Ma Kitail Pahn Kamwarak Werentuhke Tohto, Kitail Pahn Ale Kapai Tohto
1 Kitail koaros kin kasikasik pweidahn inou kaselel kan me kileledi nan Mahsen en Koht. Pil ni ahnsou wet, Siohwa kin ketikihong kitail kapai tohto me kin kihong kitail peren nan atail mour. Uwen atail kin paiekihda kapai pwukat kin poahsoanehda pohn uwen atail kin nannanti. Wahnpoaron Pohl mahsanih: “Aramas me kin kamwarak werentuhke tohto, e pahn dolung wa tohto.” (2 Korint 9:6) Kitail kak koasoia irair riau me iretikitik wet kin dokedoke.
2 Pein Atail Nannanti Nan Kalohk: Ma kitail pahn wia uwen me kitail kak en ehukihong meteikan duwen Rongamwahu en Wehin Koht—kitail pahn ale kapai tohto. (Lepin Padahk 3:27, 28) Se men kapinga irail sounkalohk tohto me kin kamwarak werentuhke tohto ni arail kin kalaudehla arail ahnsou nan kalohk, oh pil ni arail kin iang Auxiliary Pioneer oh Regular Pioneer. Kitail koaros kak kamwarak werentuhke tohto ni atail pahn nantihong pwurehng pwurala rehn irail koaros me kin kasalehda me re men rong oh tepida onop en Paipel rehn aramas akan ahnsou koaros me kitail kak. (Rom 12:11) Ma kitail pahn nantihong wia met, e pahn imwikihla ahneki ekspiriens mwahu tohto oh atail peren pahn laudla nan kalohk.
3 Utungada Soahng kan Koaros me Pid Wehin Koht: Ni mehlel, ahnsou me Pohl mahsanih duwen ‘kamwarak werentuhke tohto,’ e kin koasoia duwen sawas ni palien mwohni oh dipwisou kan. (2 Kor. 9:6, 7, 11, 13) Rahnwet, mie ahl tohto me kitail kak utungada Wehin Koht ni atail kin kihda atail sawas en atail ahnsou, kehl oh pil neitail mwohni oh dipwisou kan. Kitail kak pil sawas ni atail pahn iang kauwada Kingdom Hall kapw kan oh Wasahn Kapokon kapw kan wasa kan me anahn mie. Kitail kak pil kihda atail sawas ni atail kin kamwakelehda oh kamwahuwihala wasa kan me ohla nan pein atail Kingdom Hall me kin wia atail wasahn kaudok. Oh pil, kitail kak kihda atail sawas en mwohni me pahn sewese pwain liohl oh soahng pwukat iangahki kihda atail sawas en pwuhk kan me pahn utungada doadoahk en kalohk nan sampah pwon. Ma emenemen kitail kin wia uwen me kitail kak, kitail pahn perenki kilang me Siohwa kin ketin kapaiada sapwellime doadoahks!—Malakai 3:10; Luk 6:38.
4 Mahsen en Koht kin kangoange kitail en “wia me mwahu, kepwehpwehki doadoahk mwahu, en sapan oh perenki sewese meteikan.” Ma kitail pahn rong oh mwekidki kaweid wet, kitail kak ale kapai tohto ni ahnsou wet. Oh pil, kitail kak “kaunopada ehu pai kesempwal ong pein kitail me pahn wia ehu poahsoan kehlail ong ni ahnsou kohkohdo. Eri, kitail ahpw pahn kak lelohng ni mouro me uhdahn mour mehlel.—1 Tim. 6:18, 19.