Kasalehda Atail Nsenohki Aramas—Tehk Kanahieng Dahme Irail Kin Perenki
1 Siohwa Koht oh Sises Krais kin ahnsou koaros tehk kanahieng anahn en meteikan oh ketikihong irail sawas. (2 Kron. 16:9; Mark 6:34) Ni atail kin kilangada anahn en aramas me kitail tuhwong nan kalohk, oh esehda dahme irail kin pwunodki, kitail kak koasoanehdi atail padahk kan en sair arail mohngiong.
2 Tehk Kanahieng Soahng Koaros: Sises kin tehk kanahieng soahng koaros. (Mark 12:41-43; Luk 19:1-6) Pil duwehte kitail, ni atail kin kalohk, e pahn mwahu en tehk kanahieng duwen dahme mihmi likin imwen tohnihmwo, duwehte kilel sarawi kan, nting kan de kilel kan ni wararail sidohsa kan, de mehn mwadong kan me mih likin imwarail. Ni ahnsou me kitail kilang soahng pwukat, e pahn kak sewese kitail en medemedewe dahme kitail pahn koasoia nan atail padahk.
3 Pohn mesen aramas emen oh pil ah mwekid kan kak kasalehda soangen pepehm kan me e ahneki. (Lep. Pad. 15:13) Mwein ele tohn ah peneinei de kompoakepah ahpwtehn mehla de pil ehu irair kansensuwed lelohng ih me kak kahrehong en anahne sawas en kamweit. Mwein e pahn kalahnganki ahmw ehukihong ih iren Paipel kan. (Lep. Pad. 16:24) Iaduwen—tohnihmwo karuwaru pedoi sang imweo de e kolokol seri men me wie sengiseng? Ma iei, e pahn mwahu en pwurala reh ehu ahnsou. Ni atail pahn kasalehda limpoak oh “nsenohki pepehm en meteikan,” kitail pahn kamwekid aramaso en perenki rong ahnsou me kitail pahn pwurehng pwurala.—1 Piter 3:8, NW.
4 Kawekila Ahmw Padahk: Wahnpoaron Pohl kilang me mie pei sarawi nan Adens me nting pwukat mi powe “Ong Koht emen me Sohte Me Ese.” Mwekid wet wekidala mwomwen ahn Pohl kasalehda rongamwahu ni e mahsanih: “Kumwail sohte kin ese duwen me kumwail kin kaudokiong, ahpw iei ih me I pahn kasalehiong kumwail met.” Pohl kawehwe ong irail ni ahl kadek, met kamwekid ekei irail en medemedewe duwen Rongamwahuo oh ekei irail kamehlele oh pwosonla.—Wiewia 17:23, 34.
5 Ni soangen mwomwohte, atail pahn tehk dahme aramas kin nsenohki pahn sewese kitail en kawekila atail padahk pwehn kak en sewese irail. Doadoahngki peidek kan me pahn kahrehiong tohnihmwo en kasalehda ah lamalam. Medemedewe mehnia iren Paipel kan me ke kak doadoahngki pwehn kalaudehla en tohnihmwo ah perenki rong. (Lep. Pad. 20:5) Atail tehk kanahieng soahng koaros oh kasalehda me kitail nsenohki meteikan pahn sewese kitail en kalohki Rongamwahu ni ahl me pahn keieu pweida mwahu.