“Ahmw Doadoahk Kaidehk Doadoahk Mwahl Ehu”
1 Iren Paipel wet kin wia mehn kangoang laud ong kitail! Ahmw doadoahk en papah Siohwa kaidehk doadoahk mwahl ehu. (1 Kor. 15:58) Ni pali teio, medewehla duwen aramas tohto me kin doadoahk laud oh pil doadoahk awa tohto pwe re kin nantihong kamwahuiala arail mour ni paliwar oh ni palien mwohni. Re kin iang sukuhl laud sounpahr tohto de re kin kaliduhla pahn arail doadoahk pwe re men kepwehpwehla. Ahpw, “paisuwed kin lelohng aramas koaruhsie,” re sohte kin kak lel mour ndand me re kin raparapahki, de mwein re sohte kak kepwehpwehla duwen me re kasikasik. Duwehte emen me kin “pwakipwakih kisinieng,” arail doadoahk kin sohte katepe. (Ekl. 1:14; 9:11) Ihme kahrehda, e kesempwal en doadoahk laud nan doadoahk ehute me uhdahn katepe oh kesempwal!
2 Doadoahk me kin Katapan: En kalohki Rongamwahu en Wehin Koht kin wia doadoahk me keieu kesempwal nan sampah. Doadoahk wet pahn wiawi mehnda ma aramas kin rong de soh. Kitail men nda, duwehte Pohl: “I sohte kin pwukoahki nta en aramas koaros, pwehki I sohte ekihsang kumwail ei kasalehiong kumwail unsek kupwuren Koht.”—Wiewia 20:26, 27, New World Translation.
3 Ni ahnsou me aramas kin rong oh mwekidki rohng en Wehio, kitail kin uhdahn peren! En emen lih pwulopwul ah peneinei (rien ah pahpa de nohno lih) mehla. E kin medemedewe iawasa liho kohla ie—nanleng de nan ehl? E kin kapakapkihong Koht sawas, oh kin doadoahngki mwaren Siohwa nan ah kapakap, nin duwen rie kin padahkiong ih en wia. Ni ahnsou keren, e tepida onop Paipel oh kin iang towehda mihding en Kristian kan. E tepida ahneki madamadau kapw duwen mour oh sohla kin patehng werek suwed (street gangs). Lih pwulopwul menet kesehla simoak, doadoahngki wini suwed oh pirap. E wehkada: “Ihte limpoak ong Siohwa me sewese ie en kesehla ahi mour sakanakan. Ihte Siohwa me diren mahk kak ritingadahng ie koapworopwor en mour soutuk.” Met, e sohla kin wia soahng kan me sohte katepe.
4 Mendahki aramas tohto sohte kin rong, ke kak tamanda me ahmw doadoahk en papah Siohwa kin katapan. Aramas pahn wehwehki me Sounkadehdehn Siohwa kan men koasoi ong irail. Ahmw lelepek oh nannanti oh limpoak pahn sansalda. Eri, ahmw doadoahk en papah Kauno wia doadoahk mwahl ehu? Uhdahn soh!