Dahme Kitail Keieu Kesempwalki
1. Ia duwen Sises eh ketin kasalehda me doadoahk en kalohk me keieu kesempwal ong ih?
1 Doadoahk en kalohk me Sises keieu kesempwalki. E kin ketin doadoahk laud ni e kin ketin alialuhki mwail epwiki kei nan Palestin pwehn kalohk ong uwen aramas tohto me e ketin kakohng. E sohte kin ketin kedirepwki soahng kan me sohte nohn kesempwal pwehn kak ketikihong sapwellime ahnsou oh madamadau ong doadoahk en kalohk. (Mad. 8:20) Ni ahnsou me pokon en aramas akan kin men en mihmihte mahs pwe en kamwahwihala me soumwahu kan, e mahsanih: “I uhdahn pahn pil kapahrengki Rongamwahu en Wehin Koht ong kahnimw teikan, pwe ih me Koht ketin poaronekiniehdo.”—Luk 4:43.
2. Dahme kahrehda doadoahk en kalohk inenen kesempwal ong Sises?
2 Dahme kahrehda doadoahk en kalohk me inenen kesempwal ong Sises? E kin ketin keieu kesempwalki kasarawihlahn mwaren Siohwa. (Mad. 6:9) Pwehki e ketin poakohng Seme nanleng, e kupwurki kapwaiada kupwuren Semeo oh peikiong sapwellime kosonned akan koaros. (Sohn 14:31) Patehng met, e pil kin ketin nsenohki mehlel aramas akan oh kupwurki sewese irail.—Mad. 9:36, 37.
3. Ia duwen atail kin kasalehda me doadoahk en kalohk me kitail kin keieu kesempwalki?
3 Kahlemengih Sises: En wiahki doadoahk en kalohk me keieu kesempwal duwehte me Sises ketin wia, kak wia mehkot apwal pwehki sampah wet kin kihsang atail ahnsou laud oh pil kin kihda mehn kerempwa tohto kan. (Mad. 24:37-39; Luk 21:34) Ihme kahrehda kitail anahne tehk soahng kan me keieu kesempwal, koasoanehdi atail ahnsou pwehn kaunopada oh iang doadoahk en kalohk kaukaule. (Pil. 1:10, NW) Kitail kin nantihong en itarki dahme mie oh dehr doadoahngki laud dipwisou kan en sampah.—1 Kor. 7:31.
4. Dahme kahrehda e kesempwal en wia dahme keieu kesempwal ni ahnsou wet?
4 Ma ahnsou kin mwotomwotala, aramas loalokong men kin wia dahme keieu kesempwal mahs. Karasepe, ma e esehda me melimel keper ehu kohkohdo, e pahn kihong eh ahnsou oh kehl pwehn wiahda koasoandi kan pwehn pere eh peneinei oh pil kairehkin mehn mpe kan. Soahng kan me sohte kesempwal pahn wiawi mwuhr. Ahnsou me luwehdi mwohn melimel en Armakedon pahn leledo mwotomwotalahr. (Sep. 1:14-16; 1 Kor. 7:29) Pwehn doare kitail oh irail kan me kin rong kitail, kitail anahne tetehk pein kitail oh padahk kan me kitail kin wia nan mwomwohdiso de likin mwomwohdiso. (1 Tim. 4:16) Ei, komourpatail kin pid atail kin wiahki doadoahk en kalohk en keieu kesempwal nan atail mour!