Iaduwen Kitail Kak Kalohk ong Atail Peneinei?
1. Dahme kahrehda kitail anahne doadoahngki atail loalokong ni atail kin kalohk ong atail peneinei?
1 Kitail pahn ahneki peren laud mehlel ma kitail pahn pedolong nan koasoandi kapw iangahki atail peneinei, oh kitail koaros pahn miniminpene kaudokiong Siohwa! Ni atail pahn kalohk ong atail peneinei, irail kak sukuhliki iaduwen arail pahn papah Siohwa oh ahneki koapworopwor en mour soutuk nan koasoandi kapw. Ahpw, ma kitail pahn pweida ni atail kalohk ong atail peneinei, kitail anahne doadoahngki atail loalokong. Emen Sounapwalih en Circuit koasoia: “Irail me kin keieu pweida iei irail me kin ekei pak koasoia duwen oaralap kan me kin kamwekid arail peneinei kan en rong.” Iaduwen kitail kak wia met?
2. Iaduwen atail nsenohki dahme atail peneinei kin pwunodki, nsenohki oh apwaliki nan arail mour kin kak sewese kitail en kamwekid irail en rong?
2 Kamwekid Irail en Rong: Medemedewe mwowe dahme ke kak nda me pahn kamwekid ahmw peneinei en rong. (Lepin Padahk 15:28) Dahme irail kin pwunodki? Soangen kahpwal dah kan me irail kin lelohng? Mwein ke kak ehukihong irail artikel ehu de iren Paipel ehu me pid duwen oaralap ieu me ke ese re kin perenki. Ma ahmw peneinei kan sohte kin mihmi karanih iuk, mwein ke kak wia met ni ahmw pahn ntingihdi kisinlikou ong irail de ni ahmw pahn doadoahngki telephone oh call irail. Ken ekis ekis padokedi werentuhkehn padahk mehlel oh kalamwuri oh mweidong Siohwa en kakairada war pwukat.—1 Kor. 3:6.
3. Iaduwen kitail kak doadoahngki ahn atail peneinei nsenohki pein kitail de neitail seri kan kak sewese kitail en ese dahme kitail pahn koasoiong irail oh uhd kalohk ong irail?
3 Sises kaweid emen ohl me Sises ahpwtehn kihsang ngehn saut tohto reh oh mahsanih: “Kohkohla ni imwomwo, rehn omw peneinei kan, oh kairehkin irail duwen manaman lapalap me Siohwa ketin wiahiong uhk, oh duwen eh kupwurkalahngan ong uhk.” (Mark 5:19) Medewehla soangen pepehm kan ah peneinei ahneki ni ahnsou me ohlo wia met! Mehlel, mendahki soahng kan me wiawi nan ahmw mour sohte kapwuriamwei duwehte dahme wiawiong ohlo, ahpw e sansal me ahmw peneinei kin perenki rong dahme kin wiawi nan ahmw mour oh pil dahme kin wiawi nan mour en noumw seri kan. Ni ahmw pahn koasoiong irail duwen padahk ehu me ke wia nan Theocratic Ministry Sukuhl, de kapokon me ke iang towehda, de ahmw mwemweitla Bethel, de mehkot me wiawiong uhk nan ahmw mour kak ritingada ahl ehu me ke kak ehukihong irail duwen Siohwa oh sapwellime pwihn sansal.
4. Soahng dah kan kitail en dehr wia ni atail kin kalohk ong atail peneinei?
4 Doadoahngki Ahmw Loalokong: Ni ahmw pahn kalohk ong ahmw peneinei, ken dehr nda soahng tohto pak ehute. Emen brother tamanda ahnsou me e tepida onop Paipel oh koasoia: “I kin koasoiong ahi nohno soahng tohto erein awa kei—kerenieng soahng koaros me I sukuhliki sang Paipel I kin ndaiong ih, oh met kin imwikihla akamai kan, keieu rehn ahi pahpa.” Mehnda ma emen nan ahmw peneinei pahn kasalehda me e perenki rong duwen Paipel, sapeng ih ni ahl ehu me pahn kahrehiong ih en men kalaudehla ah wehwehki Paipel. (Lepin Padahk 25:7) Ahnsou koaros kasalehda wahu, kadek oh kanengamah, duwehte ke pahn wia ong irail me ke sehse nan kalohk.—Kol. 4:6.
5. Dahme kitail en wia ma atail peneinei sohte pahn mwekidki atail kalohk ong irail?
5 Mie pak ehu me ahn Sises peneinei lemeleme me a pweipweilahr. (Mark 3:21) Ahpw, mwuhr, ekei irail pwoson Sises. (Wiewia 1:14) Ma nin tepio ke song en ehukihong ahmw peneinei duwen padahk mehlel oh irail sohte kin rong, ken dehr mworusala. Arail irair kan oh madamadau kan kak wekila. Nantihong rapahki pil ehu ahl en ehukihong irail mehkot me pahn kamwekid irail en men rong. Ele mwein ke ahpw pahn ahneki peren en sewese irail kekeid nan ahl me pahn kahluwalahng mour soutuk.—Madiu 7:13, 14.