Noumw Seri kan Onopadahr?
1. Dahme kahrehda serihn sukuhl kan anahne onopada?
1 Kereniong ehu pahr en sukuhl pahn tepida. Noumw seri kan pahn lelohng kahpwal oh kasongosong kapw kan. Irail pil pahn ahneki ahnsou mwahu en “kadehdehda duwen me mehlel.” (Sohn 18:37) Irail onopadahr?
2. Pwe ren onopada mwahu, dahme noumw seri kan anahne ese?
2 Ia duwe, noumw seri kan uhdahn wehwehki ia duwen arail kakete iang kasarawih en wehi oh kasarawih teikan me kohsang kaudok likamw, oh dahme kahrehda e sapwung ren iang pidada? Irail onopadahr ong kasongosong en iang sukuhl laud, iang emen pwutak de serepein (date), oh kang sakau de doadoahngki mehn kasahliel kan? Re pahn ndahte me soangen wiewia pwukat kin uhwong arail pelien lamalam, de irail ese ia duwen arail kak kawehwehda dahme re kamehlele?—1 Pit. 3:15.
3. Ia duwen pahpa oh nohno kan arail kak doadoahngki arail Kaudok en Peneinei ni soutik pwehn kaunopada neirail seri kan?
3 Doadoahngki Kaudok en Peneinei ni Soutik: Ele kumwail pahn koasoiapene erein pahr en sukuhlo duwen kahpwal kapw kan me noumwail seri kan pahn lelohng. Ahpw amwail kin nantihong en koasoiapene kahpwal kan me re pahn lelohng mwohn sukuhl pahn tepida pahn sewese irail ren powehdi kahpwal pwukat. Dahme kumwail sou doadoahngki ehu de riau soutik en amwail Kaudok en Peneinei pwehn wia met? Ke kak idek rehn noumw seri kan dahme kin keieu kapwunode irail ni arail kin medewe arail pahn pwurala sukuhl. Kumwail kak pwurehng koasoiapene soahng kan me kumwail koasoiapenehr mahs pwehki re laudlahr oh re kak wehwehki laudsang mahs. (Mel. 119:95) Ke kak mwomwehda wia emen sounpadahk, sounkaweid en sukuhl, de emen iengerail tohnsukuhl. Padahkihong noumw seri kan ia duwen arail pahn doadoahngki Paipel pwehn sapeng peidek kan. Emen nohno doadoahngki wiepe wet pwe en kaunopada nah seri kan ren padahkihong arail sounpadahk kan ni tepin ehuehu pahr en sukuhl me irail Sounkadehdehn Siohwa kei.
4. Dahme pahpa oh nohno kan anahne wia?
4 Kahpwal kan me Kristian pwulopwul kan kin lelohng erein imwin rahn akan kin wie lalaudla. (2 Tim. 3:1) E mwahu pahpa oh nohno kan ren medewe mwahu kahpwal kan mwohn neirail seri kan pahn lelohng oh sewese irail en powehdi kahpwal pwukat. (Lep. Pad. 22:3) Mwohn seri kan pahn pwurala sukuhl, wia uwen omw kak koaros pwehn sewese noumw seri kan ren kaunopada.