Kalohk Nan Sampah Wet me Kalapw Wekiwekila
1 Irair kan kak mwadang wekila! Nan pwong ehu, melimel, de kahpwal en mwohni, de kahpwal me pid politik, de kahpwal me kin pakair ong aramas koaros nan ahmw kousoan iei soangen kahpwal pwukat me aramas kin kalap men koasoia. Ahpw, pil mwadangete, aramas kak sohpeiong mehkot tohrohr oh men wehwehki duwen pil ehu kahpwal tohrohr. (Wiewia 17:21; 1 Korint 7:31) Nan sampah wet me kin kalap wekiwekila, iaduwen kitail kak sewese aramas pwe ren sohpeiong kitail oh kak rong duwen rohng en Wehio?
2 Kasawihada Ahn Meteikan Kapwunod akan: Ehu ahl me kitail kak kangoangehki aramas en rong kitail iei en koasoia duwen dahme kin wiawi nan sampah ahnsou wet. Ni en Sises kangoange aramas akan me rong ih en medemedewe laud duwen nanpwungen irail oh Koht, ehu ahnsou e kasalehda duwen kahpwal akan me ahpwtehn wiawi me irail kin medemedewehte. (Luk 13:1-5) Duwehte Sises, ni ahnsou me kitail kin kalohki Rongamwahu, e pahn mwahu en koasoia duwen kahpwal ehu me ahpwtehn wiawi nan nuhs de kahpwal ehu me kin dokedoke mour en aramas akan nan ahmw wasa. Ahpw, ni ahnsou me kitail kin koasoia duwen kahpwal pwukat, kitail anahne kanahieng pwe kitail de uhpaliki ehu wehi de ehu pwihn en aramas.—Sohn 17:16.
3 Iaduwen atail pahn kak ese dahme aramas kin medemedewe ahnsou wet? Mwein ahl me keieu mwahu en ese iei en wia peidek ehu ong irail oh rong dahme re pahn nda. (Madiu 12:34) Ma kitail nsenohki aramas akan, met pahn kamwekid kitail en tehk dahme irail pahn koasoia oh wia peidek kamantik kan pwehn uhdahn wehwehkihla arail pepehm kan. Ma tohnihmwo pahn nda mehkot kapwuriamwei, met mwein pahn kasalehda duwen kapwunod me aramas tohto nan wasao kin ahneki oh met kak kamwekid uhk en kasalehda iaduwen kaweid sang Paipel kak kamwahuwihala soangen kahpwalo.
4 Kaunopada Atail Padahk: Ni ahnsou me kitail pahn kaunopada ong kalohk nan sampah wet me kalap wekiwekila, kitail kak doadoahngki mwahu pwuhken Reasoning. Iren sawas kan me pahn sewese kitail en ese ia mwomwen kitail pahn kak koasoia duwen dahme wiawi nan rahn pwukat oh iaduwen kitail kak kihong mehpwukat nan atail padahk kin sansalda ni pali 10-11, pahnangin oaralap me koasoia: “Crime/Safety” oh “Current Events.” Soangen iren sawas pwukat pil kak dierekda nan Atail Doadoahk Ong Wehio en September 2000, pali 4. Ni ahnsou me ke kin kaunopada ahmw padahk, ke kak doadoahngki iren Paipel me konehng.
5 Ni atail pahn tehk kanahieng duwen dahme aramas kin pwunodki me kin wie wekiwekila nan rahn pwukat, kitail anahne en kawekila atail padahk kan pwehn kalohki Rongamwahu oh sewese aramas ni pali ngehn. Ni ahl wet, kitail anahne koasoiong aramas oh kin koasoia duwen dahme kin wiawi nan arail mour. Ih duwen atail pahn kak sewese aramas tohto en esehla Ih me sohte kin wekila ni sapwellime irair oh koasoandi kan.—Seims 1:17.