Dehr Pweiek en Kalohk
1. Dahme ke anahne eimahki? Pwekida?
1 Mie pak me ke kin pweiek en kalohk ni omw wasahn sukuhl pwehki ke masak irail de kauwe iuk? Ke anahne ahneki eimah pwe ken kak padahk, ahpw mehlel ma ke kin namenek. Dahme pahn seweseiuk?
2. Ia duwen atail pahn doadoahngki ahnsou me konehng ni ahnsou me kitail kalohk nan sukuhl?
2 Doadoahngki Ahnsou me Konehng: Mendahki omw wasahn sukuhl kak wia pein omw wasahn kalohk, tamataman me ke sohte anahne tapiada koasoia Paipel ong koaros duwehte omw kin kalohk ihmw lel ihmw. Doadoahngki ahnsou me konehng pwehn koasoanehdi iahd me ke pahn koasoi. (Ekl. 3:1, 7, NW) Mwein dahme kumwail pahn koasoiapene nan sukuhl de pil mie assignment ehu me pahn kihda ahnsou mwahu ken kasalehda dahme ke kin kamehlele. De emen iengomw tohnsukuhl pahn idek rehmw dahme kahrehda ke sohte kin iang irail nan ekei wiewia kan. Ni sukuhl eh pahn tepida, ekei Kristian kan kin padahkihong sounpadahk kan me irail Sounkadehdehn Siohwa kei oh kin kihong irail pwuhk kan me kin kawehwehda dahme kitail kin kamehlele. Ekei kin kihdi sawaspen Paipel kan pohn arail tehpel pwe iengerail tohnsukuhl kan pahn idek peidek.
3. Ia duwen omw kak kaunopada mwahu pwe ken kalohk nan wasahn sukuhl?
3 Kaunopada Mwahu: Ma ke kaunopada mwahu, ke sohte pahn masepwehk. (1 Pit. 3:15) Eri song medewe duwen peidek kan me kakete pwarada oh medewe ia duwen omw pahn kak sapeng. (Lep. Pad. 15:28) Ma kak, kihdi noumw Paipel oh ekei sawaspen Paipel kan wasa ehu me ke kak ale ni ahnsou me ke anahne. Peki rehn omw pahpa nohno ma kumwail kak wia kamwomwada kan nan amwail kaudok en peneinei.
4. Dahme kahrehda ken kalokalohkte ni omw wasahn sukuhl?
4 Ahneki Madamadau Pwung: Dehr medewe me iengomw tohnsukuhl kan pahn kauwe iuk ahnsou koaros me ke pahn koasoia duwen padahk mehlel. Ekei pahn kakete kapinga iuk pwehki omw eimah oh re mwein pahn rong uhk. Dehr nsensuwedkihla ma sohte me men mwekidki. Siohwa pahn kupwurperenki omw kin song wia met. (Ipru 13:15, 16) Pekipeki reh sawas pwe ken kak ‘koasoia sapwellime mahsen ni eimah.’ (Wiewia 4:29; 2 Tim. 1:7, 8) Medewehla uwen omw pahn peren ma emen pahn rong uhk. E pahn kakete wiahla emen sapwellimen Siohwa ladu ehu rahn.