Koasoia Duwen Dahme Wiawi Nan Sampah de Nan Pein Ahmw Wasa Pwehn Kahrehong Aramas en Perenki Rong
1 Ke soh pahn perenki ma ke pahn ahnsou koaros kak koasoia ong tohnihmw mehkot kapw oh mehkot me pahn kahrehong ih en perenki rong duwen Pwuhk Sarawi? Ma iei, ke kak koasoia dahme wiawi (nuhs) nan sampah oh nan pein ahmw wasa pwehn kahrehong aramas en perenki rong. Ke kak koasoia dahme wiawi nan pein ahmw kahnimw oh ahmw wehi oh pil dahme wiawi nan sampah. Soahng pwukat kin kalap wekila. (1 Kor. 7:31) Kitail kak koasoia karasepe kei.
2 Aramas tohto kin pwunodki kahpwal en mwohni oh pwainen dipwisou oh mwenge wie kekeirada. Ke kak nda:
◼ “Ke rong me pwainen [eden dipwisou] wie kohkohda met?” De ke kak koasoia duwen sohte itar doadoahk ma, karasepe, pisnis laud ehu nan ahmw wasa ahpwtehn kakommoal tohndoadoahk tohto. Mwurin mwo, ma ke pousehla amwa koasoipene duwen oaralapo, ke kak idek rehn tohnihmw “Dahme kahrehda ke lemeleme me e kin inenen apwal en apwalih atail peneinei ni pali war nan rahn pwukat?” de “Ke lemeleme e pahn apwal en apwalih atail peneinei kan ni pali war sang met kohkohla?”
3 Kitail pil kak koasoia duwen tiahk lemei, duwehte pei oh kamaramas nanpwungen tohnpeneinei de tohnsukuhl kan. Ke kak nda:
◼ “Ke wadek nan nuhspepa duwen [nda dahme wiawi nan pein ahmw wasa]?” Mwurin mwo, idek rehn tohnihmw “Dahme kahrehda tiahk lemei kin wie tohtohla nan sampah?” de “Ke lemeleme ehu rahn kitail pahn sohla perki mehkot suwed en wiawiong kitail?”
4 Kitail pil kak koasoia nuhs en lapake kan, rerrer en sahpw akan, mahwen kan, oh uhpene nanpwungen wehi kan nan sampah. Karasepe ehu, ke kak idek:
◼ “Ke lemeleme Koht kin kahrehda [lapake, rerrer en sahpw, melimel] en wiawi?” De ke kak koasoia mahwen ehu me wiawi de uhpene nanpwungen wehi kan de keinek kan oh ke kak idek rehn tohnihmw: “Ma aramas koaros kin perenki popohl, dahme kahrehda e inenen apwal aramas koaros en miniminpene oh nsenamwahu?”
5 Ahnsou koaros rong nuhs me ke kak doadoahngki pwehn tepida ahmw padahk. Ke kak wadek ekei iren sawas kan nan pwuhken Reasoning, pahnangin sawaspen oaralap “Current Events,” pali 10-11. Ahpw, kanahieng pwe ken dehr poupalihki politik kan oh kahpwal nanpwungen aramas akan. Ahpw, ni pali teio, e kin mwahu en kasalehda duwen dahme iren Pwuhk Sarawi mahsanih oh kitail kak ihte koapworopworki Wehin Koht en kamwahuwiala kahpwal koaros en aramas akan.