Ministerial Training School—Ahl Mwahu me Kin Ritingadahng Brother kan Soangen Elen Pwukoa Tohto
1 Siohwa doadoahngki soukohp Seremaia en kohpada met: “I pahn idihada sounsilepen sihpw kan me pahn apwalih nei aramas akan; oh nei aramas akan solahr pahn perki de masak mehkot, oh sohte emen rehrail pahn salongala.” (Seremaia 23:4, NW) Doadoahk en apwalih sapwellimen Siohwa sihpw kin wiwiawi wasa koaros nan sampah. Irail me wia elder kan nan mwomwohdiso kin wia doadoahk wet. Oh pil, irail mwahnakapw pwulopwul tohto me rasehng pwoaik en menseng kin kihong arail ahnsou oh doadoahk ong Siohwa. (Melkahka 110:3) Ia uwen kapai laud brother pwukat kin wia nan mwomwohdiso kan me audaudki sapwellimen Koht aramas akan! Pwehki kihkihpenehn aramas kan me nsenohki arail pali ngehn wiwiawihte, miehte anahnepen irail brother pwukat me men toukihda arail ahnsou pwehn papah riarail teikan.
2 Ehu koasoandi me sawas laud pwehn kasukuhlih elder kan oh ministerial servant kan me kiripw ong kalaudehla arail pwukoah nan mwomwohdiso iei Ministerial Training School. Irail tohnsukuhl 22,000 samwa me kohsang sahpw 140 alehdier kasukuhl wet nan pwihn en sukuhl 999 me wiawi sangehr pahr 1987. Ong brother pwukat, sukuhl wet kin wia “ahl mwahu me kin ritingada ong irail soangen elen pwukoah tohto.”—1 Kor. 16:9.
3 Kahrepen Sukuhlo: Kahrepen Ministerial Training School iei en kaiahne oh kasukuhlih ohl akan me kakong pwukoa kan en koahiekla pwehn kak sewese sohte lipilipil mwomwohdiso kan me anahne sawas. Sukuhl wet kin kalaudehla arail koahiek en tiengala mwowe nan doadoahk en kalohk, apwalih sapwellimen Siohwa aramas akan, oh padahk nan mwomwohdiso. Mwurin arail kesepwil, ekei tohnsukuhl pahn ale arail pwukoa kesempwal en wiahla Special Pioneer kan de Sounapwalih en Circuit kan de Sounapwalih en District kan nan pein sapwarail de nan sahpw liki kan. Ekei irail kin ale pwukoa en mihmihte rehn pein arail mwomwohdiso de nan wasa kan me anahne sawas pahnangin pein arail Branch Ohpis.
4 Erein wihk waluh me sukuhlo pahn wiawi, tohnsukuhl kan kin ale sukuhl laud en Pwuhk Sarawi. Irail kin, ni oaritik, ale kasukuhl laud en padahk kan en Paipel oh pil arail pwukoa kan en sounsilepe kei oh sawas kan me re kin anahne ong kahpwal kan me Kristian kan kin lelohng. Irail pil sukuhliki dahme Paipel kin kasalehda duwen soangsoangen koasoandi kan: duwehte kopwung kan oh ire kan me pid apwalih pwihn en Siohwa. Irail kin ale kasukuhl tohrohr ong wia padahk en wehi pokon oh sawas teikan kin kohwong irail pwehn sewese irail en kekeirada ni pali ngehn.
5 Anahn akan: Pwehn iang sukuhl wet, irair akan me emen anahne ahneki inenen laud. Irail me pilahn en iang sukuhl wet oh kapedolong neirail application anahne wia emen elder de ministerial servant sounpahr riau de dauli. Irail me kapedolong neirail application kin kiripw oh irail mihmi nanpwungen sounpahr 23 oh 50. Brother kan me kin kapedolong neirail application anahne ese wadawad, nting oh lokaiahki lokaia me pahn wiawi nan sukuhlo, oh pil irail anahne ahneki roson mwahu oh sohte pahn anahne wia ehu soangen koasoandi en mwenge. E pahn mwahu ma irail me kapedolong neirail application wia doadoahk en Regular Pioneer.
6 Irail me men iang sukuhlo kin inengieng en men papah sohte lipilipil wasa me anahn ren kohla ie. Ma emen brother men ahneki pwukoa wet, e anahne ahneki soangen madamadau me soukohp Aiseia ahneki, me kasalehda me e perenki ale doadoahk tohrohr ehu, oh mahsanih: “Iet ngehi, Maing! Komw ketin kadariehla.” (Aiseia 6:8) Aiseia pil kasalehda lamalam aktikitik erein ah mour. Brother kan me kapedolong neirail application en iang Ministerial Training School kin mwekidki limpoak ong riarail brother oh sister kan nan mwomwohdiso oh irail kin ahneki ineng en papah irail ah kaidehn ineng en men ale pwukoa pwe dene re mwahu sang meteikan. Mwurin arail ale kasukuhl tohrohr wet, irail tohnsukuhl akan anahne doadoahngki dahme re sukuhliki pwehn sewese meteikan.—Luk 12:48.
7 Kapai kan: Erein wihk waluh me kasukuhl tohrohr wet wiwiawi, tohnsukuhl kan kin “katungoalehki pali ngehnarail mahsen kan en pwoson oh padahk mehlel.” (1 Tim. 4:6) Met pil kin sewese irail en koahiekla ni arail kin sewese oh kangoange meteikan nan mwomwohdiso kan me irail pahn kohla ie. Nan mwomwohdiso tohto me irail tohnsukuhl en Ministerial Training School kin mihmi ie, doadoahk en kalohk kin lalaudla; kangoang kin kohwong koaros pwe ren iang doadoahk en pioneer, keieu laud kangoang kin kohwong irail me pwulopwul kan; oh petehk mwahu kin kohwong irail me kapw kan me ahpwtehn tepida iangala sapwellimen Koht aramas akan.
8 Iaduwen—ke wia emen elder de ministerial servant me kiripw oh ahmw sounpahr nanpwungen sounpahr 23 oh 50? Ke soh iang kapedolong noumw application en iang towehda Ministerial Training School? Ke kin wia emen brother pwulopwul me kin medemedewe duwen ahmw mehn akadei kan nan doadoahk en papah Siohwa? Dahme ke soh kihsang ahmw mour soahng soh katepe kan pwe ken kak pedolong nan “ahl mwahu me kin ritingadahng brother kan soangen elen pwukoa tohto”? E kak kihong uhk peren oh nsenamwahu. Ehi, Ministerial Training School kin wia kaidehn ihte kapai ong tohnsukuhl kante ahpw pil ong mwomwohdiso kan en sapwellimen Koht aramas akan wasa koaros nan sampah.
[Kaokon nan Pali 3]
Iaduwen Arail Paiekihda Kasukuhl en MTS
“Kasukuhlo uhdahn kamwahuwihala ahi doadoahk en kalohk oh koahiek en wia sounapwalih men me ahneki erpit, ni ahi doadoahngki iren Paipel kan.”
“Sukuhl wet kihong ie kehl en apwalih soangsoangen pwukoa kan nan mwomwohdiso.”
“E wekidala kereniong soahng koaros nan ahi mour, iangahki ahi pepehm kan duwen kaundahn Koht oh sapwellime koasoandi kan oh sapwellime pwihn.”
“Kasukuhl me I ale sewese ie en wehwehki duwen anahn en kihda ahi sawas nan wasa sohte lipilipil me anahne sawas.”