Ke Men Wia Laud Sang Dahme Ke Wia Met?
1 Sises mahsanih me Wehin Koht kin rasehng pai kesempwal rir kan me pweilaud. (Madiu 13:44-46) Doadoahk en kalohkiseli Rongamwahu en Wehio kin pil rasehng takai kesempwal. E kin kesempwal ma kitail pahn kihong doadoahk wet en keieu kesempwal nan atail mour, edetehn wia uwen me kitail kak en iang doadoahk wet kak wehwehki me mie soahng kan me kitail anahne tounmeteikihla. (Madiu 6:19-21) Ke men wia mehkot nan doadoahk en kalohki Wehin Koht laud sang dahme ke wia met?
2 Medemedewe Duwen Soahng kan me Anahn: Mie soahng kan me kitail anahne wia ma kitail men kalaudehla dahme kitail kin wia nan kalohk: (1) nantihong kihong soahng kan me pid Wehio en keieu nan ahmw mour (Madiu 6:33) (2) ahneki pwoson oh mweidong Siohwa soahng koaros nan ahmw mour (2 Kor. 4:1, 7) (3) rapahki sawas sang rehn Koht ni ahmw pahn poadidiong kapakap (Luk 11:8-10) (4) wia mwekid kan me pwung ong ahmw kapakap akan.—Seims 2:14, 17.
3 Ahl kan me Kitail Kak Kalaudehla Atail Kalohk: E pahn mwahu ma emen emen pahn koasoanehdi pwehn kaukaule iang kalohk nan sounpwong kan koaros. Ahpw, ke medemedeweier duwen kesempwalpen doadoahngki ahnsou mwahu kan koaros en kalohk ni ahnsou soh lipilipil, oh nantihong wiahda ahmw padahk en wehwe mwahu, oh koasoanehdi pwe ahnsou me ke pahn pwurala rehn aramas akan e pahn katapan oh mie lipwe, oh nantihong sewese aramas me ke kin onop rehrail en kekeirada ni pali ngehn? Ke kak Auxiliary Pioneer de Regular Pioneer de kalohk wasa kan me re anahne sawas? Ma kowe emen brother me papidaislahr, ke kak nantihong pwehn wiahla emen Ministerial Servant de elder? (1 Tim. 3:1, 10) Ke kak kalaudehla dahme ke wia nan doadoahk en papah Siohwa ni ahmw pahn kapedolong noumw doaropwe (application) ong doadoahk nan Bethel, iang Ministerial Training Sukuhl, de Gilead Sukuhl pwehn ale kaiahn me kin kohwong irail me men wiahla misineri kan?—Luk 10:2.
4 Emen brother me kin doadoahk full-time oh kin doadoahngki eh ahnsou laud ong mwadong (sports) ale kangoang en wiahla emen Regular Pioneer. E tepida Auxiliary Pioneer oh mwurin mwo koasoanehdi eh ahnsou pwehn wiahla Regular Pioneer. Mwurin mwo, e iang Ministerial Training Sukuhl, me sewese ih en kaunopada ong doadoahk en Sounapwalih en Circuit—doadoahk me e kin wia met. E perenki me e mwekidki kangoang me kohwong ih, oh e pehm me e nsenamwahu met pwe e wia eh pilipil en kalaudehla dahme e kin wia nan doadoahk en kalohki Wehio.
5 Siohwa kin ketin kapaiada irail akan me kin kasalehda me re men kalaudehla dahme re kin wia nan doadoahk en papah Siohwa. (Aiseia 6:8) Ke dehr mweidohng mehkot en kauwehla ahmw kalaudehla ahmw iang doadoahk en kalohk oh ke pahn perenki nsenamwahu oh kapai kan me kin kohsang ahmw pilipil mwahu.