Iahd me Mahwen en Armakedon Pahn Wiawi?

“I ahpw kilangada pokon ehu me inenen kalaimwuhnie​—me sohte aramas kak wadekedi uwen tohto! Re kohsang nan wehi koaros, ni kadaudok koaros, nan sahpw koaros, oh lokaia koaros; . . . Ih irail me keidier nan kamakam laudo.”​—KAUDIAHL 7:9, 14.

MET soahng koaros onopadahr pwe mahwen en Armakedon en wiawi. Ia mwomwe?

Miehier pwihn en aramas me kin papah Siohwa nan sampah pwon oh kin mourki koasoandi kan en Paipel me pid tiahk. Sang sapwellimen Koht sawas, aramas rar kei sang wehi koaros, keinek koaros, oh lokaia koaros wiahdahr pirien ehu me kin limpoakpene oh miniminpene. Pirien wet kin wiawi nanpwungen Sounkadehdehn Siohwa kan.​—Sohn 13:35.

Kereniong Sehdan pahn kapokonepene nah pwihn kan oh tepida wia uhwong me keieu laud ong aramas pwukat me meleilei oh mwomwen sohte pereparail. (Esekiel 38:8-12; Kaudiahl 16:13, 14, 16) Ia duwen omw kak kamehlele ire mehlel wet? Paipel kawehwehda ni oaritik dahme pahn wiawi me kin sawas pwe kitail en ese iahd mahwen en Armakedon pahn wiawi. Tohto soahng pwukat me Paipel kawehwehda kin pweipweidahier.

Soahng kan me Ke Kin Kilang Wiewiawi

Sapwellimen Sises tohnpadahk ko idek reh ia mwomwen aramas akan ar pahn ese iahd imwin koasoandi en sampah eh pahn tepida. (Madiu 24:3) Sises ketin sapeng sang ni eh padahkihong irail ahnsou ehu me “ehu sahpw pahn uhwong ehu sahpw, ehu wehi pahn mahweniong ehu wehi. Wasa koaros lehk lapalap oh rerrer en sahpw pahn wiawi.” E doula mahsanih: “Ahpw mepwukat koaros rasehng tepin medek en neitik.” (Madiu 24:7, 8) Wahnpoaron Pohl kawehwehda soangen ahnsowohte nin duwen “imwin rahn akan,” oh nda me rahn pwuko pahn wia “ahnsou apwal ekei.” (2 Timoty 3:1) Ia duwe, ke medewe me kokohp pwukat mwomwen pweipweidahier rahnpwukat?

Dahme kahrehda erein ahnsou pwukat eh nohn apwal? Wahnpoaron Sohn kihda kahrepeo. E kohpada me e pahn mie ‘ahnsou mwotomwot’ ehu me Sehdan oh nah ngehn saut akan pahn kak wiahte arail doadoahk nin sampah. E kawehwehda me Sehdan “inenen lingeringer kowahlap” erein ahnsowo. (Kaudiahl 12:7-12) Ia duwe, ke kin pehm me aramas kin kalapw lingeringer oh lemei rahn pwukat, kaidehn nan wasa ehute ahpw nan sampah pwon?

Sises pil ketin mahsanih me erein ahnsou apwalo, doadoahk ehu me inenen laud pahn pweida. E mahsanih: “Rongamwahu en Wehin Koht pahn lohkseli wasa koaros nin sampah, pwe kadehde en mie ong aramas koaros​—a mwuri, imwin sampah ahpw pahn kohdo.” (Madiu 24:14) Nan rahnpwukat, Sounkadehdehn Siohwa kan kin kalohki rongamwahu en Wehin Koht nan sahpw daulih 235 oh ni lokaia tohtohsang 500. Sawaspen Paipel riau me re kin wiahda, Kahn Iroir oh Awake! me kin keieu kohpeseng nan sampah pwon. Sounkadehde kan pil kawehwehdi Paipel mpen lokaia 100. Arail doadoahk kin wiawi sang ni sawas en aramas me pein toukihda arail ahnsou oh sawas en mwohni me aramas kin pein toukihda. Ia duwe, doadoahk en kalohk wet me inenen laud kak wia pweidahn sapwellimen Sises kokohp?

Paipel pil kawehwehda soahng kan me pahn wiawi me pahn kahrehda mahwen nanpwungen Siohwa Koht oh irail ko me kin pelianda ih. Tehk duwen kokohp siluh me ke pahn kilang me pahn pweida.

Soahng kan me Ke Pahn Kereniong Kilang Ar Pahn Pweida

Kokohp 1. Paipel mahsanih me wehi kan pahn pakairki pakair kesempwal wet, “mehkoaros meleilei oh mwahu.” Mwein re pahn medewe me re kereniong kamwahwihala kahpwal laud koaros. Ahpw, dahme pahn wiawi mwurinte mwo sohte pahn meleilei douluhl.​—1 Deselonika 5:1-3.

Kokohp 2. Mwuri, soangsoangen koperment kan pahn koasoanehdi ren uhwongada pelien lamalam koaros nan sampah. Nan Paipel, pelien koperment pwukat kin karasahiong mahn kamasepwehk men, oh pelien lamalam likamw akan lih emen me dake mahno. (Kaudiahl 17:3, 15-18) Mahn menet pahn sehse me e wia dahme Koht kupwurki sang ni eh pahn kauwehla pelien lamalam kan me dene re kin weliwelian Koht.

Wahnpoaron Sohn kawehwehda ni karasaras dahme pahn wiawi ni ahl wet: “Kode eisek me ke kilangehr oh mahn kamasepwehko pahn kailongkihla lih suwedo. Re pahn kihsang mehkoaros me e ahneki oh kakilisawihada. Mwuhr, re ahpw pahn kangala uduke oh kamwomwkihla kisiniei. Pwe Koht ketin audehkidahr kapehdirail kan dahme e ketin kupwukupwurehiong liho.”​—Kaudiahl 17:16, 17.

Kokohp 3. Mwurin arail kauwehlahr pelien lamalam likamw akan, Sehdan pahn kihpene wehi kan pwe ren pelianda irail akan me kin kaudokiong Siohwa Koht.​—Kaudiahl 7:14; Madiu 24:21.

Ia Duwen Omw Pahn Pidada?

Ma ke saikinte onopki mwahu Paipel, mwein ke pahn apwalki kamehlele me soahng pwukat pahn wiawi. Ahpw mie kahrepe mwahu ken likih me ire pwukat koaros pahn pweida oh re pahn wiawi ni ahnsou keren. Kokohp en Paipel tohto pweidahier me kamehlelehiong kitail me soahng pwukat pahn pweida.a

Ke sou wiahda ahnsou pwe ken diarada ia kahrepen Sounkadehdehn Siohwa kan arail kin kamehlele me “mahwen me pahn wiawi ni Rahn Lapalap en Koht, Wasa Lapalahpie” kereniong wiawi oh dahme kahrehda ke sohte anahne masak? Peki pwe kumwail en koasoiapene dahme Paipel mahsanih me ke anahne wia pwe ken iang irail akan me Siohwa Koht kin ketin pere. (Kaudiahl 16:14) Dahme ke sukuhlki pahn kakete wekidala omw madamadau ong ahnsou kohkohdo.

[Nting tikitik me mi pah]

[Kilel nan pali 8]

Doadoahk en Sounkadehdehn Siohwa kan kak wia pweidahn kokohp en Paipel?