Ke Kin Idek Ma Mie Aramas me Men Onop?

Ma ke kin onop Paipel rehn aramas emen, a ke sou idek reh ma mie kompoakepah, ah peneinei, de aramas me e kin ese me pahn pil perenki sukuhliki dahme Paipel kin padahki? Pak tohto, irail pahn kihong uhk ahd ekei. Ni ahmw pahn ale mweimwei sang aramaso me ke onop reh, ke kak kohla oh tuhwong irail me e nda ko oh nda eden ahmw Paipel Study [tohnsukuhlo] oh idek rehn aramas ko ma re pil men onop Paipel. Ke kak nda, “[Eden tohnsukuhlo] kin perenki onop Paipel, oh e lemeleme me ke pahn pil perenki paiekihda sang aht koasoandi en onop Paipel ni soh isepe.” Eri, ni mwotomwot kasalehiong ih iaduwen atail kin onop Paipel ni atail kin doadoahngki pwuhken Loalokong de pwuhken Mour Kohkohlahte.

Ma mie aramas emen me ke onop Paipel reh me kin kekeirada mwahu ni pali ngehn, ke kak kangoange ih en kawehwehiong kompoakepah kan oh ah peneinei kan me mwein pahn pil kak perenki onop nin duwen koasoandi en onopo. E kak luhke irail en iang ih onop. Ahpw, ma met sohte kak wiawi, e kak koasoanehdi ken tuhwong irail oh padahkiong irail duwen koasoandi en onop. Ni ahmw pahn wia met, e pahn kak kangoange tohnsukuhlo en tepida ehukihong meteikan duwen loalokong pwung en Paipel.

Irail akan me ke kin kalap return visit rehrail kak pil kihong uhk eden irail aramas me pahn perenki onop Paipel, mendahte ma pein irail saikinte onop Paipel. Ni ahmw pahn kihong ih pwuhken Loalokong de pwuhken Mour Kohkohlahte, ke kak idek reh, “Mie me ke ese me pahn pil perenki ale nah soangen pwuhk wet?”

Ni atail pahn tehk duwen karuwaru en atail ahnsou, kitail men kilangada soangen elen koasoiong aramas koaros me pahn perenki rong Rongamwahu. Ke kin idek ma mie aramas me men onop?