Kauwada Kingdom Hall Kapw kan Nan Ekei Sahpw akan Nan Iurop
1 Nan pahr kerendo kan, doadoahk me Sounkadehdehn Siohwa kan kin wia nan ekei sahpw kan nan Iurop, iangahki Eastern Europe, kin keinapwidi. Pali laud en ahnsou, keinapw kan me inenen kehlail. E apwal en saledek en tuhpene ong mihding kan, oh e pil apwal en imwaneki de doadoahngki wasa ieu ong Kingdom Hall pwehn kak tuhpene ong mihding kan. Ahpw, nan pahr kerendo kan, “Siohwa ketin wiadahr soahng kapwuriamwei kei rehtail; ia uwen atail peren!”—Melkahka 126:3, New World Translation.
2 Sang nan pahr 1983, uhwong laud me kohwong Sounkadehdehn Siohwa kan tepida tikitikala. Nan pahr 1989, Poland oh Hungary kihong Sounkadehdehn Siohwa kan arail manaman en saledek en wia arail kaudok. Nan pahr 1991, koperment en Russia kihong Sounkadehdehn Siohwa kan arail manaman nin duwen kosonned pwehn kak saledek en wia arail kaudok. Sangete ahnsowo lel met, doadoahk en kalohk kekeirada nan Russia oh pil nan wehi kan me mahs kin adaneki “Soviet Union.” Nanpwungen March 1996 oh October 1998, Governing Body pwungki pekipek me kohwong Branch Ohpis kan me apwalih sapwen Iurop 11 en ale neirail mwohni pwehn kak wiahda Kingdom Hall kapw 359.
3 Ni ahmw pahn kilang kilel kan me mihmi nan insert wet, ke kak medemedewe duwen soahng kapwuriamwei kan me Siohwa kin ketin wia ong sapwellime aramas akan. (Melkahka 136:4) Ke pahn perenki en rong me irail kin doadoahngki mwahu sawas en mwohni sang brother oh sister kan me kin mihmi wasa koaros nan sampah, oh met kin kasalehda me dahme Sises mahsanih nan Sohn 13:35 kin mehlel: “Pwe ihme aramas koaros pahn esehki me kumwail nei tohnpadahk, ma kumwail pahn limpoakpene.”
4 Sapwen Romania kin wia sahpw ehu nan Iurop me paiekihda koasoandi en sawas en kauwada Kingdom Hall kapw kan nan sahpw kan me anahne sawas, oh irail wiahda Kingdom Hall kapw 36 sang July 2000 lel met. Pwehki Ukraine kin doadoahngki ehute pilahn me mengei en wiahda Kingdom Hall kapw kan, ihme kahrehda irail wiahda Kingdom Hall 61 nan pahr 2001 oh pil Kingdom Hall 76 nan pahr 2002. Pwehki sawas en mwohni me irail alehdi sang Kingdom Hall Fund, irail wiahda Kingdom Hall epwiki kei nan Bulgaria, Croatia, Macedonia, Moldova, Russia, oh Yugoslavia.
5 Kauwada Kingdom Hall kapw kan nan ekei sahpw sohte kin mengei, oh irail kin doadoahk laud mwohn arail pahn kauwada Kingdom Hall. Pali laud en ahnsou, kaunopada ong wiahda Kingdom Hall pwukat kin anahne ahnsou laud. Oh pil, wiahda Kingdom Hall kan nan Iurop kin pweilaud sang wiahda Kingdom Hall nan Aperika de South America. Ahpw, pwehki aramas me men papah Siohwa kin wie tohtohla, irail anahnehte Kingdom Hall epwiki kei nan sapwen Iurop kan me anahne sawas en mwohni pwehn wiahda!
6 E inenen kapwuriamwei en kilang uwen tohto en Kingdom Hall kapw kan me irail kauwada! Nan wasa kan me irail kauwada Kingdom Hall kapw pwukat, e sansal me doadoahk en kalohk kekeirada pwehki ekspiriens mwahu tohto kin kasalehda met. Nan ekei sahpw kan, irail kaunen wehi kan inenen pwuriamweikihla duwen sawaspene en nanpwungen brother oh sister kan oh irail kin doadoahkpene pwehn idawehn kosonned kan me pid duwen kauwada ihmw kan.
7 Aiseia kohpada me kaudok mehlel pahn kekeirada nan atail ahnsou. Koht doadoahngki sapwellime soukohp men en kohpada met: “Ngehi, Siohwa, pahn kamwekid koasoandi wet en mwadang pweida ni ahnsou me konehng.” (Aiseia 60:22) Ni mehlel, sangete sounpahr eisek samwalahro lel met, e sansal me e wia sapwellimen Siohwa ahnsou ong kekeirada me wiawi nan Eastern Europe. Kitail perenki kilang me Siohwa kin kapaiada atail nannanti oh pil atail doadoahk en kamwadangala doadoahk en kauwada Kingdom Hall kan nan sahpw akan me anahne sawas en Kingdom Hall Fund! Ni ahl wet, Kingdom Hall kapw tohto pahn kohda nan sahpw akan me anahne sawas. E pahn kahrehong kaudok mehlel en kekeirada oh pweida mwahu nan Iurop oh pil “wasa koaros nan sampah.”—Wiewia 13:47.
[Kilel on page 3]
Kingdom Hall Complex, Moscow, Russia
[Kilel on page 4]
Strumica, Macedonia
[Kilel on page 4]
Daruvar, Croatia
[Kilel on page 4]
Sokal, Lviv District, Ukraine
[Kilel on page 4]
Bitola, Macedonia
[Kilels on page 4, 5]
Kingdom Hall kapw kan nan Eastern Europe
[Kilel on page 5]
Mladost, Bulgaria
[Kilel on page 5]
Plovdiv, Bulgaria
[Kilel on page 5]
Kurdzhipskoye, Maykop, Russia
[Kilel on page 5]
Bački Petrovac, Yugoslavia
[Kilel on page 6]
Tlumach, Ivano-Frankivsk District, Ukraine
[Kilel on page 6]
Rava-Ruska, Lviv District, Ukraine
[Kilel on page 6]
Stara Pazova, Yugoslavia
[Kilel on page 6]
Zenica, Bosnia oh Herzegovina
[Kilel on page 6]
Sokal, Lviv District, Ukraine
[Kilel on page 6]
Zhydachiv, Lviv District, Ukraine