Kahlemengih Sapwellimen Siohwa Irair en Kamwahu
1 Mwurin atail kin kilang kihrlahn ketipin me inenen kaselel de mwurin atail kin kang mwenge iou, kitail soh kin mwekidki met oh men kalahngankihong Siohwa soahng mwahu kan koaros me E kin ketin wia (pwe Ih me utupen soahng koaros me mwahu)? Sapwellime irair en kamwahu kin kamwekid kitail en men kahlemengih Ih. (Mel. 119:66, 68; Episos 5:1) Iaduwen kitail kak kasalehda irair en kamwahu?
2 Kasalehda Kamwahu Ong Irail Me Saikinte Iang Pwoson Mehlel: Ehu ahl me kitail kak kahlemengih sapwellimen Siohwa irair en kamwahu iei en kasalehda nsenoh mehlel ong irail me saikinte iangala pwoson mehlel. (Kalesia 6:10) Kasalehda kamwahu ni soangen ahl tohto kak kahrehong aramas akan en kilangwong Sounkadehdehn Siohwa kan iangahki doadoahk en kalohk me kitail kin wia ni ahl me mwahu.
3 Karasepe ieu, emen brother pwulopwul, me kin pioneer, awiawih nan imwen wini en arail wasa, oh e mwomwohd rehn lialaud men me mwomwen soumwahu laud sang koaros me mihmi wasao. Ni ahnsou me re likwerih brothero pwehn tuhwong toahkte, brothero padahkiong liho en wilian ih. Ehu ahnsou mwuhr, brothero pwurehng tuhwong liho nan ehu sidohwa, oh liho perenda ah kilang brothero. Mendahki mahs e sohte kin perenki rong duwen Rongamwahu, e nda me met e ese me Sounkadehdehn Siohwa kan kin inenen poakpoake mehn mparail kan. Eri, emen tepida onop Paipel rehn liho.
4 Kasalehda Kamwahu Ong Riatail Brother oh Sister kan: Kitail kak pil kahlemengih sapwellimen Siohwa irair en kamwahu ni atail kin sewese riatail brother oh sister kan. Ni ahnsoun melimel, rerrer en sahpw, lapake, kitail kak mwadang sewese riatail brother oh sister kan. Kitail kak pil kasalehda soangen ngoangohte ni ahnsou me riatail kan kin anahne mehn peidaid en iang towehda mihding kan, mwemweitla rehn irail me soumwahu oh mah kan, oh kitail pil kak katehlapala atail limpoak ong irail me kitail sohte nohn ese mwahu nan mwomwohdiso.—2 Kor. 6:11-13; Ipru 13:16.
5 Pil ehu ahl me Siohwa kin kasalehda sapwellime irair en kamwahu iei ni E kin “mwadang men mahk ong aramas akan.” (Mel. 86:5, New World Translation) Ni atail kin kahlemengih Ih, kitail anahne kasalehda atail limpoak ong sapwellime irair en kamwahu ni atail pahn mahkong meteikan. (Episos 4:32) Met kin sewese kitail en miniminiong riatail brother oh sister kan oh ahnsou pwukat pahn ‘mwahu oh kansenamwahu.’—Mel. 133:1-3.
6 Se koapworopworki me sapwellimen Siohwa irair en kamwahu me mwuledek mehlel pahn kamwekid kitail en dirkihla kaping ong Ih oh pil kitail kak ahneki peren mehlel oh met pahn kamwekid kitail en kapinga Siohwa. Oh e pil pahn kamwekid kitail en kahlemengih sapwellime kamwahu ni soahng koaros me kitail kin wia.—Mel. 145:7; Ser. 31:12.