Doadoahk en Kalohk en Kristian—Doadoahk me Kitail Kin Keieu Kesempwaliki
1 Kitail koaros kin anahne wia soangsoangen doadoahk kan. Atail apwalih atail peneinei kin wia pwukoah ehu me kohsang rehn Koht. (1 Tim. 5:8) Ahpw, doadoahk me kitail anahne wia pwehn kapwaiada atail pwukoah kan me kohsang rehn Koht—soangen doadoahk pwukat sohte pahn wia doadoahk me kesempwal sang doadoahk en kalohki Wehin Koht oh doadoahk en katohnpadahk.—Madiu 24:14; 28:19, 20.
2 Sises ketikihong kitail mehn karasepe mwahu pwe kitail en kak idawehn ih ni atail “rapahki mahs Wehio.” (Madiu 6:33; 1 Pit. 2:21) Mendahki Sises e sohte kepwehpwehki dipwisou en sampah, e kin ketin ngoangki wia kupwuren Semeo. (Luk 4:43; 9:58; Sohn 4:34) E kin ketin nantihong kalohk wasa koaros ni ahnsou mwahu koaros. (Luk 23:43; 1 Tim. 6:13) E kin ketin kangoange sapwellime tohnpadahk kan en kasalehda soangen ngoangohte me e kasalehda nan doadoahk en rahk.—Madiu 9:37, 38.
3 Kahlemengih Sises Rahnwet: Kitail kak kahlemengih sapwellimen Sises mehn kahlemeng mwahu ni atail pahn nantihong kihsang nan atail mour soahng soh katepe kan oh en kin keieu kesempwaliki kalohk nan atail mour. Ma miehier atail anahn akan en mour, a kitail en peikiong kaweid sang Paipel en dehr ngoangki kepwehpwehkihla kepwehn sampah kan. (Madiu 6:19, 20; 1 Tim. 6:8) E pahn mwahu en nantihong en kalaudehla atail ahnsoun kalohk! Ma kitail lelohng irair apwal akan, kitail en nantihong en duwehte Sises, oh kitail en dehr mweidohng pwunod en mour en kauwehla atail mwohnki doadoahk me pahn kin keieu nan atail mour me iei doadoahk en kalohki Rongamwahu en Wehin Koht.—Luk 8:14; 9:59-62.
4 Pil irail me ahneki pwukoah tohto kin pil mwohnki doadoahk en kalohk. Emen brother me ah peneinei me laud, oh e pil kin doadoahk en mwohni me diren pwukoah kan, oh e pil kin wia doadoahk en elder nan mwomwohdiso en Kristian koasoia: “I kin kilangwohng doadoahk en kalohk nin duwen doadoahk me keieu kesempwal nan ahi mour.” Emen sister me kin wia doadoahk en Regular Pioneer koasoia: “Doadoahk en pioneer kin kesempwal sang doadoahk en mwohni me keieu pweilaud.”
5 Sohte lipilipil soangen irair dah kan me kitail mihla loale, kitail en kin idawehn mehn kahlemeng mwahu me Sises ketin wiadahr. Iaduwen kitail kak wia met? Sang ni atail pahn wiahki atail doadoahk en kalohk en Kristian en keieu kesempwal nan atail mour.