“Kisakis kan Sang Rehn Ohl akan” me Kin Ngoangki Apwalih Sapwellimen Koht Sihpw kan
1 E inenen wia sawas limpoak ehu sang Siohwa, ki sapwellime Ohl en kamwerehdi “kisakis kan sang rehn ohl akan”! (Episos 4:8, 11, 12, NW) Irail kin ahneki pwukoa tohto me iangahkihte en kin ngoangki apwalih sapwellimen Koht sihpw kan. (1 Piter 5:2, 3) Kitail koaros kin paiekihda laud sang sawas anahn pwukat. Edetehn ekei kin lelohng kahpwal kan, de re kapw nan mwomwohdiso, de ahneki soangen luwet tohrohr kan, de pil peilahr ni pali ngehn, irail ohl pwukat kin ahneki nsenoh mehlel ohng ahn koaros irair en pali ngehn.—Pilipai 2:4; 1 Deselonika 5:12-14.
2 Ni ahnsou me mwekid kansensuwed kan en sampah kin pwarada oh kahrehda pwunod laud, irail soun silepen sihpw pwukat kin kadehdehda me irail “rasehng wasahn rukusang kisinieng oh melimel.” Ni ahnsou me kitail kin pwangada oh toutoulahr oh pehm me kitail anahne kamweit, irail kin kamaiaukitailada “rasehng piletik kansenamwahu kan me kin tangatang nan wasa karakar kan, oh mwetehn paipalap ehu nan sapwtehn.”—Aiseia 32:2.
3 Kangoange Irail akan me Wereila Sohte Iang Kalohk (Inactive): Elder kan kin eimah ni ahl tohrohr ehu en kangoange irail kan me solahr kin kaukaule de sohla kin iang kalohk, pwehn sewese irail en pwurala oh kaukaule iang koasoandi kan koaros en mwomwohdiso. Sawas limpoak en silepen sihpw pwukat sewesehdahr me tohto en kaukaule iang towehda mihding kan en mwomwohdiso oh kakehlahda arail pali ngehn me kahrehda ren pwurehng iang doadoahk en kalohk. Soangen nannanti en elder pwukat koaros kin kasansalehda sapwellimen Siohwa limpoak kadek oh en Sises Krais kin uhdahn iang pidada kahluwa mwomwohdiso. E keikihdier mehn kahlemeng ong duwen kasalehda soangen nsenoh ong sohte lipilipil nah sihpw kan me ele peilahr ni pali ngehn oh salongala.—Madiu 18:12-14; Sohn 10:16, 27-29.
4 Irail silepen sihpw pwukat kin tetehk kilel kan me pahn kasalehda ahnsou dah kan ele ekei pahn ekis pweiek ni pali ngehn. Emen me kin kasalehda mwomwen mworusala, me solahr kin kaukaule iang mihding kan, de wawaila nan doadoahk en kalohk kin uhdahn anahne sawas en pali ngehn. Irail elder kan kin ngoangki sewese irail kan me tepida mwomwen men alasang likou oh kapwat en sampah de me kin kekeirda madamadau sapwung kan duwen mwomwohdiso. Ki nsenoh mehlel oh limpoak kadek, sounapwalih pwukat kin inengieng ‘kihong pein arail mour’ pwehn sewese apwalih irail pwukat en pwurehng kasapahldo arail limpoak ong Siohwa.—1 Deselonika 2:8.
5 Mahs ekei Kristian me inoudahr kan kin salongala sang mwomwohdiso, mihlahr nan irair ehu me arail pali ngehn luwetala pwehki kahpwal kan en roson, kahpwal kan en doadoahk de mwohni, de kahpwal kan en peneinei me kin inenen poweiraildi. Ni mwomwen sohte kadeiki irail, irail elder kan kin ni kadek kamehlelehiong irail me Siohwa kin ketin nsenohki sapwellime sihpw kan koaros oh pahn ketin apwahpwalih irail ni ahnsou apwal akan. (Melkahka 55:22; 1 Piter 5:7) Silepen sihpw kan kin onopadahr en sewese irail en pohnese me ma irail ‘keiong mpen Koht, ah e pahn ketin keiong mparail,’ ketikihong irail kamweit oh kamaiau.—Seims 4:8; Melkahka 23:3, 4.
6 Kesempwalki me Luwetalahr ni Paliwar: Sounsilepe limpoak kan kin pil nsenohki irail ko me kakete sohte sawas kohieng irail. Me kin pil iang kisehn mwomwohdiso koaros iei irail me luwetalahr ni paliwar me kin kousoanla nan wasahn imwen me mah kan, de uhdahn solahr kak en iang towehda mihding kan. Pwehki irair kan me irail mih loale, kitail kak wehwehki me arail pwais en kalohki rong en Wehio sohte kak laud. Ele arail ahnsou mwahu en kalohk pahn sangete arail pahn koasoi ong irail kan me mwemweitdo rehrail, irail soumwahu teikan, de irail me kin apwalih irail wasao. Mendahki met, sohte lipilipil dahme irail kak wia, kitail en kilangwohng met nin duwen sawas kesempwal ehu ohng doadoahk en kalohk pwon. (Madiu 25:15) Mendahki irail kin ihte kalohk ki minit 15, met anahne en kileldi oh irail pahn doulahte iang kileldi nin duwen sounkalohki Wehio kaukaule men.
7 Irail me wia “kisakis kan sang rehn ohl akan” kin uhdahn tehk mwahu anahn en pali ngehn en riarail brother kan ahpw ni mehlel ong soangen ahnsou pwukat nan pahr wet—me iei ahnsou me karanih ahnsoun Kataman. Iei met ahnsou me inenen konehng ong elder kan en nantiong sewese koaros me salongalahr kan en pwurehng pehm duwen kaperen oh meleilei me kin iangete werek mwahu kan en mwomwohdiso! Kitail kin perenda ni ahnsou me kitail kilang irail pwukat me “kisehn atail pwoson” iang towehda mihding kan en mwomwohdiso oh pil iang doadoahk en kalohk, oh kin pwurehng katengehdi arail pwoson ong meirong tomw.—Kalesia 6:10; Luk 15:4-7; Sohn 10:11, 14.