Kasalehda Atail Nsenohki Aramas—Ni Atail Kin Kaunopada Mwahu
1 Ni ahnsou me kitail kin kaunopada mwahu ong kalohk, met kin kasalehda me kitail kin nsenohki aramas. Ia mwomwe? Ni atail kin kaunopada mwahu, kitail sohte pahn kin pwunodki medewe dahme pein kitail pahn nda, kahrehda kitail kak rong kanahieng dahme tohnihmwo pahn kin nda. Oh pil, ni ahnsou me kitail kin kaunopada mwahu, kitail sohte pahn saloh oh met pahn pil sewese kitail en koasoi sang nan atail mohngiong. Ahpw, iaduwen atail kak kaunopada tepin koasoi me pahn sair mohngiong en aramas akan?
2 Doadoahngki Padahk me Pahn Konehng Aramas akan me Ke Kin Tuhwong: Pilada padahk ehu sang Atail Doadoahk Ong Wehio en January 2005 me ke lemeleme pahn konehng ahmw wasahn kalohk, oh medewe iaduwen ahmw pahn wia padahko ni pein ahmw lokaia. Wekid ahmw padahk kan pwehn mwahu ong ahmw wasahn kalohk. Karasepe, ma ke kin tuhwong aramas kei me kin iang pelien lamalam me wekpeseng me kohsang ekei sahpw tohrohr ahpw mihmihpene wasakis, medewehda ia mwomwen ahmw pahn kawekila ahmw padahk pwe irail en perenki rong. Ahmw kawekila ahmw padahk pwehn katapan ohng aramas akan me ke tuhwong kin kasalehda me ke nsenohkin irail.—1 Korint 9:22.
3 Ni ahmw pahn tepida wia ahmw padahk, nantihong kamwahuwihala padahko. Tehk mwahu iaduwen aramaso kin mwekidki tepin koasoi me ke kin doadoahngki. E perenki oaralap me ke koasoia? E kin wehwehki oh e kak sapeng peidek kan me ke doadoahngki? Ma soh, e pahn mwahu en kawekila tepin koasoi me ke doadoahngki pwehn kak sair mohngiong en aramaso.
4 Mehn Kataman kan: Sounkalohk tohto kin apwaliki en tamataman dahme irail pahn nda ni ahnsou me irail kin lel ni ihmwo. Ma ke pil kin apwaliki tamataman dahme ke pahn nda, ke kak praktis ahmw padahko rehn emen? Ma ke pahn wia met, ke pahn kak tamataman ire kesempwal en ahmw padahko nan ahmw madamadau oh ke pahn kak kawehwe duwen ire pwukat ni ahl me mengei oh wehwe mwahu. Ahmw praktis mwowe pahn pil sewese iuk en ese dahme ke pahn nda ni ahnsou me tohnihmw kan pahn wia soangsoangen pasapeng kan mwurin ahmw wia peidek kan.
5 Iet me ke kak wia ma ke apwaliki tamataman dahme ke pahn nda: ke kak ntingihdi ire kesempwal kan en ahmw padahk nan kisin doaropwe, oh kin kilang doaropweo mwohnte omw pahn lel ni ihmwo. Ekei sounkalohk kan diarada me arail wia met kin sewese irail en sohte saloh oh irail kak koasoi mwahu ong tohnihmw kan. Pwehki met, atail kaunopada mwahu pahn kasalehda me kitail kin nsenohki meteikan oh met pahn sewese kitail en kawehwe mwahu Rongamwahu en Wehin Koht.