Ke Kin Doadoahngki Dahme Ke Sukuhliki Sang Kapokon en District me Oaralap Koasoia “Sounpadahk kan en Mahsen en Koht”?
1 Ma emen iang towehda Kapokon en District en pahr wet, e kilang me sapwellimen Siohwa aramas akan kin nantihong kapwaiada arail pwukoah en padahkiong aramas akan duwen Mahsen en Koht. (Madiu 28:19, 20) Ni ahnsou me ke pwurala imwomw mwurin kapokono, ire kesempwal dah kan me ke pilahn en doadoahngki nan ahmw mour oh nan kalohk?
2 Iren Paipel kan Kin Sewese Kitail en Padahk: Oaralap en Kapokono iei Ipru 5:12, oh wahnpoaron Pohl kangoange kitail en “Wiahla Sounpadahk kan.” Kapahrek en Wehi Pokon, me wia tepin padahk en rahno, me oaralap koasoia, “Ihs Me Kin Padahkiong Wehi kan Koaros Padahk Mehlel?” kasalehdahr mehn kadehde kan me Sounkadehdehn Siohwa kan kin wia met, oh irail weksang tohn Kristendom, pwe tohn Kristendom kin dene me re kin padahkiong aramas akan padahk mehlel sang nan Paipel ahpw ni mehlel soh.
3 Mwurin kapahrek wet, pil ehu kapahrek me wiawier me oaralap koasoia “Koahiekla nin duwen Sounpadahk kan en Mahsen en Koht,” oh ma kitail pahn koahiekla ni ahl wet, kitail anahne kesempwaliki oh wauneki Mahsen en Koht laud sang dahme aramas akan kin koasoia oh doadoahngki Mahsen en Koht ahnsou koaros. Rahn koaros, kitail anahne kapakap pwe ngehn sarawi en sewese kitail ahnsou me kitail iang kalohk oh ahnsou me kitail kin nantihong kasalehda limpoak. Oh pil, kitail en ale kaiahn sang sapwellimen Siohwa pwihn pwehn koahiekla oh met pahn wiawi ni atail pahn iang towehda mihding kan koaros oh kapwaiada iren sawas kan me kin kohda.
4 Kapahrek me oaralap koasoia “Siohwa kin Kalinganakihda Sapwellime Aramas akan Marain” sewese kitail en kesempwaliki marain me Siohwa kin ketikihda, oh pil en karanih sapwellimen Koht pwihn en ladu lelepek oh loalokong, oh pil en sewese sapwellimen Siohwa aramas akan en ahneki popohl. Ke wadekehr pwuhk kapwo me oaralap koasoia Isaiah’s Prophecy—Light for All Mankind II?
5 Kapahrek me wiawi ong irail me pahn papidaisla pil mwahu ong koaros me iang towehda kapokon rahno. Irail me papidaislahr ale kangoang en ‘kekeirada’ ni arail pahn nantihong ahneki lamalam pwung me pid duwen atail doadoahk en kalohk.
6 Koahiekla Pwehn Kak Padahki Meteikan: Tepin padahk kan me pahn wiawi mwurin souwas pahn koasoia “Padapadahkki Pein Kitail Nin Doken Atail kin Padahkiong Meteikan.” Padahk siluh pahn koasoia oaralap wet oh pahn kasalehda ire siluh pwukat: (1) idawehn sapwellimen Koht kosonned akan ni atail kin kolokolete tiahk en Kristian, (2) en kaukaule wia onop mwahu, oh (3) kihsang lamalam oh ineng kan me Tepil kak doadoahngki ni ahl sapwung. Mehnia iren sawas kan me ke tepidahr doadoahngki nan ahmw mour?
7 Sawas ong Padahk ni Ahnsou Kohkohdo: E sansal mwahu me sawas me kitail pahn ale, ni ahnsou kohkohdo, sang pwuhk kapw me oaralap koasoia Benefit From Theocratic Ministry School Education pahn sewese kitail en koahiekla nin duwen sounpadahk kan en Mahsen en Koht. Kitail pahn sukuhliki duwen sapwellimen Koht ladu kan me lelepek me mihmi nan Pwuhk Sarawi oh duwen arail irair kan me pid kalohk oh padahk. Ehu ehu iren mehn kasukuhl nan pwuhk kapwo pahn kasansalehda dahme kitail anahne wia, dahme kahrehda e kesempwal, oh iaduwen kitail pahn wia mehpwukat. Nan pwuhko, mie soahng kan me kitail kak wia pwehn praktis dahme kitail sukuhliki. Ahnsou me sister kan pahn wia arail padahk kan, re kak pilada sang setting 29. Ehu rahn, kitail pahn kilang me koasoandi en Theocratic Ministry Sukuhl pahn wekila. Ke kin onop mwahu pwehn kaunopada ong Theocratic Ministry Sukuhl pwehn paiekihda ehu ehu wihk?
8 Nin duwen kaimwiseklahn padahk kasalehda, e kin kesempwal kitail en ngoangki kapwaiada atail pwukoa en padahk. Pwehki kitail mihmi ni imwin rahn akan, ahnsou kin wia mwotomwotla pwehn tuhwong oh sewese irail me kin perenki rong duwen Rongamwahu. E kin katamankin kitail me kitail ahneki pwais kaselel en wia sounpadahk kan me kin papah Siohwa.
9 E sansal mwahu me Siohwa kin kaiahne kitail pwehn koahiekla ni atail kin wia sounpadahk kan en sapwellime Mahsen. Ken nantihong doadoahngki dahme ke sukuhliki, ‘kanakanahieng pein kowe oh pil kanahieng omw padahk kan. Nantihong wiewia soahng pwukat, pwe ma ke pahn wia, ke pahn doarehla pein kowe oh pil irail kan me kin rong uhk.’—1 Tim. 4:16.
[Caption]
“En wiahla sounpadahk kan.”—Ipru 5:12