Kasalehda Atail Nsenohki Aramas—Ni Atail Pahn Kin Kawekila Atail Padahk kan
1 Wahnpoaron Pohl wia mehn kahlemeng mwahu ni ah kin kak kawekila sapwellime padahk kan pwehn kak pwungong mour oh madamadau en irail me kin karonge ih. (1 Korint 9:19-23) Kitail en kahlemengih ih. Ma kitail pahn kin ekis medewe mwowe, kitail pahn kak doadoahngki padahk kan me pwarada nan Atail Doadoahk Ong Wehio oh kawekila padahk pwukat pwehn kak pwungong anahn en aramas nan atail wasahn kalohk. Ni atail kin alulahng ni imwen aramas akan, kitail en tehk mwahu likin imwarail pwehn kak kawekila atail padahk kan en koasoia dahme irail kin perenki. Ahpw, mie pil ehu ahl en kak tehk anahn en meteikan pwehn kawekila atail padahk kan.
2 Kawekila Ahmw Padahk Pwehn Pwungong Dahme Tohnihmwo Nda: Ni atail kin wia doadoahk en kalohk, kitail kin kalap wia peidek ong tohnihmwo oh mweidohng tohnihmwo en sapeng peideko. Iaduwen omw kin kilangwohng arail pasapeng? Ke kin rong arail pasapeng oh pil doulahte wia padahk me ke kaunopadahro? De ke kin rong en tohnihmwo ah pasapeng oh kowe eri kawekila ahmw padahk pwehn pwungiong dahme e koasoia? Ma ke kasalehda me ke kin nsenohki dahme e koasoia, ke kak idek reh pil ekei peidek kan pwehn kilang dahme e uhdahn kin medemedewe. (Lepin Padahk 20:5) Ni ahl wet, ke kak kawekila ahmw padahk pwehn koasoia duwen irair en Wehin Koht me pahn kak lel ah irair en kapwunodo.
3 Met wehwehki me kitail perenki oh kak koasoia ehu oaralap tohrohr likin me kitail kaunopadahro. Ma kitail tepida koasoia duwen kahpwal ehu me pwarada nan nuhs, tohnihmwo mwein pahn pil koasoia duwen pil ehu kahpwal de ire ieu me e kin pwunodki, atail nsenohki tohnihmwo pahn kamwekid kitail en kawekila atail koasoi pwehn pwungiong dahme e kin pwunodki.—Pilipai 2:4.
4 Kawekila Ahmw Padahk: Ni ahnsou me tohnihmwo wia peidek ong uhk, e pahn mwahu en ndaiong ih me ke pahn pwurodo mwurin ahmw onopki oaralapo. Ke pil kak kihong tohnihmwo pwuhk de brochure de makisihn me pahn sapeng ah peideko. Soahng pwukat koaros kin kasalehda atail nsenohki mehlel en sewese meteikan en sukuhliki oh esehla duwen Siohwa.—2 Korint 2:17.