Sewese Aramas Ren ‘Pirida Sang Arail Meir’
“Kumwail ese me iei ahnsowo met: ahnsou me kumwail pahn pirida sang amwail meir.”—ROM 13:11.
KE KAK KAWEHWEHDA?
Dahme kahrehda e inenen kesempwal Kristian akan ren pepehd me pid wia kupwuren Koht?
Dahme kahrehda kitail anahne mwasamwasahn oh rong kanahieng nan atail kalohk?
Dahme kahrehda kitail anahne kasalehda kadek nan atail kalohk?
1, 2. Ni ahl dahieu me aramas tohto anahne pirida?
SOUNPAR koaros, aramas kid kei kin mehla pwehki re kin men meirla de re kin meirla ni arail tangatangahki sidohsa. Ekei sohla doadoahk pwehki re sohte kin pirida mwadang en kohla doadoahk de re kin meirla ni ahnsoun doadoahk. Ahpw mie soangen meir ehu me keper sang met. Iei meir me pid wia kupwuren Koht. Paipel kaweidkin kitail duwen soangen meir wet ni eh mahsanih: “Meid pai me kin pepehd oh mwasamwasahn.”—Kaud. 16:14-16.
2 Ni Armakedon eh kerekerendohr, aramas tohto kin memeir ni karasaras. Pil ekei kaun en pelien lamalam en Kristian likamw kan kin nda me tohn arail sarawi ko kin wie memeir. Ia duwen emen eh kak meir me pid wia kupwuren Koht? Dahme kahrehda e kesempwal Kristian akan en pepehd? Ia duwen atail kak sewese meteikan ren pirida sang soangen meir wet?
IA DUWEN EMEN EH KAK MEIR ME PID WIA KUPWUREN KOHT?
3. Ia duwen omw kak kawehwehda emen me kin memeir me pid wia kupwuren Koht?
3 Aramas me wie memeir kin kalapw sohte mwekid. Ahpw, irail akan me kin meir me pid wia kupwuren Koht kak uhdahn soupisek, ahpw re sohte kin soupisengki mehkan me kak sewese irail ren ahneki nanpwungmwahu rehn Koht. Mwein re kin medemedewehte en wia arail pwukoa en ehuehu rahn de re kin wia soahng koaros me re kak wia pwehn ahneki nsenamwahu, ndand de mwohni. Re kin uhdahn kedirepwkihla soahng pwukat kahrehda re sohte nohn kasalehda me re nsenohki arail nanpwungmwahu rehn Koht. Ahpw irail akan me kin pepehd me pid wia kupwuren Koht kin wehwehki me re momour “ni imwin ahnsou kan,” eri irail kin pwerisek wia kupwuren Koht ni uwen arail kak.—2 Pit. 3:3, 4; Luk 21:34-36.
4. Ia mouren ahn Pohl kaweid ni eh nda: “Kitail dehr memeir duwehte meteikan”?
4 Wadek 1 Deselonika 5:4-8. Wahnpoaron Pohl ntingihedi duwen aramas akan me kin mi nan irair ehu me duwehte meir. Re sehse ia uwen kesempwal en wia dahme Siohwa ketin mahsanih me pwung oh liksang dahme e ketin mahsanih me sapwung. Re pil sehse me sapwellimen Siohwa ahnsou en kasorehla me suwed kan kerendohr. Pohl kaweidki Kristian akan: “Kitail dehr memeir duwehte meteikan.” Kitail anahne kanahieng pwe irail akan me memeir ren dehr kamwakid kitail en ahneki arail madamadau oh mwekid duwehte irail.
5. Soangen madamadau dahkei me kin kasalehda irail kan me kin memeir me pid wia kupwuren Koht?
5 Ekei aramas kin medewe me sohte Koht me pahn ketin kadeik arail wiewia kan. (Mel. 53:1) Ekei kin medewe me Koht sohte kin ketin nsenohki kitail, eri kitail pil sohte anahne nsenohkin ih. Oh pil ekei kin medewe ma re wia kisehn ehu pelien lamalam, met pahn kahrehiong irail ren kompoakepahnki Koht. Aramas pwukat koaros kin memeir me pid wia kupwuren Koht, oh re anahne pirida. Ia duwen atail kak sewese irail?
PEIN KITAIL ANAHNE PEPEHD
6. Dahme kahrehda kitail anahne pepehd?
6 Kitail kak sewese meteikan ren pirida ihte ma pein kitail kin pepehd. Eri ia duwen atail kak pepehd? Kitail anahne liksang wiewiahn irail kan me wie memeir me pid wia kupwuren Koht. Paipel mahsanih me soangen aramas pwukat kin wia “wiewiahn rotorot akan.” Soangen wiewia pwukat iangahki kamadipw kan me sohte konehng, kamamsakau, wia nsenen pwopwoud rehn emen me kaidehn arail pwoud, tiahk kanamenek kan, pei oh peirin. (Wadek Rom 13:11-14.) E kin uhdahn apwal en liksang soangen wiewia pwukat. Kitail anahne mwasamwasahn. Emen me tangahki sidohsa anahne tamataman me ma e meirla, e kakete mehla. Eri, ia uwen kesempwal Kristian emen eh anahne tamataman ahnsou koaros me eh meirla me pid wia kupwuren Koht kak kahrehda mehla!
7. Dahme kak wiawihong kitail ma kitail ahneki madamadau sapwung duwen aramas akan nan atail wasahn kalohk?
7 Karasepe, mwein kitail kak tepida meirla me pid wia kupwuren Koht ma kitail tepida medewe me koaros nan atail wasahn kalohk soikalahr rongamwahwo oh sohte pahn wekila. (Lep. Pad. 6:10, 11) Mwein kitail kak medewe, “Ma sohte emen pahn perenki rongamwahwo, ia kahrepen atail anahne nantihong sewese aramas akan?” Mehlel me tohto sohte kin perenki rong ahnsou wet, ahpw mehkot nan arail mour kak wekila oh re kak tepida wekidala arail madamadau. Ekei kin pirida oh pwungkihla rongamwahwo. Oh kitail kak sewese irail ma pein kitail kin pepehd. Kitail kak wia met sang ni atail pahn song wiepe kapw kan pwehn wiahiong atail padahk duwen Wehio en kaperen ong aramas akan. Pwe kitail en pepehd, kitail anahne tamataman kahrepen atail kalohk eh inenen kesempwal.
DAHME KAHREHDA ATAIL KALOHK INENEN KESEMPWAL?
8. Dahme kahrehda atail kalohk inenen kesempwal?
8 Ahnsou koaros tamataman me mehnda ma aramas akan sohte men rong, atail kalohk kin kawauwih Siohwa. Oh e pil kin ketin doadoahngki doadoahk en kalohk pwehn kapwaiada kupwure kan. Kereniong Koht pahn ketin kadeikada aramas akan duwen arail kin mwekidki atail kalohk. Irail akan me sohte pwungki rongamwahwo pahn kasohrala. (2 Des. 1:8, 9) E pahn sapwung en medewe me kitail sohte anahne nantihong wia doadoahk en kalohk pwehki “e pahn mie kaiasada ong me pwung kan oh me sapwung kan.” (Wiewia 24:15, NW) Kitail sukuhlkier sang Mahsen en Koht me irail me ale kadeik nin duwen “kuht kan” pahn kasohrala soutuk. Atail kin kalohk kin kasalehda sapwellimen Koht mahk kalahngan pwehki e kin kihong aramas akan ahnsou mwahu en wekila oh ahneki mour soutuk. (Mad. 25:32, 41, 46; Rom 10:13-15) Ma kitail sohte kalohk, a ia duwen aramas akan ar pahn ahneki ahnsou mwahu en rong rongamwahwo me kak doarehla arail mour?
9. Ia duwen doadoahk en kalohk eh kin wia kamwahu ong uhk oh pil meteikan?
9 Atail kin kalohki rongamwahwo pil kin wia kamwahupatail. (Wadek 1 Timoty 4:16.) Ke pahn pwungki me omw kin koasoia duwen Siohwa oh Wehio kin kakehlaka omw pwoson oh omw limpoak ong ih. E pil kin seweseiuk ken kamwahwihala omw irair en Kristian kan. Ke pil kin nsenamwahu ni omw kasalehda omw limpoak ong Koht sang ni omw kin kalohk. Me tohto me kin padahkihong meteikan padahk mehlel kin perenki kilang sapwellimen Koht manaman eh kin sewese neirail tohnsukuhl kan arail kin kamwahwihala arail mour.
SOUNKALOHK MWAHU KAN KIN MWASAMWASAHN
10, 11. (a) Ia duwen Sises oh Pohl ara mwasamwasahn anahn en meteikan? (b) Ia duwen atail kak mwasamwasahn nan kalohk?
10 Mie soangsoangen ahl akan me kitail kak wiahiong atail kalohki rongamwahwo en kaperen ong aramas akan. Eri kitail anahne mwasamwasahn nan atail doadoahk en kalohk. Sises ketikihda mehn kahlemeng mwahu. Pwehki Sises eh unsek, e mwahngih me Parisio lingeringer mehnda ohl menet sohte nda mehkot. Sises pil mwahngih me lih dipan men koluhlahr oh liohdi men kihda soahng koaros me e ahneki. (Luk 7:37-50; 21:1-4) Sises kak ketin sewese aramas akan pwehki e mwahngih dahme re anahne. Ahpw kitail sohte anahne wia aramas unsek men pwehn tehk anahn en meteikan. Wahnpoaron Pohl wia mehn kahlemeng mwahu duwen met. E kin kalohk ni soangsoangen ahl akan pwe en kak sewese soangsoangen aramas akan.—Wiewia 17:22, 23, 34; 1 Kor. 9:19-23.
11 Ma kitail kin mwasamwasahn oh tehk dahme aramas akan anahne duwehte Sises oh Pohl, kitail pahn ese ia duwen atail kak kamwakid irail pwe ren perenki rong. Karasepe, ni omw pahn koasoiong meteikan, song tehk ma mie mehkot me kak kasalehiong uhk duwen arail tiahk, dahme re kin perenki, ma re kiripw, pwopwoud de naineki seri kan. Tehk dahme re wiewia ahnsowo oh mwein nda mehkot duwen mwo ni wahu ni omw tepida koasoi.
12. Ni atail wia doadoahk en kalohk, dahme kitail anahne tamataman duwen atail koasoi?
12 Ma kitail kin mwasamwasahn nan kalohk, kitail sohte pahn mweidohng soahng teikan en kauwehla atail kalohk. Mehnda ma kitail koasokoasoia soahng kangoang kan rehn sounkalohk teikan, kitail anahne tamataman me kahrepen atail doadoahko iei en kalohk ong meteikan. (Ekl. 3:1, 7) Eri kitail anahne kanahieng pwe atail koasoakoasoi en dehr kauwehla atail kalohk. Ehu ahl mwahu en medemedewehte duwen doadoahk en kalohk iei en koasoia dahme kitail pahn koasoiaiong tohnihmw kan. Oh mehnda ma neitail cell phone kak sawas nan doadoahk en kalohk, kitail anahne kanahieng pwe en dehr kedirepwe atail koasoakoasoiong tohnihmw kan.
RONG MWAHU OH KASALEHDA OMW NSENOHKI IRAIL ME KE TUHWONG
13, 14. (a) Dahme kak sewese kitail en ese dahme aramas men kin perenki? (b) Ni ahl dah kei kitail kak tapihada atail koasoi nan kalohk?
13 E kesempwal ken rong kanahieng irail kan me ke kin tuhwong nan kalohk. Soangen peidek dah kan me ke kak idek rehn aramas akan nan omw wasahn kalohk pwe irail en ndahng uhk dahme re kin medewe? Re kin pwunodki duwen tohtohlahn soangsoangen pelien lamalam kan, tiahk lemei nan arail wasa de koperment kan arail sohte kin pweida? Ke kak sewese ekei ren sukuhlki duwen Koht sang ni omw pahn koasoia duwen kepikipik kan arail wiawihda ni ahl kaselel kan de ia duwen Paipel eh kin kihda kaweid mwahu kan? Kapakap kin wia mehkot me pali laud en aramas akan me kohsang soangsoangen sahpw kan kin men ese, iangahki aramas akan me sohte kin kamehlele Koht. Me tohto kin men ese ma mie me kin rong arail kapakap kan. Ekei ele men ese pasapengpen peidek pwukat: Ia duwe, Koht kin ketin karonge kapakap kan koaros? Ma e sohte kin ketin karonge ekei kapakap kan, eri dahme kitail anahne wia pwe Koht en ketin karonge atail kapakap kan?
14 Kitail kak esehla ia duwen atail pahn tapiada atail koasoi sang irail kan me koahiek nan kalohk. Tehk ia duwen arail kin wia peidek kan ahpw sohte kin kahrehiong tohnihmwo en soansuwedda. Pil tehk ia duwen ngilarail oh meserail ar kin kasalehda me re kin songosong en wehwehki madamadau en tohnihmwo.—Lep. Pad. 15:13.
EN KADEK OH KOAHIEK PWEHN SEWESE METEIKAN REN PIRIDA
15. Dahme kahrehda kitail anahne kadek ni atail kin wia doadoahk en kalohk?
15 Ke mwahuki aramas en panginuhkada ni omw memeir kelik? Me tohto sohte kin perenki ni emen eh mwadang panginirailda. Pali laud kin perenki ma emen pahn panginirailda ni kadek. Met pil duwehte ni omw kin song panginda aramas akan sang arail meir ni karasaras. Karasepe, dahme ke anahne wia ma emen lingeringerda ni omw tuhwong ih nan kalohk? Ken kadek oh kasalehda me ke wauneki eh pepehm. Kowe eri kalahngankihong eh kasalehda eh pepehm ni mehlel oh kohkohla. (Lep. Pad. 15:1; 17:14; 2 Tim. 2:24) Ma ke kadek ong ih ni ahnsowo, mwein e sohte pahn lingeringer ni emen sounkalohk eh pahn tuhwong ih mwuhr.
16, 17. Ia duwen atail kak wiahda pilipil mwahu nan atail kalohk?
16 Ekei pak kitail kak pousehlahte koasoakoasoi mehnda ma tohnihmwo nda me e sohte perenki rong de mie pein eh pelien lamalam. Mwein e nda met pwehki ih me mengei en kauhdi koasoio. Ahpw ni koahiek oh kadek, mwein ke kak kihda ehu peidek mwahu me pahn sewese tohnihmwo en men rong dahme Paipel mahsanih.—Wadek Kolose 4:6.
17 Ekei pak ni atail kin tuhwong aramas akan me pehm me re nohn kedirepw en rong, e keieu mwahu en kasalehda wahu oh kohkohla. A ekei pak, mwehin ke pehm me ke kak koasoia mehkot me kak kamwakid irail ni mwotomwot. Karasepe, ekei kin koahiekla en doadoahngki iren Paipel ehu mwotomwot sang minit ehu. Re kin wadek iren Paipel ehu, oh mwohn ar kohkohla, re kin kihda ehu peidek rehn tohnihmwo me re pahn sapengala ehu ahnsou tohrohr. Soangen padahk mwotomwot wet kin ekei pak uhdahn pweida mwahu, kahrehda tohnihmwo kin pilada me e sohte nohn kedirepw ren koasoipene ni mwotomwot. Mwein ke kak song wia met ni omw pahn tuhwong soangen aramas pwukat.
18. Dahme kitail kak wia pwehn koahiekla kalohk ni ahnsou sohte lipilipil?
18 Ma kitail kin kaunopada en kalohk ni ahnsou sohte lipilipil, kitail kak sewese aramas akan me kitail kin tuhwong rahn koaros pwe ren men esehla duwen Koht. Tohto riatail Kristian akan kin weuwa ekei doaropwe de pwuhk kan nan arail pwekid de kopwou kan. Ele re pil onopadahr ren wadek iren Paipel ehu ma re diar ahnsou mwahu. Ke kak peki rehn sounapwalih en kalohk de pioneer kan nan omw mwomwohdiso ren sewese iuk ken kaunopada kalohk ong ahnsou sohte lipilipil.
SEWESE NI KADEK KISEHMW KAN REN PIRIDA
19. Dahme kahrehda kitail anahne songosong sewese kisehtail kan?
19 Kitail koaros men sewese kisehtail kan ren alehda rongamwahwo. (Sos. 2:13; Wiewia 10:24, 48; 16:31, 32) Ma re sohte perenki rong ni atail tepin kalohk ong irail, ele kitail sohte pahn uhdahn ngoangki pwurehng kalohk ong irail. Mwein kitail kin pehm me kitail sohte kak wia de nda mehkot me pahn wekidala arail madamadau de pepehm. Ahpw mwein mie soahng kan me wiawi me wekidala arail mour de mwomwen arail madamadau. De mwein ke kamwahwihala omw koahiek en kawehwe padahk mehlel, eri met omw sewese irail kak imwila mwahu.
20. Ia duwen atail kak kasalehiong wahu kisehtail kan ni atail kin koasoiong irail?
20 Kitail anahne wauneki pepehm en kisehtail kan. (Rom 2:4) Koasoiong irail ni kadek duwehte omw pahn koasoiong irail kan me ke tuhwong nan kalohk. Ken kin mpahi oh kasalehda wahu. Oh mwein kaidehn ahnsou koaros ke anahne koasoiaiong kisehmw kan duwen padahk mehlel. Sang ni omw wiewia kan, ke kak kasalehda ia uwen padahk mehlel eh kin sewese iuk. (Ep. 4:23, 24) Kasalehda ni sansal pwe ren kak kilang me ke ahneki mour me mwahusang mahs pwehki omw kin ale kasukuhl sang Siohwa. (Ais. 48:17) Sang omw mehn kahlemeng mwahu, kasalehiong kisehmw kan ia mwomwen Kristian men eh kin mour.
21, 22. Menlau kihda ehu karasepe me kasalehda uwen kesempwal atail en songosong sewese kisehtail kan ren esehla Siohwa.
21 Emen sister ntingihedi me ahnsou koaros e kin song en kalohk ong rie meh 13 sang ni eh koasoi oh mwomwen eh wiewia kan. Sounpar koaros e kin ntingwohng irail. Ahpw ih kelehpw Sounkadehde nan eh peneinei erein sounpar 30.
22 Ehu rahno sister menet doadoahngki delepwohn oh koasoiong emen rie serepein ko me kin kousoan dohsang ih. Rie serepeino ndahng me e peki rehn kaun en eh sarawio en onop Paipel reh, ahpw e sohte onop reh. Ni ahnsou me sistero padahkihong me e pahn perenki onop Paipel reh, e sapeng nda: “Ahn mwahu, ahpw met I pahn ndahwei: I sohte mwahn pahn wiahla Sounkadehdehn Siohwa men.” E kadaralahng rieo pwuhken Dahme Paipel Uhdahn Padahngki? oh kin delepwohnlahng ekei rahn nan ehuehu wihk, ahpw rieo saikinte pahkpeseng pwuhko. Sistero doula nda: “Kedekedeo I uhdahte ndahng en ale nah pwuhko, oh erein minit 15 nan delepwohno, se wadek oh koasoiapene ekei iren Paipel kan me ntingdi nan pwuhko. Mwurin at kin delepwohnpene pak kei, e men sen onop wereisang minit 15. Eri, e uhd tepida delepwohndo rehi pwe sen onop, ekei pak mwohn ei pirida ni menseng oh pil pak riau nan ehu rahn. Pahr mwurio, e papidaisla, oh sounpar ehu mwurin mwo, e tepida doadoahk en pioneer.”
23. Dahme kahrehda kitail anahne songosong sewese aramas akan ren pirida sang arail meir me pid wia kupwuren Koht?
23 Kitail anahne doadoahngki koahiek oh songosong sewese aramas akan ren pirida sang arail meir me pid wia kupwuren Koht. Miehte me tohto me kin mwekidki rongamwahwo. Tohtohsang aramas 20,000 kin papidaisla nan ehuehu sounpwong. Eri kitail anahne idawehn kaweid me wahnpoaron Pohl kihong Arkipus: “Ke uhdahn pahn kapwaiada pwaisomw doadoahk nan doadoahk en Kaun-o.” (Kol. 4:17) Iren onop en mwuhr pahn sewese kitail koaros en ese ia wehwehn kalohk ni karuwaru.
[Koakon nan pali 13]
IA DUWEN OMW KAK PEPEHD
▪ Kedirepwki wia kupwuren Koht
▪ Liksang wiewiahn rotorot akan
▪ Tamataman keperpen meirla me pid wia kupwuren Koht
▪ Ahneki madamadau pwung duwen aramas akan nan omw wasahn kalohk
▪ Song wiepe kapw kan en kalohk ong meteikan
▪ Tamataman kesempwalpen omw doadoahk en kalohk