Ke Kak Sewese Kisehmw Kan?
1 Pali laud en kitail anehki peneinei me sohte iang padahk mehlel. Mehlel, kitail kin kasikasik me irail kak en iang kitail kekeid nan ahl me kohkohlahng mour! Atail nsenohki arail mour en ahnsou kohkohdo kin laud ong irail me mihmi nan pein imwatail. Mendahki kitail kin nannanti sangete sounpahr samwalahr ko en sewese irail en iangada padahk mehlel, kitail en dehr kesehla atail koapwoaroapwoarki irail.
2 Ahnsou me Sises wia kalkalohk, “rie ohl ako sohte pwoson Sises.” (Sohn 7:5) Pil mie ahnsou me kisehn Sises ndinda me e iahkalahr. (Mark 3:21) Ahpw, Sises sohte uhdi sang eh sewese irail oh koapwoaroapwoarki irail pahn iangada pwosonla ih. Mwuhr, rien Sises iangala padahk mehlel. (Wiewia 1:14) Rie ohl Seims wiahla emen sounsawaspen mwomwohdiso en Kristian. (Kal. 1:18, 19; 2:9) Ma ke men anehki peren en kilang kisehmw kan iangala padahk mehlel, eri ken nantiong sewese irail en rong oh mwekidki rongamwahu en Wehio.
3 Kihong Irail Uwen Me Pahn Kainsenamwahuih Irail, Ahpw Kaidehn Nohn Tohto: Ahnsou me Sises kin kalohk ong mehteikan, irail sounrongorong kan diarada kommoalpen ngehnarail pwehki irail sohte kin rong lokaia kamedek sang rehn Sises. (Madiu 11:28, 29) Sises sohte wia padahk ong mehkan me irail sohte kak koledi. Pwehn kainsenamwahuih kisehmw kan ki pihl en padahk mehlel, ke pahn kihong irail ekiste, kaidehn nohn tohto! Emen sounapwalih en mwemweit kasawiada oh nda: “Irail me kin kalohk ong kiserail kan ekis ekis kin imwikihla mwahu.” Ni ahl wet, pil irail me kin uhwong pahn kak tepida wia peidek kan oh mwuhr kakete men nim pihl ni pali ngehn—pihl en padahk mehlel.—1 Pit. 2:2; pil kilang 1 Kor. 3:1, 2.
4 Tohto irail Kristian kan me pwopwoud ahpw arail pwoud saikinte iang padahk mehlel kin “kalohk” ong arail pwoud kan nin duwen irail kin kihdi pwuhk kan de makasihn kan nan ihmwara oh pahkalahng wasa kan me arail pwoud pahn men wadek. Emen sister me wia met pil kin onop rehn neira seri kan ahnsou me e ese me eh pwoud kin kak rong arail onop oh kin kawehwe soahng kan me eh pwoud kin medemedewe. Ekei pak sistero kin idek rehn eh pwoudo: “I sukuhliki mehkot nan ahi onop rahnwet. (E uhd pahn kawehwe ong eh pwoud dahme e sukuhliki.) Dahme ke lemeleme duwen ire wet?” Mwuhr, eh pwoudo iangala padahk mehlel.
5 Kasalehda Wahu oh Kanengamah: Emen sounkalohk koasoia me “kisehmw kan pahn anehki pein arail madamadau kan.” Ihme kahrehda kitail anahne kasalehda wahu ong irail ahnsou me irail kin kasalehda arail madamadau kan oh pil ahnsou me irail ndaiong kitail en dehr koasoiong irail duwen padahk mehlel. (Ekl. 3:7; 1 Pit. 3:15) Ni atail kin kasalehda kanengamah oh limpoak oh wia sounrongorong mwahu kan, kitail kak rapahki ahnsou mwahu kan en kalohk ong irail. Kapai kan pahn kak kohwong kitail ma kitail kin kasalehda kanengamah, oh met pweida ong emen ohl pwopwoud Kristian me kanengamahiong ah pwoud mendahki eh pwoud lih kin uhwong ih sounpahr 20. Ni ahnsou me e tepida wukila, e koasoia: “I kalangankihong Siohwa pwe e sewese ie en anehki wahn ngehn kanengamah, pwe met I kak nda me e imwikihla mwahu: Ahi pwoud lih tepida kekeid nan ahl me pahn kohkohlahng mour!”
6 Ke kak sewese kisehmw kan? Mwein pwehki ahmw tiahk mwahu en Kristian oh ahmw kapakap kan ong irail, “ke kak sewese irail en papah Siohwa.”—1 Pit. 3:1, 2, footnote.