Kitail en Kasawihada Mahsen en Siohwa Rahn Koaros!
1 Rahn koaros, kasongosong kan kin lelohng kitail me kak kaluwetala atail pwoson. Mwein emen me ke ese kin kalapw idek rehmw en iang ih pwe e mwahukin uhk. De ahmw sounpadahk mwein ele kin koasoiong uhk duwen ahmw doadoahk en ehu rahn oh kesempwalpen “career” de mwein ahmw kaun en doadoahk mwahuki ken doadoahk pwand. De mwein ahmw roson en paliwar wie kohkohdi. Mendahki ke kin lelohng kasongosong pwukat ahnsou wet, ken tamataman me kaidehn komwihte me kin lelohng kasongosong pwukat. Siohwa men sewese komwi en ahneki erpit pwehn powehdi kasongosong pwukat. Ma kitail pahn wadek Iren Rahn (Examining the Scriptures) rahn koaros, e pahn wie ehu ahl me ke kak wadek Sapwellimen Siohwa Mahsen kaukaule. Ke kin wia met?
2 Sawas Kak Kohwong Komwi: Aiseia 30:20 (New World Translation) kin kawehwehda me Siohwa kin wia “Sounpadahk Lapalap” oh sapwellime aramas akan kak kilangwong ih pwehn ale sawas. E kin kihong kitail dahme kitail kin anahne pwehn powehdi kasongosong kan me kakete kaluwetala atail pwoson. Iaduwen? Aiseia 30:21 kin kawehwehda: “Ma kumwail pahn salongasang nan ahlo oh kolahng ni palimeing de maun, kumwail pahn rong kapitie sang mwurimwail me mahsanih: ‘Iet ahlo. Kumwail idawehn.’ ” Rahnwet, Siohwa kin “mahsen” ong kitail ni e pahn doadoahngki Pwuhk Sarawi oh pwuhk kan me ‘ladu lelepek oh loalokong’ kin wiahda. (Madiu 24:45) Nan artikel kan en Watchtower en pahr teikan, mie soangsoangen sawas me mihmi loale me kin pid duwen mour en Kristian. Ma ke kousapahlih artikel kan me kileledi nan Iren Rahn (Examining the Scriptures), artikel pwukat pahn kak sewese kitail en sukuhliki kaweid tohto me kak sewese kitail en powehdi soangsoangen kasongosong kan.—Aiseia 48:17.
3 Koasoanehdi Ahnsou Pwehn Wadek Iren Rahn: Mendahki ni menseng kan kin wie ahnsou karuwaru ehu, emen nohno kin koasoanehdi ahnsou ehu ehu rahn pwehn wadek oh koasoia iren rahn ong nah pwutak ahnsou me e kin mwenge. E kin tamataman kaweid sang iren rahn oh iangahki kapakap pwe ih me kin mihmi nan ah madamadau ahnsou me e kin mweselahng sukuhl. Kaweid wet oh iangahki kapakap kin sewese ih en dehr lohdi pahn kasongosong en nenek oh pil kasongosong en uhki wehi oh pil soahng pwukat kin sewese ih en kalohk ong ah sounpadahk kan oh ienge tohnsukuhl akan ni eimah. Mendahki ih kelepw me iang Sounkadehde nan sukuhlo, ahpw e sohte kin kelepw.
4 Ken kilangwong Siohwa oh sapwellime Mahsen pwehn ale kaweid. Ma ke pahn wia met, ke pahn uhdahn kamehlele me Siohwa karanih komwi oh e kin wia emen me ke kak likih. Sohpeiong ih rahn koaros! Ke pahn wia duwehte aramas rar rar teikan nan sampah pwon me kin mweidong sapwellimen Koht Mahsen en kaweidkin irail, oh ke pahn kilangwong “Ahmw Sounpadahk Lapalap” en kaweidkin komwi.