Ke Men Wiahda Wekidekla kan?
1. Koasoandi dah kan me kitail anahne wia pwehki wekidekla kan nan sampah?
1 Sampah wet duwehte wasahn kapoudial me kalapw wekila iangahki tohn sipai ko. Wekidekla kan nan sampah kahrehda kitail anahne wiahda wekidekla kan ehuehu ahnsou ong wiepen atail kalohk, atail koasoandi kan oh duwen atail pahn tuhwong tohnihmwo. Ke men wia wekidekla pwukat?
2. Dahme kahrehda kitail anahne wiahda wekidekla kan pwehn peipeiante sapwellimen Koht pwihn?
2 Wiepen Omw Kalohk: Mwomwohdiso en Kristian kin wiahda wekidekla kan ahnsou koaros. Ni Sises eh tepin kadarpeseng sapwellime tohnpadahk ko, e padahkihong irail ren dehr wa mwenge de edin mwohni. (Mad. 10:9, 10) Ahpw mwuhr e ketin pwurehng wekid kaweid pwukat pwehn kaunop ong kahpwal kan me pahn lelohng sapwellime tohnpadahk kan oh doadoahk en kalohk me pahn lelahng wasa teikan. (Luk 22:36) Erein sounpar epwiki samwalahro, sapwellimen Siohwa pwihn kin doadoahngki wiepen kalohk wekpeseng kan—duwehte kisin doaropwehn padahk, redio prokram kan oh sidohsa me mie sipihker laud powe—nin duwen dahme anahn ahnsowo. Rahnpwukat pwehki aramas tohto sohte kin kalapw mi nan ihmw, kaweid kin kalapw kohda me likin atail kalohk ihmw lel ihmw, kitail en kapatahiong kalohk nan wehi pokon oh ahnsou sohte lipilipil. Kangoang kin kohda kitail en kalohk ihmw lel ihmw ni soutik ma aramas kin doadoahk ni rahn. Ni sapwellimen Siohwa pwihn en nanleng me rasehng kuruma ehu kin wiahda wekidekla kan, ke kin peipeiante?—Esek. 1:20, 21.
3. Ia duwen atail kin wekidohng atail padahk en konehng irair kan kin sewese kalaudehla atail pweida mwahu nan atail wasahn kalohk?
3 Wiepen Omw Padahk: Dahme aramas kan nan omw wasa kin nsenohki ahnsou pwukat? Pai en wehi? Peneinei? Kauwehla kosonned? E kesempwal en wehwehki soangen kahpwal oh irair kan me kalapw wiawi nan atail wasahn kalohk pwe kitail en kak kaunopada ehu wiepen padahk me konehng. (1 Kor. 9:20-23) Ni ahnsou me tohnihmw kin kasalehda arail madamadau, kitail en dehr kisin sapeng oh pousehlahte atail padahk me kitail kaunopada, ahpw e mwahusang ma kitail uhd koasoia dahme irail men koasoia.
4. Dahme kahrehda kitail en mwadang en wiahda wekidekla kan?
4 Kereniongehr kaimwiseklahn doadoahk wet pahn wiawi, oh kahn kamakam kowahlap pahn tepida. “Atail ahnsou mwotomwotalahr.” (1 Kor. 7:29) Ia uwen kesempwal atail mwadang wiahda wekidekla kan pwe kitail en kak kapwaiada uwen me kitail kak erein ahnsou mwotomwot me luhluhwe!