E Kin Wia Mehkot Me Kin Kerempwa Ahmw Wia Uwen Me Ke Kak Nan Doadoahk en Kalohk?
1 Pali moron en aramas akan kin inenen soupisek nan arail mour kan. Sounkadehdehn Siohwa kan kin wia aramas akan me kin keieu soupisek—re kin kalap onop Mahsen en Koht, iang towehda mihding en mwomwohdiso kan, oh pil iang doadoahk en kalohk. Likin met, kitail kin soupisengki doadoahk ong mwohni, doadoahk nan imwatail kan de onop en sukuhl kan, oh pwukoa tohto teikan, oh mehpwukat koaros kin doadoahngki ahnsou laud. Koasoanehdi soahng pwukat kin keieu apwal ong tapwin peneinei kan.
2 Pwehki kahpwal en mwohni kin wiawi wasa tohto, tapwin peneinei kan anahne doadoahk awa tohto pwehn apwalihada arail peneinei kan. Pwehki pali laud en arail ahnsou oh kehl kin kohwong arail doadoahk en mwohni, sohte arail ahnsou laud me luhwe ong doadoahk en kalohk. Ekei kin lemeleme me: pwehki arail pwukoa en apwalih arail peneinei kan kin laud, re pahn iang doadoahk en kalohk ekeite ahnsou. (1 Tim. 5:8) Ni mehlel, e kin apwal en kaitarala atail anahn akan en mour duwehte mwenge, likou, oh sohang pwukat. Ahpw, e sohte pahn mwahu ma doadoahk en mwohni kin wia mehkot me kin kerempwa atail wia uwen me kitail kak nan doadoahk en kalohki Rongamwahu. (Mark 13:10) Eri, kitail anahne kasawih pein atail irair akan.
3 Pwehki irair akan en sampah kin kalapw wekiwekila, tapwin peneinei men mwein pahn kihong eh ahnsou laud ong doadoahk pwehn kak kalaudehla nekinekid kan ong ahnsou me e pahn loi ong apwal akan me e sohte kin kasik. (1 Kor. 7:31) Ni ahnsou emen pahn kalaudehla eh ahnsou ong doadoahk ong mwohni, mehlel, e pahn kakete pwainda dipwisou kan laudsang dahme anahn, oh pahn mie neirail mwohni kan en iang mwadong kan oh mehn kamweit kan, ahpw met pahn kak sewese eh peneinei en ahneki peren oh nsenamwahu mendahki solahr arail ahnsou en wia soahng ngehnin kan oh iang towehda mihding kan koaros? Kitail pahn wia uwen me kitail kak en liksang wia soahng kan me pahn kauwehla atail pali ngehn. E pahn mwahu ma kitail pahn kapwaiada kaweid en Sises en ‘kepwehpwehkihla paien nanleng’ oh en “kepwehpwe mwohn silangin Koht” kin wia elen mour me keieu mwahu.—Madiu 6:19-21; Luk 12:15-21.
4 Rapahki Mahs Wehin Koht: Sises padahkiong sapwellime tohnpadahk kan en kihong mehkan me ngehnin mwohn mehkan koaros. E kangoange irail: “Kumwail dehr kin pwunodki ndinda, ‘Se pahn kihsang ia at tungoal kisin mwenge, de nimat pihl? Se pahn diar ia at likou?’ ” Dahme kahrehda Sises pahn wia soangen peidek pwukat? E kawehwehda: “Samamwail me ketiket nanleng ketin mwahngih duwen amwail kin anahne mepwukat koaros.” Ma kitail uhdahn kamehlele met, eri, e sohte pahn mie mehn kerempwa ieu me pahn pere kitail sang kitail en wia dahme Sises mahsanih met: “Kumwail rapahki mahs Wehin Koht oh dahme e kin ketin kupwurki, a soahng teikan koaros [soahng kan me anahn ong mour] e ahpw pahn kin ketikihong kumwail.” Ei, Koht pahn ketin apwalih kitail oh ketikihong kitail dahme kitail anahne! (Madiu 6:31-33) Met kaidehn ahnsou kitail en uhdi pwehki dene kitail ngoangkihla kitail en ahneki dipwisou kan de kitail en rapahki kitail en nsenamwahu nan koasoandi suwed wet me pahn mwadang ohla.—1 Pit. 5:7; 1 Sohn 2:15-17.
5 Uhdahn kahrepen kitail kin doadoahk en mwohni pwe kitail en kak alehda dahme kesempwal ong atail mour. Ahpw, ia uwen me kitail uhdahn anahne? Wahnpoaron Pohl mahsanih: “Eri, ma kitail tungoalenki kisin tungoal akan oh likou, met e itarohng kitail.” Iaduwen—kitail kin song ale laud sang met? Ma iei, kitail pahn ale kahpwal akan me pahn kohsang met me Pohl kalekehkin kitail: “Irail kan me men kepwehpwehla kin pwupwudiong nan ineng pweipwei oh keper tohto, me kin kauweirailla.” (1 Tim. 6:8, 9; Madiu 6:24; Luk 14:33) Iaduwen kitail pahn ese ma kitail uhdi pwehki atail ineng daulihala?
6 Ma pwehki atail rapahki pai en mour wet kin kahrehong atail iang towehda kalohk ah tikitikla de pil kitail solahr kak kilang anahn en meirongkihla soahng kan pwe kitail en kak kalohki Rongamwahu, eri met e pahn mie anahn kitail en kousapahlih dahme kesempwal nan atail mour. (Ipru 13:15, 16) Katikala atail elen mour ongete dahme uhdahn anahn pahn wia kamwahu laud ong kitail, ong kihsang mehn kerempwa ong atail doadoahk en kalohk. Mehkan me pid Wehin Koht pahn ahnsou koaros wia mehkot me keieu kesempwal nan atail mour ni atail pahn koasoanehdi atail ahnsou oh atail kehl.
7 Doadoahk me Sohte Pahn Mwahl: Mahsen en Pohl ahnsou koaros kin kangoange kitail en kin “wia uwen atail kak nan doadoahk en Kauno, ni atail ese me atail doadoahk sohte pahn mwahl ong mehkan me pid Kauno.” (1 Kor. 15:58) “Doadoahk en Kauno” me keieu kesempwal iei en kalohki duwen Wehin Koht oh doadoahk en katohnpadahk. (Madiu 24:14; 28:19, 20) Pwe kitail en kalaudehla atail pwais uwen me kitail kak, kitail anahne koasoanehdi ahnsou ong kalohk ehu ehu wihk oh songen dehr kihong ehu soahng tohrohr en kedirepwehla. (Episos 5:15-17) Eri, doadoahk en mwohni de pil soahng teikan solahr pahn wia mehn kerempwa ong atail kalohk.
8 Ni atail kin toukihda pein kitail ong padahkiong meteikan padahk mehlel sang nan Paipel, kitail kin ale soangen pepehm en peren me keieu laud me kin pid peren en kihkihwei. (Wiewia 20:35) Ni atail kin nantihong wia doadoahk en kalohki Wehio, kitail kak kilangwohng ahnsou kohkohdo oh koapworopworki me “Koht me uhdahn pwung; e sohte pahn ketin meliehla [atail] wiewia kan de [atail] limpoak ong Ih.”—Ipru 6:10.