Brother Pwulopwul kan, Kumwail Kin Nantihong Ale Pwukoa?
1. Iahd me brother pwulopwul men pahn tepida doadoahngki kaweid me mi nan 1 Timoty 3:1?
1 “Ma emen kin nantihong ale pwukoa. . . , e kin inengieng doadoahk mwahu ehu.” (1 Tim. 3:1, NW) Mahsen pwukat kin kangoange brother kan ren nantihong pwe ren kak ale pwukoa nan mwomwohdiso. Ke anahne wia aramas laud emen pwe ken wia met? Ni mehlel e mwahu en tepida nantihong wia met ni omw pwulopwul. Ma ke tepida ni omw pwulopwulte, ke kak ale kaiahn oh kasalehda me ke kakehr idihdidahng sounsawas men ni omw laudla. (1 Tim. 3:10) Ma kowe brother pwulopwul men me papidaislahr, ia duwen omw pahn kak alehdi pwukoa?
2. Ia duwen omw kak kakairada oh kasalehda irair en tounmetei?
2 Tounmetei: Tamataman me ke kin nantihong ale doadoahk mwahu ehu, kaidehn mwar. Eri, ken kakairada ineng en men sewese riomw kan. Ke kak wia met ni omw pahn kin medemedewe sapwellimen Sises mehn kahlemeng mwahu. (Mad. 20:28; Sohn 4:6, 7; 13:4, 5) Peki Siohwa en ketin seweseiuk pwe ken kin nsenohki meteikan. (1 Kor. 10:24) Ke kak sewese me mah oh soumwahu kan nan mwomwohdiso? Ke kin tounmetei pwe ken kak mwet, koakoahksang tehn tuhke, oh pil wia soahng teikan pwehn apwalih Wasahn Kaudok? Ke kak tounmetei pwehn wiliandi emen wia padahk nan Sukuhl ong Sapwellimen Koht Doadoahk? Ke pahn diar me omw kin toukihda pein kowe pwehki meteikan pahn wahdohng uhk peren.—Wiewia 20:35.
3. Ia uwen kesempwal en ahneki nanpwungmwahu rehn Koht oh ia duwen omw kak kakairada met?
3 Ahneki Nanpwungmwahu Rehn Koht: Nin duwen sounpapah men nan mwomwohdiso, eh ahneki nanpwungmwahu rehn Koht kin uhdahn kesempwalsang ahneki koahiek kan. Emen me ahneki nanpwungmwahu rehn Koht kin song en kilang soahng kan nin duwen me Siohwa oh Sises kin ketin wia. (1 Kor. 2:15, 16) E kin kasalehda “wahn sapwellimen Koht manaman.” (Kal. 5:22, 23 NW) E kin ngoangki kalohk oh mwohneki mahs Wehio. (Mad. 6:33) Ke kak kakairada irair en Kristian kan ni omw kin idawehn koasoandi en kaukaule wia onop. Met kin pid wadek Paipel rahn koaros, wadek ehuehu Kahn Iroir oh neitail sawaspen Paipel teikan. Kaunopada ong oh iang towehda mihting en mwomwohdiso kan pil kin kesempwal. (Mel. 1:1, 2; Ipru 10:24, 25) Ni Pohl eh kangoange Timoty en kekeirda nan padahk mehlel, e ntingihedi: “Kanahieng omw padahk kan.” (1 Tim. 4:15, 16) Eri nantihong wiahda omw padahk kan nan Sukuhl ong Sapwellimen Koht Doadoahk. Kaunopada oh kaukaule iang kalohk. Wiahda mehn akadei kan duwehte doadoahk en pioneer, doadoahk en Pedel de Sukuhl en Paipel ong Brother Kiripw kan. Ahneki nanpwungmwahu rehn Koht pahn sewese iuk ken “kalekehkin uhk ineng en mwahnakapw akan.”—2 Tim. 2:22.
4. Ia kesempwalpen likilik oh lelepek?
4 Likilik oh Lelepek: Pwehki wahnpoaron ko “ese” me brother kan me pwukoahki kihpeseng mwenge ong Kristian kan ni mwehin tepin Kristian ko kin likilik oh lelepek, re sohte anahne pwunodki ma doadoahko pahn kak pweida. Met kahrehiong wahnpoaron ko ren uhd apwalihte ire kesempwal teikan. (Wiewia 6:1-4) Ihme kahrehda, ni omw kin alehdi pwukoa ehu nan mwomwohdiso, ken wia met ni uwen omw kak koaros. Kahlemengih Noha me kin kanahieng idawehn kaweid kan me kohwong ih ong kokoudahn warihmwo. (Sen. 6:22) Siohwa kin ketin kesempwalki lelepek oh lelepek iei kasalepen ahneki nanpwungmwahu rehn Koht.—1 Kor. 4:2; kilang koakon “Kamwahupen Kaiahn.”
5. Dahme kahrehda brother pwulopwul kan anahne nantihong ale pwukoa?
5 Nin duwen e kokohpdahr, Siohwa kin ketin kamwadangehla doadoahk en rikirikpene. (Ais. 60:22) Ehuehu sounpar, aramas rielopw limenen kin papidaisla. Pwehki me kapw tohto kin iangala padahk mehlel, mie anahnepen ohl koahiek kan pwe ren apwalih pwukoa kan nan mwomwohdiso. Ahnsouwet mie doadoahk tohto ong sapwellimen Siohwa doadoahk me laud sang mahs. (1 Kor. 15:58) Brother pwulopwul kan, kumwail kin nantihong ale pwukoa? Ma iei, kumwail kin uhdahn inengieng doadoahk kaselel ehu!
[Blurb nan pali 2]
Pwehki me kapw tohto kin iangala padahk mehlel, mie anahnepen ohl koahiek kan pwe ren apwalih pwukoa kan nan mwomwohdiso
[Koakon nan pali 3]
Kamwahupen Kaiahn
Brother pwulopwul koahiek kan kin paiekihda ahn elder kan ar kin kihong irail pwukoa kan oh kaiahne irail. Mwurin mihting, emen sounapwalih me kin seiloak mwohd ni wasahn wia padahk oh kin kangoange emen sounkalohk. E kilang pwutak pwulopwul men me kesikesihnen limwah, ih eri idek reh ma e awiawih pwehn koasoiong ih. Brother pwulopwulo nda me e pwukoahki kamwakelehda wasahn wia padahk mwurin mihting koaros. Eh pahpa oh nohno men samwalahr, ahpw e sohte men kohkohla mwohn eh pahn wiahda eh pwukoa. Sounapwalih me kin seiloako eri keisang mwo. E kapinga oh nda: “Elder kan nan mwomwohdiso wet kin nsenohki kaiahne brother pwulopwul koahiek kan ni ar kin kihong irail pwukoa kan nan mwomwohdiso. Pwehki met, re kin kalapw pwungki brother pwulopwul kan ren wiahla sounsawas men ni ei kin mwemweitla ni mwomwohdiso wet.”