Dahme Ke Kak Wia Pwehn Kalaudehla Ahmw Papah Siohwa
1 Sounpahr 40 samwalahro, artikel ehu me oaralap koasoia: “Is Your Best Good Enough?” pwarada nan Watchtower (lokaiahn wai) en January 15, 1955. Ni lokaiahn limpoak, e koasoia me sapwellimen Siohwa aramas kan kak kalaudehla arail ahnsoun papah Siohwa. Kaweid wet pil mwahu ong kitail rahnwet, ni atail kin nantiong kalaudehla atail papah Siohwa.
2 Kitail men papah Siohwa pwehki kitail mwekidki kosonned me keieu kesempwal: “Ke uhdahn pahn poakohng Kauno [“Siohwa,” New World Translation], amwail Koht, nan kapehdomw unsek, ngenomw unsek, omw lamalam koaros unsek, oh omw kehl unsek.” (Mark 12:30) Kitail kin kasalehda atail limpoak ohng Siohwa ni atail kin doadoahngki atail ahnsou ni ahl ehu me keieu mwahu pwehn kalaudehla atail papah Siohwa. Menlau tehk duwen ahl akan me ke kak kalaudehla ahmw papah Siohwa.
3 Wia Ahmw Pwukoah: Irail brother kan me inoukihong Siohwa arail mour kak nantiong en wiahla ministerial servant kan oh mwurin mwo, en wiahla elder kan. Artikel pwukat me oaralap kan koasoia: “Are You Reaching Out?” oh “Are You Qualified to Serve?” me pwarada nan The Watchtower (lokaiahn wai) en September 1, 1990 kamwekid brother tohto en nantiong en alehda pwukoah kan nan mwomwohdiso. Idek rehn elder kan nan pein ahmw mwomwohdiso pwehn wehwehki dahme ke anahne wia pwehn alehdi mehn sawas ohng iaduwen ke kakong pwukoah kan nan mwomwohdiso.
4 Elder kan oh ministerial servant kan me kiripw kak medemedewe ma re men audehda neirail doaropwe pwehn iang Ministerial Training School. Ke kak wadek duwen sukuhlo ni ahmw pahn kilang pahnangin oaralap “Ministerial Training School” nan pwuhken Watch Tower Publications Indexes en 1986-1995, 1996, oh 1997. Ke kin kilang me ‘doadoahk laud oh katapan mehlel’ ritidahng komwi? (1 Kor. 16:9a) Brother tohto me alehda pwukoah kan sohte wehwehki me pwais kaselel kan mihmi mworail ni arail kesepwilsang sukuhlo. Rahnwet, re kin doadoahk nan Bethel kan de re kin wia doadoahk en kalohk nin duwen special pioneer kan, misineri kan, de Sounapwalih en Circuit kan.
5 Nantiong Pwehn Iang Doadoahk en Pioneer: Me pwulopwul kan me kesepwilsang high school, lih pwopwoud kan me sohte kin doadoahk, oh iangahki irail me kommoaldiehr sang doadoahk kak medemedewe laud duwen en iangala doadoahk en pioneer. Kousapahlih insert en Atail Doadoahk Ong Wehio en September 1998, oh koasoiong pioneer kan me arail irair en mour kan ekis duwehte ahmw irair kan. Mwein ke pahn mwekidki soahng pwukat oh ke pahn men kalaudehla ahmw kalohk ni ahmw pahn iang doadoahk en pioneer, duwehte irail. (1 Kor. 11:1) Dahme ke anahne wia pwehn kalaudehla ahmw awahn kalohk en lel awa 70 nan sounpwong ehu oh wiahla emen regular pioneer?
6 Ahnsouwet, brother oh sister 17,000 samwa kin doadoahk nan rahn ohpis kan oh imwen Bethel kan wasa koaros nin sampah. Atail Doadoahk Ong Wehio (lokaiahn wai oh Pohnpei) en March 1995 kin koasoia duwen dahme emen anahne wia pwehn kakong doadoahk wet. Dahme ke soh wadek wasao nan Atail Doadoahk Ong Wehio pwehn kilang ma ke kakong alehda pwais kaselel en doadoahk nan imwen Bethel?
7 Kalohk Nan Wasa kan me Anahne Sawas: Ke kin mihmi nan ehu wasa me sounkalohk kan kin kalap pwurehng kalohk wasakis wihk koaros de ke kin mihmi nan ehu wasa me brother tohto nan mwomwohdiso kin ahneki pwukoah oh kin sawaspene nin duwen doadoahk nan mwomwohdiso? Ke kin medemedewe me ke men kalaudehla ahmw papah Siohwa ni ahmw pahn kosoula nan ehu wasa me anahne sawas? Mwein ke kak kosoula nan ehu wasa me karanih ahmw wasa ahpw me kin anahne sawas. (Madiu 9:37, 38) Ke anahne medemedewe mwahu ma ahmw kosoula wasao me mwahu de soh. Ke anahne kapakapki ire wet. (Luk 14:28-30) Koasoiong elder kan oh Sounapwalih en Circuit. Re kak sewese iuk en kasawihada ma e pahn mwahu en kosoula ahnsouwet de ma e pahn mwahu pwehn kaunopada en kosoula ehu rahn. Ma ke men nting ong Society pwehn ale iren sawas kan ong iawasa e pahn mwahu en kosoula ie, kisinlikou en Congregation Service Committee pahn anahne iang noumw kisinlikou.
8 Kamwahuiala Ahmw Koahiek en Kalohk: Kitail koaros kak kalaudehla atail papah Siohwa ni atail kin kamwahuiala atail koahiek en kalohk. Ke kin iang soangen kalohk koaros, duwehte kalohk sang ihmw-lel-ihmw, kalohk ni ahnsou sohte lipilipil oh ke kin pwurehng pwurala rehn aramas oh onop Paipel rehrail? Ma ke kin onop Paipel rehn aramas, ke kak kamwahuiala ahmw koahiek en padahk? E pahn mwahu en kousapahlih insert en Atail Doadoahk Ong Wehio en May 1999 pwehn tehk iren sawas kan ong iaduwen ke kak kamwekid noumw tohnsukuhl kan en men inoukihong Siohwa arail mour oh papidaisla.
9 Ke kak wadek irelaud 9 nan pwuhken Organized to Accomplish Our Ministry pwehn kilang dahme kitail kak wia pwehn kalaudehla atail papah Siohwa oh pil kamwahuiala atail kalohk. Kitail koaros en wia uwen me kitail kak ni atail kin papah Koht. Dahme ke soh medemedewe laud duwen ahmw mehn akadei kan me pid duwen ahmw papah Siohwa? Ken wia dahme 1 Timoty 4:15 kin kaweidki kitail: “Pwerisekiong oh poadidiong wiewia soahng pwukat; pwe aramas koaros en kak kilang omw kekeirada.”