Paiekihda Kapokon en District me Oaralap Koasoia “Sounkalohk Ngoang kan en Wehio”
1 Prokramo Inenen Kangoange Kitail: Kitail uhdahn perenki prokram en Kapokon en District me ahpwtehn wiawi pwehki e wia kangoang laud ong kitail! Kitail kohpene pwehki kahrepe ehute: pwehn koahiekla ni atail ngoangki lohkiseli Wehin Koht.
2 Brothero me wia Kapahrek ong Wehi Pokon me oaralap koasoia, “Irairen Sampah Wet kin Wekiwekila,” kawehwehda duwen soangen wekidekla dah kan me pahn wiawi mwohn sapwellimen Koht rahn kamasepwehk me pahn wiawi? Oh pil, ni ahnsou me ke rong kaimwiseklahn padahk me oaralap koasoia: “Kaukaule Wia Doadoahk Mwahu kan Nin Duwen Sounkalohk Ngoang kan en Wehio,” iaduwen ke kak doadoahngki dahme ke sukuhliki nan kalohk?
3 Ire Kesempwal kan me Kitail Kak Doadoahngki: Nan Kapahrek me oaralap koasoia: “Sounkalohk kan en Wehio me kin Ngoangki Kalohk,” ihs me kasalehda ngoang me kitail kak kahlemengih? Soangen keseu dahieu me pein kitail pahn kak wiahda me re kangoange kitail en wia?
4 Ke kin tamataman iren sawas dah kan me re kasalehda nan padahko me oaralap koasoia: “Iaduwen Inou oh Papidais kin Sewese Kitail en Ale Komourpatail” me pahn sewese kitail en ngoangki papah Siohwa? Oh pil, nin duwen dahme padahk me oaralap koasoia “Kumwail, me Pwulopwul kan—Kaunopada Ong ni Ahnsou Kohkohdo ni Amwail kin Iang Sapwellimen Siohwa Pwihn” kasalehda, dahme irail me pwulopwul kan kak wia pwehn kak ahneki koapworopwor kaselel ong ahnsou kohkohdo?
5 Nin duwen padahk me oaralap koasoia “Karanih Siohwa” kasalehda, ia ekei ahl kan me Paipel kin kamehlelehong kitail me kitail kak kompoakepahki Koht? Ia sapwellimen Siohwa irair pahieu me brother me wia padahk wet kasalehda?
6 Kepwe Kesempwal Ngenin Kapw kan: Kitail inenen perenki alehdi pwuhk kaselel kapw ieu me oaralap koasoia Draw Close to Jehovah. Ia ekei ire tohrohr kan me mihmi loale? Mehnia karasaras kan me ke uhdahn perenki? Ahmw wadewadek pwuhko kin sewese iuk en karanih Siohwa? Pil ihs pahn paiekihda pwuhk kapw wet?
7 Kumwail me pwulopwul kan, ia amwail madamadau duwen tract kapw me oaralap koasoia Youths—What Will You Do With Your Life? E sewese iuk en medemedewe laud duwen ia mwomwen ke kin doadoahngki ahmw mour? Dahme wiawi ahnsou me ke ehukihong me pwulopwul teikan duwen tract kapw wet?
8 Mwurin mwo, kitail alehdi pwuhk kapw me oaralap koasoia Worship the Only True God. Iaduwen pakair me koasoia kahrepe pwuhk wet wiawihda kamwekid uhk? Dahme kahrehda kitail kak nda me e pahn wia sawas laud nan atail doadoahk en kalohk oh ni e wia keriaun pwuhk me kitail pahn onop rehn aramas akan?
9 Kapokon en District me oaralap koasoia “Sounkalohk Ngoang kan en Wehio” kihong kitail soangen kangoang ngehnin kan me kitail anahne pwehn papah Siohwa mendahki kitail mihmi nan ahnsou apwal akan. Kitail en wia uwen me kitail kak en tamataman dahme kitail rong, kalahnganki oh doadoahngki dahme kitail sukuhliki pwehn paiekihda koasoandi ngehnin tohrohr wet. (2 Pit. 3:14) Ma kitail pahn wia met, e pahn kakehlailih kitail pwe kitail pahn kak kolokol atail lelepek ong Siohwa oh pil kitail pahn kak wia sounkalohk ngoang kan en Wehio oh kahlemengih atail Kaun, Sises Krais oh met pahn wahdo kaping laud ong Siohwa.—Pilipai 1:9-11.