihk koaros. Ihme kahrehda, irail mwomwohdiso kan me kin doadoahngki Kingdom Hall anahne apwalih Kingdom Hall oh koasoanehdi doadoahk pwukat en wiawi. Duwehte ni mwehin Paipel, sapwellimen Siohwa ladu kan rahnwet anahne wia uwen arail kak en “onehda sapahl” atail wasahn kaudok kan.—2 Kronikel 34:10.
3. Iaduwen elder kan pahn kak koasoanehdi Kingdom Hall en kamwakelda, oh ihs me kak iang kisehn koasoandi wet?
3 Koasoandi en kamwakele Kingdom Hall wihk koaros pahn langalang ni “Information Board.” E pahn mwahu ma koaros nan Pwuhk Study pahn mie arail ahnsou en kamwakele Kingdom Hall nan wihk kan, oh irail pahn anahne wia soahng koaros me kileledi ong irail en wia. E pahn konehng ma koaros me kak kamwakel en iang koasoandi en kamwakele Kingdom Hall wihk koaros pwe Kingdom Hall en mwakelekel oh doadoahk mwahu ahnsou koaros. Seri kan pil kak iang kamwakele Kingdom Hall, ma pahpa oh nohno pahn apwalih mwahu irail, oh met pahn sewese seri kan en kalahnganki oh kesempwaliki doadoahk kesempwal wet. Ma mwomwohdiso tohto sang ehu kin doadoahngki Kingdom Hall, e kin kesempwal ma eden tohnmwomwohdiso koaros pahn mihmi ni koasoandio oh met pahn wehwehki me tohnmwomwohdiso koaros pahn iang kamwakel, kaidehn ekeite me pahn kamwakele Kingdom Hall ahnsou koaros.
4. Dahme pahn wiawi pwe tohnmwomwohdiso en ese dahme irail pahn wia ahnsou me irail kamwakele Kingdom Hall?
4 E pahn mwahu ma pahn mie doaropwe ehu me pahn kasalehda duwen doadoahk kan me tohnmwomwohdiso anahne wia, oh doaropweo pahn mihmi wasao me dipwisou en kamwakel kin mihmi ie. Doaropwe wet pahn kasalehda duwen doadoahk me pahn anahne wiawi nan wihk koaros, me iei koakoahk, mop, kamwakele louver kan, wasahn pwuhk oh makisihn, imwen kainen oh kilahs, oh kesehla kihd. Ekei doadoahk sohte anahne wiawi wihk koaros, duwehte kamwakele (polish) tehpel me wiawihda sang tuhke oh pil kamwakele mwahu sehr kan, kahdeng kan oh dengki kan. E pahn mwahu ma kemikal kan me tohnmwomwohdiso kan kin doadoahngki ong kamwakel sohte pahn mihmi wasa ieu me seri kan kak doahke oh re anahne ntingihdi eden kemikal kan likin mehn doudou me kemikal mihmi loale. E pil pahn mwahu ma emen pahn pil ntingihdi doadoahk dah me kemikalo pahn wia.
5. Ia uwen kesempwal en tehk duwen soahng kan me kak keper ong tohnmwomwohdiso, oh soahng dah kan petehkpe en wiawi ekei pak? (Kilang koakon ni pali 4.)
5 E inenen kesempwal soahng koaros nan Kingdom Hall oh likin Kingdom Hall sohte pahn keper. (Deud. 22:8) Pwehn tehk duwen met, koakon ni pali 4 kin kasalehda dahme kitail kak tehk pwe aksident kan en dehpa wiawi.
6. Iaduwen irail pahn koasoanehdi doadoahk me pid onehda sapahl Kingdom Hall?
6 Onehda Sapahl Kingdom Hall: Pwihn en elder kan kin ahneki pwukoah en apwalih onohn sapahl en Kingdom Hall. Pali laud en ahnsou, pwihn en elder kin pilada emen elder de emen ministerial servant en koasoanehdi doadoahk wet. E kin koasoanehdi ihs me kin tehk Kingdom Hall ehuehu rahn, oh met wehwehki tehk ma e mwakelekel oh soahng koaros soandi oh mwahu (ma anahne kamwahwihala mehkot) oh pil tehk ma itar dipwisou me anahn. E kin kesempwal en tehk me sohte irair keper wiawi nan Kingdom Hall oh pil likin Kingdom Hall. Ni ahnsou me mwomwohdiso riau de tohto sang kin doadoahngki Kingdom Hall ehute, pwihn en elder kan anahne pilada pwihn en brother kan (an operating committee) pwehn koasoanehdi koasoandi kan ong apwalih imwen Kingdom Hall oh liki. Pwihn wet pahn mihmi pahn kaweid en pwihn en elder kan.
7. (a) Dahme anahne wiawi nan pahr koaros pwehn tehk me Kingdom Hall wie mwamwahute? (b) Soahng dah kan me anahne petehkpe en wiawi ekei pak? (Kilang koakon ni pali 4.)
7 Ehuehu pahr, anahne wia petehk keneinei ong Kingdom Hall. Pwihn en elder kan kin pwukoahki koasoanehdi koasoandi kan en tehk soahng koaros pwehn kak kilang ma mie anahn akan. Irail kak idek rehn sounkalohk kan en sewese irail ong soahng kan me irail anahne kamwahuwihala oh onehda sapahl. Tohnmwomwohdiso koaros kak tehk kanahieng duwen kahpwal kan me kin pwarada oh pil anahn akan oh iaduwen irail pahn kak sawas pwehn kamwahuwihala soahng pwukat.
8. Ahnsou dah e pahn mwahu elder kan en peki sawas sang Guam Branch Building Committee me pid duwen onehda sapahl?
8 Ma elder kan lemeleme me irail anahne sawas en kamwahuwihala mehkot nan Kingdom Hall de mehkot me pid onehda sapahl Kingdom Hall, irail kak peki rehn Guam Branch Building Committee. Met kin kak pidada soahng kan duwehte apwalih carpet, air conditions oh pil soahng teikan.
9. Dahme elder kan anahne wia ma irail anahne sawas en soun wie ihmw men?
9 Doadoahngki Mwohni en Mwomwohdiso Ni Erpit: Pali laud en ahnsou, irail tohnmwomwohdiso me kin tohnmeteiki arail ahnsou oh kehl kin wia doadoahk nan Kingdom Hall oh liki. Arail ngenin tohnmetei kin kasalehda arail limpoak oh pil sewese katikala dahme mwomwohdiso anahne pwain. Ma anahn pwarada me mwomwohdiso anahne pwain aramas (duwehte emen contractor de soun wia ihmw) pwehn wia doadoahk ehu, me duwehte kemehla loangen mwet me kin kauwehla ihmw kan (pest control), elder kan kak tehk rehn ekei company kan oh tehk duwen pwainen arail wia doadoahk wet oh tehk ihs me keieu pweitikitik rehrail. Irail kak mahs kaunopada doaropwe ehu me irail pahn ntingihdi doadoahk dah me companyo anahne wia oh dipwisou dah kan me irail anahne doadoahngki oh dipwisou kan me mwomwohdiso pahn kihda. Ehu copy en doaropwe wet pahn kohwong company koaros me pahn kasalehda pwain en doadoahk wet, pwe irail koaros pahn wehwehki duwen doadoahk dah me irail anahne wia. Mwurin elder kan pahn ale bid kan (written bids) me company ko ntingihdi dahme irail pahn wia oh pwainen arail doadoahk, elder kan kak pilada mehnia company me pahn keieu mwahu en wia doadoahk wet. Elder kan pil kak doadoahngki koasoandiohte ma emen brother nda me e pahn wia doadoahk ehu de kihda dipwisou kan me anahn oh pwainen dipwisou pwukat.
10. Dahme anahne wiawi pwehn kak kasohtik mwohni en mwomwohdiso?
10 Elder kan anahne wia dahme irail anahne wia pwehn ale “property-tax exemption” oh pil “sales-tax exemption,” ma kak. Ni ahnsou me mwomwohdiso tohto sang ehu kin doadoahngki ehute Kingdom Hall, pwihn en “Operating Committee” pahn wiahda “checking account” me pahn weksang “checking account” teikan oh pahn wiahda doaropwe kan me pahn kasalehda duwen met oh kihong pwihn en elder kan koaros, pwe irail koaros pahn wehwehki duwen dahme wiawi ong mwohni kan me mihmi loale. Elder kan pahn pwukoahki arail doadoahngki pwung mwohni en mwomwohdiso.
11. Dahme anahne wiawi ma onohn sapahl laud ehu de anahne kamwahuwihala mehkot me laud?
11 Onohn Sapahl me Laud kan: Ni ahnsou me pwihn en “Operating Committee” pahn pehm me mehkot laud anahne wiawi me pid duwen anahn en Kingdom Hall, pwihno pahn uhd tuhwong pwihn en elder kan koaros ong dahme irail pahn wia. Ma irail pwungkihpene me onohnda sapahl laud anahne wiawi de irail anahne peki sawas sang mwomwohdiso teikan likin mwomwohdiso kan me kin doadoahngki Kingdom Hall, elder kan anahne peki rehn Guam Branch Building Committee pwehn ale kaweid ong dahme irail pahn wia. Irail brother pwukat kin koahiek oh irail kak kihda soangen kaweid oh sawas me kesempwal me pid duwen doadoahk me pahn wiawio. Ma doadoahko pahn doadoahngki mwohni laud, e pahn kesempwal en idek rehn ekei company kan duwen pwainen doadoahko, oh mwurin mwo, brother kan anahne peki rehn mwomwohdiso (“resolution”) duwen dahme irail men wia.—Menlau tehk Atail Doadoahk Ong Wehio en February 1994, Kohpwahn Peidek.
12. Iaduwen kitail kak kasalehda atail kalahnganki oh kesempwaliki atail pwais en iang towehda mihding kan en Kingdom Hall?
12 Kitail kin inenen kesempwaliki atail pwais kaselel en tuhpene nan Kingdom Hall! Kitail sohte men mwamwahleki koasoandi wet—mihding kan—oh lemeleme me irail sohte katepe de sohte nohn kesempwal. Kitail koaros kak sawaspene pwe mihding kan koaros en kak pweida ni atail pahn apwalih mwahu atail Kingdom Hall. Met kin kawauwih kaudok mehlel oh pil kawauwih mwaren Siohwa. Kitail en wia uwen atail kak en kamwahuwihala atail wasahn kaudok oh pil onehda sapahl ma anahne.
[Box on Page 4]
Apwalih Mwahu Ihmwo oh Sahpwo
◻ Likin Kingdom Hall: Tehk ma oahs mete, litepw, louver kan, oh kilel me ntingihdi “Kingdom Hall of Jehovah’s Witnesses”—soahng pwukat koaros mwamwahute?
◻ Liki: Likin Kingdom Hall kin ale epwel mwahu? Wasahn alu kan oh wasahn peidi en sidohsa kan mwamwahute?
◻ Loale: Iaduwen—kahdeng kan, sehr kan, dengki kan, paip en pihl kan, litepw oh pil deuen pwuhk kan wie mwamwahute?
◻ Dipwisou kan: Dengki kan oh sound system kin doadoahk mwahu?
◻ Imwen Kainen: E mwakelekel oh doadoahk mwahu?
◻ Doaropwe kan en mwomwohdiso: Anahne kapedolong nein mwomwohdiso doaropwe kan me pid duwen corporation de trusteeship pwe en kak pwung ong pahr wet?
[Kaokon nan Pali 4]
Dahme Kitail Anahne Tehk Me Pid Safety
◻ Fire extinguisher kan anahne mihmi wasa ehu me tohnmwomwohdiso kak ale oh emen anahne tehk ma re doadoahk mwahu.
◻ Wasa kan me aramas kin pedoi sang Kingdom Hall anahne sansal, itar marain ni pwong kan, oh mengei ong koaros en pedoi.
◻ Pere kan en nekidala dipwisou kan oh pil imwen kainen kan anahne en mwakelekel, soandi oh sohte pahn mie soangen dipwisou kan de wini kan me kak lulda, dipwisou en tohnmwomwohdiso kan oh pil kihd sohte pahn mihmi nan wasa pwukat.
◻ Anahne tehk oh kamwakelehda oahs mete oh gutter kan ahnsou koaros.
◻ Wasahn alu kan oh wasahn peidi en sidohsa kan anahne en itar marain oh pil sohte pahn mie soahng keper kan me aramas kak kirisdi de pwupwudi.
◻ Anahne kaukaule tehk sahl en liohl kan.
◻ Anahne kamwahuwihala wasa kan me mpwi pwe ma soh, kahpwal kan pahn kak pwarada.
◻ Anahne loahkehdi Kingdom Hall ma sohte aramas mihmiseli loale de liki.