Nantihong en Kalaudehla Atail Doadoahk en Kalohk
1 Wahnpoaron Pohl kangoange Kristian akan en kekeid nan sapwellimen Koht ahl oh “woneweite kekeirda ni mour wet.” (1 Deselonika 4:1) Ia wehwehn met ong kitail? Ehu iei me kitail anahne raparapahkihte ahl kan en kalaudehla atail doadoahk en ngehn, oh nantihong en ‘kapwaiada atail pwukoa.’—2 Timoty 4:5.
2 Kahrepe Pwung: En kalaudehla atail doadoahk en kalohk kin kohsang atail ineng en kalaudehla atail papah Sounkapikpatail. Kitail men kekeirda ni pali ngehn oh rapahki ahl kan en kamwahwihala atail doadoahk en kalohk. Koasoandi mwahu oh kahrepe pwung pahn sewese kitail en lel mehn akadei kan me pid atail papah Koht.—Melkahka 1:1, 2; Pilipai 4:6; Ipru 10:24, 25.
3 Pwehn nantihong en kalaudehla atail doadoahk en kalohk, kitail anahne kakairada ngenen kihkihwei de tounmetei. Soangen irair wet kak kekeirda sang ni atail kin kapakap oh doudouloale duwen sapwellimen Sises mehn kahlemeng mwahu. (Madiu 20:28) Sises ketin alehdi peren laud sang eh kin ketin papah meteikan erein sapwellime doadoahk en kalohk. (Wiewia 20:35) Kitail kak kahlemengih Sises sang ni atail kin kasalehda nsenohki aramas akan oh mwasamwasahn ahnsou mwahu koaros pwehn kalaudehla atail doadoahk en kalohk.—Aiseia 6:8.
4 Pwukoa en Pahpa oh Nohno: Kitail kak kihong seri kan ineng en papah meteikan oh kalaudehla doadoahk en kalohk sangete ni ahnsou me irail tikitik. Me pwulopwul kan pahn tehk pwerisek en tohnpeneinei kan oh arail kin kaukaule iang doadoahk en kalohk. Emen brother kin tepida men kalaudehla eh doadoahk en kalohk ni ahnsou me e pwulopwul sang ni eh kin iang eh pahpa kahlap nan doadoahk nan mwomwohdiso. Eh kin kilang pwerisek en eh pahpa kahlapo oh eh peren kamwakidada ih en rapahki ahl kan en papah rie brother kan. E wia ministerial servant men ni ahnsou wet.
5 Anahn ong Brother kan: “Ma mehmen kin nantihong kalaudehla eh doadoahk . . . , e kin inengieng doadoahk mwahu.” (1 Timoty 3:1, NW) Mahsen pwukat kin kangoange brother kan en nantihong pwehn warohng ale pwukoa kan nan sapwellimen Siohwa pwihn. Emen sohte anahne ahneki koahiek tohrohr kan pwehn wia met. Brother men me kin nantihong en alehdi pwukoa kan pahn rapahki Wehio mahs oh ngoangki iang doadoahk en kalohk. (Madiu 6:33; 2 Timoty 4:5) E pahn nantihong en wia mehn kahlemeng mwahu ong meteikan.
6 Sampah Pwon: Siohwa kin ketin kamwadangahla doadoahk en kihpene. (Aiseia 60:22) Anahn laud mie ong koaros me kin idawehn sapwellimen Sises mehn kahlemeng en kalaudehla arail doadoahk en kalohk. Ripoht en sampah pwon ong pahr en kalohk en 2006 kasalehda me meh 248,327 papidaisla. Met wehwehki me tohtohsang meh 680 kin papidaisla ehu ehu rahn! Kitail koaros men nannantihte en rapahki ahl kan en kalaudehla atail doadoahk en kalohk.