Dahme Keieu Kesempwal Nan Ahmw Mour?
1 Pelien lamalam tohto kin kesempwaliki sawas kan me irail kin kihong pwihn en sampah kan, duwehte sawas en ihmw de mwohni ong sukuhl oh palien wini. Mehlel, Sounkadehdehn Siohwa kan, sohte kin manokehla “wiewia mwahu kan oh pil ehukihong meteikan dahme re kin ahneki oh naineki,” ahpw dahme irail kin keieu kesempwaliki iei sewese meteikan ni pali ngehn.—Ipru 13:16.
2 Mehn Kahlemeng Mwahu en Sises oh Tepin Kristian akan: Sises wia doadoahk mwahu kan ahnsou me e ketiket nin sampah oh wia doadoahk en kalohk, ahpw doadoahk me e keieu kesempwaliki iei doadoahk en kadehde duwen padahk mehlel. (Luk 4:43; Sohn 18:37; Wiewia 10:38) E kehkehlikiong sapwellime tohnpadahk kan en “kohwei wasa koaros oh katohnpadahkihala tohn wehi kan koaros, . . . kehkehlikiong irail re en peikiong mehkoaros me I koasoanediong irail.” (Madiu 28:19, 20) Oh pil, e kasalehda me irail me pwoson ih pahn kalaudehla doadoahk en kalohk me e tepida ahnsou me e ketiket sampah. (Sohn 14:12) Sises kin keieu kesempwaliki doadoahk en kalohk pwehki doadoahk wet pahn sewese aramas en sukuhliki duwen elen komour.—Sohn 17:3.
3 Wahnpoaron Pohl kin kilangwong doadoahk en kalohk nin duwen “pwukoa” me e anahne wia oh sohte kak pohnsehsehla. (1 Kor. 9:16, 17) E nseneki wiahda tohnmetei sohte lipilipil, oh dadaurete mendahki kasongosong sohte lipilipil lelohng ih, de lokolongki kahpwal sohte lipilipil pwehn kak kapwaiada ah pwukoa en kalohk. (Wiewia 20:22-24) Wahnpoaron Piter oh ienge kan kasalehda soangen lamalamohte. Mendahki irail lelohng kamakam oh selidi nan imweteng, “irail wonoweite ni padahk oh kawehwe Rongamwahu duwen Sises me iei ih Krais.”—Wiewia 5:40-42.
4 Iaduwen kitail? Kitail kin keieu kesempwaliki doadoahk en kalohki Rongamwahu en Wehin Koht oh doadoahk en katohnpadahk? Duwehte Sises, kitail kin nsenohki ni mehlel irail akan me “rasehng sihpw kei me sohte silepahr”? (Madiu 9:36) Irair en sampah wet oh kokohp en Paipel kin kasansalehda me koasoandi suwed wet pahn kereniong imwisekla! Ma kitail pahn tamataman met—e pahn sewese kitail en kin keieu kesempwaliki doadoahk en kalohk oh pil ngoangki doadoahk wet.
5 Kasawihada Ahmw Irair kan: Pwehki pein atail irair kan kakete wekila, e kin mwahu en ekei pak kasawih pein atail irair akan pwehn kak wia wekidekla kan me anahn pwehn kalaudehla atail ahnsoun kalohk. Emen sister me wia Regular Pioneer nan pahr 50 samwa, pahr 60 samwa oh pahr 70 samwa, e anahne uhdisang doadoahk en Regular Pioneer pwehki e kin soumwahu. Ahpw, mwuhr, e solahr nohn soumwahu. E pwurehng kasawih pein ah irair kan oh diarada me e kakete pwurehng pioneer. E inenen peren pwe e kak iang towehda Pioneer Service Sukuhl ni e mahki sounpahr 90! A iaduwen komwi? Ke kereniongehr pahn kommoal sang doadoahk de kesepwil sang sukuhl? Ni ahmw pahn pwurehng kasawih ahmw irair kapw kan, ke lemeleme ke pahn kak pioneer?
6 Ni ahnsou me Sises kasawihada me Marda “kedirepwki soangen doadoahk tohto,” e kasalehda, ni kadek, me e pahn ale kapai tohto ma e pahn kihsang nan ah mour soahng kan me sohte katepe. (Luk 10:40-42) Ke kak kihsang nan ahmw mour soahng kan me sohte katepe? Anahne ohl pwopwoud oh lih pwopwoud koaros en iang doadoahk en mwohni? Ma kitail wiahda soangen wekidekla kan nan atail mour, atail peneinei kakete ale anahn en mour ma emente pahn wia doadoahk en mwohni? Irail me tohto paiekihda ni pali ngehn pwehki irail wia soangen wekidekla kan pwehn kalaudehla arail ahnsoun kalohk.
7 Kitail koaros kak idawehn mehn kahlemeng mwahu en Sises oh sapwellime wahnpoaron kan! Kitail kak kamehlele me Siohwa pahn kapaiada atail nannanti kan ma kitail wia uwen me kitail kak en iang doadoahk kesempwal wet—doadoahk en kalohki Rongamwahu en Wehin Koht.—Luk 9:57-62.