Mehn Kadehde me Sohte Kin Lokaia
1 Sapwellimen Siohwa kapikipikda kan, mendahki irail sohte kak lokaia, ahpw irail kin kak kasalehda laud duwen sapwellimen Siohwa irair kan. (Melkahka 19:1-3; Rom 1:20) Pil duwehte met, atail wiewia mwahu kan, atail kasalehda irair en Kristian, oh atail doadoahngki likou oh kapwat me konehng Kristian—soahng pwukat koaros kin wia mehn kadehde mwahu me sohte kin lokaia. (1 Piter 2:12; 3:1-4) E kesempwal kitail koaros en “kalinganahda padahk mehlel en atail Sounkomour, Koht, ni soahng koaros” oh met pahn sansal sang atail wiewia kan.—Taitus 2:10.
2 Iaduwen aramas soh unsek arail kak kalinganahda padahk mehlel sang Paipel? Met pahn kak wiawi ihte ma sang ni kaweid en Mahsen en Koht oh manaman en ngehn sarawi. (Melkahka 119:105; 143:10) “Mahsen en Koht wie momour oh manaman, e keng sang kedlahs me au riau.” (Ipru 4:12) E kin lelohng loalatail oh e kin sewese kitail en pwuhriong nan likoun mour kapw en aramas kapw. (Kolose 3:9, 10) Ngehn sarawi kin sewese kitail en kasalehda irair mwahu kan, duwehte kadek, kamwahu, mpahi, oh kanengamah. (Kalesia 5:22, 23) Kitail kin mweidohng manaman en Mahsen en Koht oh ngehn sarawi en doadoahk nan atail mour?—Episos 4:30; 1 Deselonika 2:13.
3 Meteikan Kin Tehk Atail Wiewia kan: Ni ahnsou me kitail kin nantihong idawehn sapwellimen Siohwa koasoandi kan oh kasalehda sapwellime irair kan, meteikan kin tetehk atail wiewia kan. Karasepe, emen ohl kin ale kapailok sang ienge tohndoadoahk kan pwehki e mwotomwot. Emen sister me kin doadoahk nan ohpisohte kin ahnsou koaros kasalehiong ih wahu oh kadek. Met kamwekid ih en idek rehn sistero dahme kahrehda e weksang meteikan. Sistero kasalehda me ah doadoahngki kaweid sang Paipel me kin sewese ih en kasalehda wahu ong aramas teikan. E pil padahkiong ih duwen koapworopwor kaselel me e ahneki me pid Wehin Koht. Ohlo tepida onop Paipel oh mwuhr e inoukihong Siohwa ah mour oh papidaisla. Ni ahnsou me e pwurala uhdakeo, ah peneinei pwuriamweikihla ah tiahk mwahu, oh ekei irail pil iangala padahk mehlel.
4 Nan wasahn doadoahk, nan wasahn sukuhl, oh pil ni ahnsou me kitail kin kalohk ong atail peneinei oh mehn mpatail kan, kitail kak kapinga Siohwa ni atail kalohk iangahki atail wiewia mwahu kan.—Madiu 5:16.