Ngilen Koul oh Keseng me kin Kansenamwahu
1 Koul oh keseng kin wia mehkan me kesempwal oh kisehn kaudok mehlel. Nan Israel en kawao, Asap oh rie pwutak kan koulki: “Kumwail patohwan kapingkalahngan ong Kauno [“Siohwa,” NW]. . . . Kumwail koul kapikapinga Ih; kumwail lohkiseli soahng kapwuriamwei koaros me E ketin wiahda.” (1 Kronikel 16:8, 9) Rahnwet, kitail kin koul ong Siohwa ni ahnsou me kitail tuhpene ong mihding en mwomwohdiso kan wihk koaros. (Episos 5:19) Met kin wia ahnsou mwahu en kapinga mware!—Melkahka 69:30.
2 Ma kitail pahn rong Koul kan en Wehio (Kingdom Melodies), me pwihn en kesengki koul en Wehio wiahda, met kak kahrehong atail madamadau en direkihla mehkan me ngenin. Emen sister kawehwehda: “Ni ahi kin rong keseng me Society wiahda, I kin tamanda lepin lokaia kan en koulo. Met kin sewese ie en medemedewe duwen Siohwa ni ahnsou me I kin rong ngilen kesengo!”—Pilipai 4:8.
3 Ahnsou Mwahu kan en Rong Koul Pwukat: Ni ahnsou me kitail kin rong Kingdom Melodies nan imwatail, met kin kamwekid pali ngehn oh limpoak oh meleilei nan peneinei. Ehu peneinei koasoia: “Se kin rong Kingdom Melodies pak tohto nan imwat oh nan waraht sidohsa oh se sohte kin pwangahki met pwehki irail wiahda koul pwukat en kansenamwahu oh kaperen. Kingdom Melodies kin kahrehong aht peneinei pwon en ahneki meleilei ni ahnsou me se kaunopada ong mihding kan oh pil ni aht kin seiseiloak kohla ni kapokon.” Emen sister koasoia: “Ni ahnsou me I kin wia doadoahk en nan imwei, I kin rong Kingdom Melodies oh met kin sewese ie en ahneki peren—ihs me kak lemeleme I pahn peren ni ahi limilim aht likou kan? I koasoanehdi me ehu rahn ma I pahn nsensuwedki mehkot, I pahn rong koul pwukat. Koul pwukat kin inenen kaperen! . . . Koul pwukat koaros kin sewese ie en ahneki peren.” Mie ahnsou kan me koul kansenamwahu oh kaperen pwukat pahn sewese iuk?
4 Pali laud en keseng oh koul kan nan rahnpwukat kin kasalehda ngenin sampah. Pahpa oh nohno kan kak sewese neirail seri kan en perenki rong soangen koul akan me kin konehng Kristian ni arail kin doadoahngki mwahu Kingdom Melodies. Irail me tohto me kin onop Paipel rehtail oh aramas teikan me kin perenki rong pahn perenki ese me keseng oh koul pwukat kin kapinga Siohwa oh kin kansenamwahu ong kitail.—Melkahka 47:1, 2, 6, 7.