Alasang Krais nan Omwi Doadoahk en Kalohk
1 Sises ketikihda mehn kahlemeng kitail en alasang ong me pid atail doadoahk en kalohk. Eh limpoak loal ong Koht oh ong aramas kin sansalda pak tohto oh nan soangen ahl tohto. E kin padahkiong me opampap kan padahk mehlel oh wiahda soahng kan me kin kasalehda limpoak-kadek ong irail kan me soumwahu oh apwal.—Madiu 9:35.
2 Sapwellimen Sises Mehn Kahlemeng oh Padahk kan: Sises sohte kin uhd kedirepwkihla palien politik kan de song en kamwahwihala kahpwal koaros en eh wasa. E pil sohte mweidohng soangen doadoahk mwahu teikan en kahrehsang ih uhdahn doadoahk me e ketidohng wia. (Luk 8:1) E kin mwohnkihte kalohki rongamwahu en Wehin Koht me iei ihte met me pahn kamwahuwihala soutuk kahpwal kan en aramas. Mie doadoahk lap me Sises anahne wia ahpw ahnsou mwotomwot kiste en wia met. Ni ahnsou me aramas kan nan Kapernaum peki Sises en mihmihte rehrail, Sises padahkiong nah tohnpadahk kan: “Kitail douluhlwohng nan kousapw teikan . . . pwe I en pil lohkiseli wasa ko Rongamwahu, pwe ihme I kohkihdo.”—Mark 1:38.
3 Mwurin eh kaiahnda sapwellime tohnpadahk kan, Sises kadarewei irail ki kaweid oaritik pwukat: “Kumwail kohwei oh kapahrengkihong irail me Wehin Koht kerendohr!” (Madiu 10:7) E padahkiong sapwellime tohnpadahk kan me Wehin Koht pahn kin keieu kesempwal nan arail mour. (Madiu 6:33) Kaimwiseklahn mahsen kan en Sises ong sapwellime tohnpadahk kan mwohn eh ketidahla nanleng kin kasansalehiong irail dahme re pahn wia. E mahsanih: “Kumwail eri kohwei wasa koaros oh padahkiong tohn wehi kan koaros; pwe re en wiahla nei tohnpadahk.”—Madiu 28:19.
4 Kesempwalpen Wehio: Iren koasoi me Sises kin keieu kalapw koasoia iei Wehin Koht, oh e kin kangoange sapwellime tohnpadahk kan en kin idawehn eh mehn kahlemeng. En aramas pahn song en kamwahuiala kahpwal kan sohte kak pweida. (Seremaia 10:23) Wehin Koht kelehpw pahn kasarawihala mwaren Koht oh wahdo kamaiau mehlel ong aramas. (Madiu 6:9, 10) Padahkiong padahk mehlel duwen Wehio ong aramas kan me kin “pahtoulahr oh milahr nan apwal pwehki soahng saut akan me wiewiawi” kin sewese irail en ahneki mour nsenamwahu, oh pweida mwahu met oh kolokol teng koapworopwor likilik ehu duwen ahnsou kohkohdo.—Esekiel 9:4.
5 Sises kin ieiangete pidada nan kalohkpen rongamwahu en Wehin Koht, oh e kin kamehlelehiong kitail en koapworopworki me e pahn ieiangete kitail. (Madiu 28:20) Ia wen laud atail kin songosong pwe atail doadoahk en kalohk en kahlemengih mehn kahlemeng me Sises ketikihdi ong kitail? (1 Piter 2:21) Nan imwin rahn kesempwal pwukat, kitail en wia uwen me kitail kakohng pwe kitail en idawehn kanaiehng mehn kahlemeng me Sises ketikihda me pid duwen doadoahk en kalohk!