Me Pwulopwul kan—Isaneki Amwail Sukuhl
1 Ia amwail pepehm en pwurala sukuhl mwurin ahnsoun kommoal en sukuhl? Kumwail kin kasikasik en paiekihda ehu sounpahr en sukuhl? Kumwail pahn isaneki ahnsou mwahu kan en sukuhl pwe kumwail en ehukihong iengemwail tohnsukuhl kan oh sounpadahk kan padahk mehlel? Kitail koapworopworki me kumwail pahn wia uwen me kumwail kak koaros nan sukuhl.
2 Wia Emen Tohnsukuhl Mwahu: Ma ke kin kaunopada mwahu ni ahnsou me ke kin towehda ahmw klahs oh kin rong kanaieng, ke pahn paiekihda laud met. Pwerisekiong wiahda ahmw pwukoahn sukuhl en kedirepwehla ahmw wiewia kan me pidada Wehio.—Pilipai 1:10.
3 Tepkihda pahr en sukuhl kapw ni ahmw pahn wadek brochure me oaralap koasoia Jehovah’s Witnesses and Education. Eri, kowe oh ahmw pahpa oh nohno pahn kihong emen emen ahmw sounpadahk kan ehu brochure. Kehsehkin irail me arail peidek soh lipilipil kan pahn pasepengla. Met pahn sewese irail en wehwehkihla mwahu kosonned kan me ke kin mourki oh pil padahk kan me ke kin kamehlele oh miniminiong uhk ni ahmw kapwaiada dahme ke sukuhlikier. E pahn pil kehsehki ahmw sounpadahk me kowe oh ahmw pahpa oh nohno men miniminiong irail ni arail sewese uhk en alehda ehu kasukuhl kesempwal.
4 Wia Emen Sounkadehde Mwahu: Dahme ke soh kin kilangwohng wasahn sukuhl me iei pein ahmw wasahn kalohk en ahnsou soh lipilipil? Erein pahr en sukuhl me kohkohdo, ke pahn ahneki ahnsou mwahu kan en kalohk. Ke ahneki loalokong en pali ngehn kaselel me, ni ahnsou me ke ehukihong mehteikan, kak “doarehla pein kowe oh irail ko me rong uhk.” (1 Tim. 4:16) Ni ahmw kolokol tiahk mwahu en Kristian oh kin kalohk ni ahnsou soh lipilipil kan me konehng, kowe oh mehteikan pahn paiekihda.
5 Emen brother pwulopwul kalohk ni ahnsou soh lipilipil ong ienge tohnsukuhl kan nan ah sukuhlo. Nanpwungen irail ko me mwekidki ah padahk iei emen Kadolik, emen me sohte kin kamehlele Koht me mahso kin kapailoke irail kan me kin kamehlele Koht, oh pil iangahki emen me pwulopwul me kin mour en simok oh kin pil kamamsakau. Brother pwulopwul menet sewese ienge meh 15 en inoukihda arail mour oh papidaisla.
6 Ihme, kumwail pwulopwul kan, kumwail en ale kasukuhl oh kalohk nan amwail wasahn kalohk tohrohr. Eri, kumwail pahn paiekihda kapai me keieu laud sang amwail iang sukuhl.