“En Kapwaiada Soahng Koaros me Mwahu”
1 Ni ahnsou me Sises ketin tepiada doadoahk en kalohk, e kin ketikihong sapwellime ahnsou pwehn kaunopada sapwellime tohnpadahk kan. (Mad. 10:5-14) Mehnda ma kitail koaros kin soupisek, ni atail kin kihong ahnsou de pil minit kei te pwehn kaunopada mwohn atail pahn iang doadoahk en kalohk sang ihmw lel ihmw pahn sewese kitail en dolung wah mwahu tohto.—2 Kor. 9:6.
2 Iaduwen Kitail Pahn Kaunopada: Kaunopada mwahu kin tepisang atail pahn esehla audepen pwuhk de makasihn kan me kitail koasoanehdi en kihla. Kitail pil anahne en medemedewe duwen aramas akan nan atail wasahn kalohk. Soangen iren kahpwal dah kan me irail kin pwunodki? Soangen padahk dah kan me arail palien lamalam kin padahngki wasao? Nan Atail Doadoahk en Wehio de sang nan pwuhk en Reasoning, kitail kak diarada ekei mwomwen padahk kan me pahn sewese kitail en doadoahngki ong tohn wasao.
3 En rong kanaiehng kamwomwada kan me kin kohda nan atail Service Mihding pil kak sewese kitail. Ni atail kalaudehla atail koahiek en padahk, atail ahnsou en kaunopada pahn kin mwotomwotala. Ahpw, ahnsou koaros mwohn atail pahn kohla wia doadoahk en kalohk, ma kitail kin medemedewe duwen dahme kitail pahn koasoia oh kin pwurepwurehng kamwahwihala atail padahk kan, kitail pahn uhdahn koahiekla mehlel. Kitail pil anahne tehk mwahu ma kitail kin wahda pwuhk kan koaros me kitail anahne nan atail ehd kan.
4 Dahme pahn sewese kitail en tamataman dahme kitail pahn padahngki? En pwurepwurehng ndinda ni ngihl laud dahme kitail pahn padahngki iei ehu ahl me kak katengehdi nan atail madamadau dahme kitail men nda. Ekei kin perenki kamwomwada kisin padahk kan nan arail onop en peneinei. Ekei kin pil diarada me e kin sawas ma irail kin ntingihdi lepin koasoi kei nan kisin tehn doaropwe kan pwe irail en kin kilang mwohnte arail pahn kohla ni wenihmw akan.
5 Dahme Kahrehda Met Wia Kamwahu Ehu: En kin kaunopada mwahu pahn kalaudehla atail koahiek oh atail peren en wia doadoahk en kalohk. E kin sewese kitail en pil kin meleilei oh sohte saloh ni atail pahn koasoi ong tohn ihmw akan. E kin kahrehiong kitail en rong kanaiehng tohn ihmw akan ahpw kaidehn en kin medemedewehte dahme kitail en nda. Kapatahiong met, en esehla audepen pwuhk de makasihn kan pahn sewese kitail en kin peren ni ahnsou me kitail kin kihla pwuhk pwukat.
6 Pwuhk Sarawi kin kangoange kitail en kin “kapwaiada soahng koaros me mwahu.” (Taitus 3:1) Mie pil ehu doadoahk me mwahu sang doadoahk en kalohki rongamwahu wet? Ni atail kin kaunopada mwahu, kitail kin kasalehda wahu ong irail akan me kin pwungki rong kitail, oh pil ong Siohwa, Kohto me kitail kin kadehde.—Ais. 43:10.