Koakon En Peidek

◼ Ahl dahieu me keieu mwahu ong kihda sawas ong riatail brother oh sister kan me arail anahn laud nan sahpw teikan?

Ekei pak, kitail kin rong duwen riatail brother oh sister kan nan sahpw teikan me anahne sawas pwehki irail lelohng kalokolok, melimel, lapake, rerrer en sahpw de apwal teikan. Ekei riatail eri kadarala arail sawas en mwohni ong Branch Ohpis en sahpw pwukat, oh re kin peki ma mwohni ko kak sewese aramas menet, de mwomwohdiso ehu, de koasoandi en wiahda Kingdom Hall de imwen kapokon ehu.​—2 Kor. 8:​1-4.

Mehlel, soangen limpoak ong riatail pwukat me mwahu, ahpw pali laud en ahnsou, mie anahn akan me kesempwal sang dahme irail pwukat medemedewe. Ekei ahnsou, miehr me sewese apwal en aramaso de mwomwohdiso me anahn. Ni mehlel, kitail kak kamehlele me sawas me kitail kin kadarala ong pein atail Branch Ohpis ong doadoahk en kalohk me kin wiawi wasa koaros nan sampah, oh sawas kan ong Kingdom Hall Fund de “Disaster Relief” (sawas ong irail me lelohng melimel, rerrer en sahpw, lapake, de soangen apwal pwukat), sawas pwukat pahn kohwong wasa kan me mwohni kileledi en kohwong.

Brother kan nan Branch Ohpis kan koaroa alehier kasukuhl mwahu en ese dahme re pahn mwadang wia ong ahnsoun anahn en riatail kin pwarada. Branch Ohpis kan kin ahnsou koaros kehsehki Governing Body duwen anahn akan. Ma mie anahn me laud, Governing Body kin pekihda ma Branch kan me karanih wasao me anahn mie en kihda sawas de poasen kaun en Society kin kak kadaralahng wasao me anahn sawas en mwohni.​—2 Kor. 8:​14, 15.

Kahrehda, sawas koaros me kin kohwong doadoahk en kalohk nan sampah pwon, kauwada ihmw sarawi kan nan sahpw teikan, de sewese riatail kan ni ahnsoun apwal (melimel, rerrer en sahpw, lapake, de soahng pwukat) anahne pekederala rehn Branch Ohpis nan sahpw me ke kin kousoan loale de ken kihda ahmw sawas nan pein ahmw mwomwohdiso. Ni ahl wet, pwihn en “ladu lelepek oh loalokong,” sang ni koasoandi kan me Governing Body wiadahr, pahn kak apwalih anahn en riatail kan koaros nan sampah pwon ni ahl me keieu konehng.​—Madiu 24:45-​47; 1 Kor. 14:33, 40.