“En Sapan oh Perenki Sewese Meteikan”
1 Sounpahr tohto samwalahr ako, Wahnpoaron Pohl padahkiong Timoty en kangoange riatail kan en “wia me mwahu, re en kepwehpwehki doadoahk mwahu, re en sapan oh perenki sewese meteikan.” (1 Tim. 6:18) Pohl pil katamankin irail Kristian en Ipru kan en dehr manokehla “wiewia mwahu kan oh amwail sawaspene.” (Ipru 13:16) Dahme kahrehda e ntingihdi kaweid wet? Pwe e ese me “Koht kin ketikihong aramas koaros me kin wiewia me mwahu: lingan, wahu oh popohl.”—Rom 2:10.
2 Pwehki Siohwa Koht kapikada soahng koaros, Ih me kin sapwellimanki soahng koaros. (Kaudiahl 4:11) Kitail kalahnganki dahme e kin wia ong kitail. Mendahki pali laud en aramas sohte kin kalahnganki dahme Siohwa kin wia ong kitail aramas, e kin ahnsou koaros mweidohng aramas akan en paiekihda sapwellime kisakis kan en mour ong kitail. (Madiu 5:45) E pil kadarodo sapwellime Ohl pwehn meirongkihla moure pwe kitail kak ale mour soutuk. Limpoak me Siohwa oh Sises kasalehong kitail soh kin kamwekid kitail en sewese meteikan?—2 Kor. 5:14, 15.
3 Iaduwen Kitail Kak Sewese Meteikan? E konehng en doadoahngki dahme kitail kin ahneki oh naineki ni ahl ehu me kin kaperenda Koht. Kitail men utungada doadoahk en kalohki Wehio sampah pwon ni atail kin sawaskihda atail dipwisou kan oh mwohni kan oh pil ni pali ngehn. Ni mehlel, en wehwehki duwen Rongamwahu kin wia mehkot me keieu kesempwal nan mour en aramas, pwe “me pwungla rehn Koht pwehki pwoson pahn mourla.” (Rom 1:16) Ma kitail pahn sawaski atail ahnsou oh dipwisou kan oh mwohni kan ni atail pahn iang doadoahk en kalohk oh padahk, kitail kak sewese meteikan en sukuhliki duwen kisakis en pali ngehn oh kak sewese irail en ale mour soutuk.
4 Siohwa kin perenki ahnsou me kitail kin sewese irail me semwehmwe. E inoukihong kitail me kitail pahn ale kapai tohto, oh e kin pil katamankin kitail me: “Reken kepwe sohte pahn wia kamwahu ehu ong uhk ni rahn me ke pahn mehla, ahpw lelepek me pahn doarehla omw mour.” (Lepin Padahk 11:4; 19:17) Utungada doadoahk en kalohki Wehio ni palien mwohni oh dipwisou kan oh pil iangahki atail wia uwen me kitail kak nan doadoahk en kalohk pahn kasalehda me kitail kin sapan oh perenki sewese meteikan.