Kasalehda Atail Nsenohki Aramas—Sang ni Atail kin Kapinga Irail
1 Kaping mehlel kin kangoange aramas, kamwekid irail, oh wahdohng irail peren. Sounkalohk tohto diarada me lokaiahn kaping mehlel ehu, mehnda ma mwotomwot, kin kalapw sewese emen en men rong kitail nan kalohk. Iaduwen atail kak kapinga aramas akan ni atail pahn ehukihong irail Rongamwahu en Wehio?
2 Kin Tehk Wasa: Sises me ketier nan sapwellime lingan kin tehk duwen wiewia mwahu kan en mwomwohdiso isuh nan Asia Minor. (Kaudiahl 2:2, 3, 13, 19; 3:8) Ni soangen mwomw wette, ma kitail pahn kin nsenohki mehlel irail aramas akan me kitail tuhwong nan kalohk eri, met pahn kamwekid kitail en rapahki ahnsou mwahu kan en kihda kaping. Karasepe, kitail kak kapinga aramas pwehki likin imwarail kan a mwakelekel, oh kitail kak kapinga nohno de pahpa men me kin kasalehda kadek oh limpoak ohng neirail seri kan, de kapinga ahn tohnihmwo me kin kasalehda kadek oh rahnmwahu, soahng pwukat koaros me kin kihong kitail ahnsou mwahu en kihda kaping. Ke kin tetehk oh isaneki ahnsou mwahu en soangen ahnsou pwukat?
3 Wia Sounrongorong Mwahu: Ni ahmw kalohk ohng aramas, luhke oh kangoange irail en kasalehda arail pepehm kan sang ni ahmw pahn idek rehrail peidek konehng kan. Kasalehda wahu ohng irail ni ahmw pahn rong kanahieng dahme irail koasoia. (Rom 12:10) Mwein ele ke pahn kak diar mehkot me pahn kahrehiong ahmw pahn kak kihda kaping mehlel oh ke pahn pil kak koasoia mehkot me kumwa koaros wehwehkihpene.
4 Doadoahngki Ahmw Koahiek en Madamadau: Dahme kitail en wia ma tohnihmwo nda mehkot me sohte pwungiong padahk mehlel en Paipel? Ke dehr nantihong kasalehda ni ahnsowohte, me tohnihmwo sapwung, ahpw ke kak kasalehda me ke wehwehki dahme e koasoia oh kowe eri kasalehiong ih dahme ke men padahkiong ih ni ahmw pahn nda: “I kak kilang me komw kin madamadau laud ki ire wet.” (Kolose 4:6) Mehnda ma aramaso kin akamai, ke kak kihda kaping ohng ah kasalehda duwen ah madamadau mehlel ohng ireo. Soangen wiewia en kadek wet kak kameleileidi aramaso me kin uhwong laud Rongamwahu en Wehio.—Lepin Padahk 25:15.
5 Pwe kitail en kin kak kihda mehn kangoang kan, atail kaping kan anahne en kin mehlel. Doadoahngki soangen lokaia en kangoang pwukat pahn kin kawauwih Siohwa oh kak kahrehiong aramas akan en pil men rong Rongamwahu en Wehio.