Dahme Kitail Kin Akadeiong Ni Atail Kin Onop Paipel Rehn Aramas akan?
1 Dahme kahrehda kitail kin onop Paipel rehn aramas akan? Pwehn sewese irail en loalokongkihte Mahsen en Koht, de kamwahuwihalahte arail mour kan en ahnsou wet, de sewese irail en ahnekihte koapworopwor ong ahnsou kohkohdo? Soh. Atail mehn akadei me keieu kesempwal iei en sewese irail en wiahla sapwellimen Sises Krais tohnpadahk! (Madiu 28:19; Wiewia 14:21) Ihme kahrehda, kitail anahne kangoange irail kan me kitail kin onop rehrail en iang towehda mihding kan. Ma re kin kalahnganki koasoandi kan en sapwellimen Siohwa pwihn, re kak kekeirada ni pali ngehn.
2 Iaduwen E Pahn Wiawi: Sang nin tepio, ke pahn kangoange aramas me ke kin onop reh en iang towehda mihding kan. (Ipru 10:24, 25) Kawehwehong ih iaduwen mihding kan kak kakehlailih eh pwoson, sewese ih en wia kupwuren Koht oh sewese ih en werekiong irail akan me kin papah Siohwa. (Mel. 27:13; 32:8; 35:18) Pein ahmw kasalepen ahmw limpoak oh kalahnganki soahng kan me ke kin sukuhliki nan mihding kan oh ahmw kasalehda kamwahupen werekiong tohnmwomwohdiso oh soahng pwukat pahn kamwekid ih en iang towehda mihding kan.
3 Irail me kapw kan anahne wehwehki me sapwellimen Siohwa pwihn sansal kin wia pwihn ehu me mihmi wasa koaros nan sampah. Kasalehong irail video cassette kan me oaralap kan koasoia “Jehovah’s Witnesses—The Organization Behind the Name” oh “Our Whole Association of Brothers.” Sewese irail en wehwehki me Siohwa kin doadoahngki aramas rar rar kei me inoukihong Ih arail mour pwehn wia kupwuren Koht wasa koaros nan sampah. Kehsehkin irail me kapw kan me luhk kohwong irail en pil papah Koht.—Aiseia 2:2, 3.
4 E kin wia mehkot me inenen kaperen en kilang emen me ke kin onop Paipel reh wiahla emen sapwellimen Sises tohnpadahk. Met kin wia atail mehn akadei!—3 Sohn 4.