Ke Kaunopadahr ong Sukuhl?
1. Ahnsou mwahu dah kan me ke pahn ahneki nan sukuhl?
1 Sohte lipilipil ma ke pahn ahpwtehn iang ehu sukuhl de pwurala sukuhl, kumwail me pwulopwul kan pahn lelohng kahpwal kan oh kapwunod kan me kapw ong kumwail. Ahpw, kumwail pil pahn ahneki ahnsou mwahu en “kadehdehda duwen me mehlel.” (Sohn 18:37) Eri, ke onopadahr en wia met?
2. Ia duwen omw kak kaunopada ong sukuhl?
2 Ke alehdier soangen kasukuhl kan sang rehn Siohwa, omw pahpa oh nohno, oh pil sang ladu lelepek oh loalokong me kak sewese iuk en pweida ni mehkoaros me ke kin wia nan omw mour. (Lep. Pad. 1:8; 6:20; 23:23-25; Ep. 6:1-4; 2 Tim. 3:16, 17) Eri, ke uhdahn eseier mehnia kahpwal kan me ke pahn lelohng nan sukuhl. Ni omw eseier dahme Koht kupwurki oh dahme ke pahn lelohng, eri kaunopada pwe ken kak wia kadehde mwahu. (Lep. Pad. 22:3) Medemedewe mwahu kaweid kan oh sawas kan me poahsoankihda Paipel me mi nan pwuhk riau kan en Young People Ask (Me Pwulopwul kan Kin Idek) oh pil ire kan me duwehte met nan Awake!
3. Ni ahl dah kei ke pahn kak kalohk nan sukuhl?
3 Omw wasahn kalohk nan sukuhl pahn kihong uhk ahnsou en kalohk ni ahl tohto. Ni ahnsou me meteikan kin tehk mwomwen omw kin likou oh kapwat, omw wiewia kan oh lokaia, omw kin wauneki iengomw tohnsukuhl kan oh sounpadahk kan, omw pweida mwahu nan sukuhl, oh pil arail kin kilang me mie mehkot me kin kamwakid omw mour, ele ekei pahn idek, “Dahme kahrehda ke kin weksang meteikan?” (Mal. 3:18; Sohn 15:19; 1 Tim. 2:9, 10) Met pahn kihong uhk ahnsou mwahu en kawehwehda dahme ke kin kamehlele. Nan pahr en sukuhlo, ke pahn lelohng kahpwal kan me duwehte tiahk en uhki wehi oh kasarawi kan. Ma emen pahn idek kahrepen omw sohte kin iang wia soahng pwukat, ia duwe, ke pahn ndahte, “Ngehi Sounkadehdehn Siohwa men, e uhwong ei pelien lamalam,” de ke pahn isanekihla ahnsou mwahu en kadehdehda me mehlel duwen Semomw me limpoak, Siohwa? Omw kin kaunopada mwahu sang ni omw kin doadoahngki sapwellimen Siohwa kaweid kan pahn kahrehiong uhk en kak kalohk ong sounpadahk kan, iengomw tohnsukuhl kan, oh meteikan.—1 Pit. 3:15.
4. Dahme kahrehda ke kin kamehlele me ke kak pweida nan sukuhl?
4 Ele ke pahn ekis pweiek en kohla sukuhl. Ahpw tamataman me mie me tohto me men sewese iuk en pweida nan sukuhl. Patehng met, se kin perenki pwe ke pahn ahneki ahnsou mwahu en kalohk nan omw wasahn kalohk nan sukuhl. Eri, ken eimah oh kaunopada ong sukuhl!