“Re Pahn Kasawihada Mahs Ma E Kak”​—Iaduwen?

¹ Pwehki kekeirada laud me kin wiawi nan sapwellimen Siohwa pwihn, ihme kahrehda, anahn laud kin mie ong brother kan me kak doadoahk nin duwen ministerial servant kan. Pali laud en brother kan me sohte ahneki pwukoa nan mwomwohdiso, iangahki mwahnakapw kan, kin ahneki ineng en men ahneki pwukoa nan mwomwohdiso pwehn sewese tohnmwomwohdiso. Ahnsou me elder kan kin kihong irail pwukoa me re pahn wia, re kin perenki pwehki re pehm me mie kateparail oh re kin nsenamwahuki doadoahk en papah nan mwomwohdiso. Arail kekeirada oh ale pwukoa kan laud sang mehpwukat kin poahsoankihda ahnsou me elder kan kin “kasawihada mahs ma re kak.” (1 Tim. 3:10) Iaduwen met kin wiawi?

² Dahme Elder Kan Kin Wia: Pwehn kasawihada ma brother men pahn kak wia doadoahk en ministerial servant nin duwen dahme Pwuhk Sarawi kasalehda nan 1 Timoty 3:8-13, elder kan kin kasawihada mahs ma brothero kak uhdahn wia pwukoa kan me kin kohwong ih. Re pahn kihong ih pwukoa kan duwehte kihseli makisihn kapw kan oh pwuhk kan ong tohnmwomwohdiso, wahseli microphone kan, kamwakelehda Kingdom Hall oh kamwahuwihala soahng kan me ohla, oh soangen doadoahk kan duwehte mehpwukat. Elder kan pahn tehk ma brothero kin perenki wia pwukoa pwukat oh ma e kin wiahda mwahu eh pwukoa kan. Re pahn tehk ma e kin ahnsou koaros wia eh pwukoa, ma e kin wia eh pwukoa ni kuloak me konehng, ma e kin wia uwen me e kak en wia doadoahk mwahu, ma e kin aktikitik ni eh kin wia eh pwukoa oh ma e kin kak miniminiong brother oh sister teikan ahnsou me e kin wia eh pwukoa. (Pilipai 2:20) Re pil pahn tehk ma e kin likou oh kapwat mwahu oh konehng Kristian? E kin tamataman eh pwukoa ahnsou koaros? Re pil pahn tehk ma e kin “kasalehda sang ni eh mour mwahu oh sang ni eh wiewia mwahu kan me kin wia ni mpahi oh erpit.” (Seims 3:13) E kin wia uwen me e kak en papah nan mwomwohdiso oh sewese tohnmwomwohdiso? E kin nantihong kapwaiada dahme Sises kehkehlikiong kitail en “padahkiong tohn wehi kan koaros pwe re en wiahla nei tohnpadahk” ni e kin ngoangki kalohk?​—Madiu 28:19; tehk Watchtower (lokaiahn wai) en September 1, 1990, pali 18-28.

³ Pwuhk Sarawi sohte kin nda sounpahr depe emen brother kak de sohte kak wia ministerial servant, ahpw e kin koasoia duwen irail nin duwen “ohl akan me kin papah.” Kitail sohte pahn lemeleme me irail pahn wia mwahnakapw akan nanpwungen sounpahr 13 lel 16, keieu kahrepe met sohte pahn wiawi pwehki Pwuhk Sarawi kin koasoia me e kakehr pwopwoud oh naineki seri ahnsou me e kin wia ministerial servant. (1 Tim. 3:12, 13) Brother kan me pahn wia ministerial servant kan pil sohte pahn lohdi ong “ineng en mwahnakapw akan” ahpw re pahn mehlel ong arail doadoahk oh pahn tiahk mwahu oh kasalehda me re ahneki nsen mwakelekel mwohn silangin Koht oh mwohn aramas akan.​—2 Tim. 2:22.

⁴ Mendahki kitail wehwehki me koahiek en wia doadoahk kin mwahu, dahme keieu kesempwal ma brothero pahn kasalehda ni eh lamalam oh mwekid me e kin kasalehda limpoak, kanengamah oh aktikitik. Brothero kin kasalehda aktikitik ni e kin kapinga Koht ni eh kin wia eh pwukoa ni eh kin papah rie kan? Ma iei, Siohwa pahn kapaiada eh doadoahk oh kekeirada nan mwomwohdiso.