Nsenamwahu Kak Mie nan Peneinei Ehu me Kaidehn Koaros Kin Papah Siohwa
“Ia duwen omw kak ese . . . ma ke kak komourala omw pwoudo de soh?”—1 KOR. 7:16.
KE KAK DIARADA PASAPENG KAN?
Dahme Kristian akan kak wia pwehn ahneki popohl nan peneinei me kaidehn koaros kin papah Siohwa?
Ia duwen Kristian men eh kak sewese eh peneinei en iangala padahk mehlel?
Dahme kitail kak wia pwehn sewese irail me mi nan peneinei me kaidehn koaros kin papah Siohwa?
1. Ni emen eh alehda padahk mehlel, dahme kak wiawi nan eh peneinei?
EHU pak ni Sises eh poaronepeseng sapwellime wahnpoaron ko, e mahsanih: “Kumwail kohwei oh kapahrengkihong irail me Wehin Koht kerendohr!” (Mad. 10:1, 7) Rongamwahu wet pahn kihong popohl oh nsenamwahu irail akan me kin alehda oh kalahnganki rohng wet. Ahpw Sises ketin katamankihong sapwellime wahnpoaron ko me me tohto pahn uhwong arail doadoahk en kalohk. (Mad. 10:16-23) Ahpw mehlel, uhwong sang peneinei kak uhdahn apwal.—Wadek Madiu 10:34-36.
2. Dahme kahrehda kitail kak nsenamwahu mehnda ma atail peneinei sohte mi nan padahk mehlel?
2 Ia duwe, met wehwehki me kitail sohte kak nsenamwahu ma atail peneinei sohte iang padahk mehlel? Soh! Mendahki ekei Kristian kin lelohng uhwong laud sang peneinei, kaidehn koaros kin lelohng met. Oh ele uhwong en peneinei sohte pahn wiewiawi ahnsou reirei. Sohte lipilipil soangen irair dah kitail mi loale, kitail kak nsenamwahu ma kitail mwekid ni ahl pwung ni tohn atail peneinei ar kin uhwong kitail de sohte men esehla padahk mehlel. Oh pil Siohwa kin ketin sewese irail akan me kin loalopwoatohng pwe ren peren mehnda ar mi nan irair apwal kan. Kristian akan kak nsenamwahu ma re kin (1) nantihong ahneki popohl nan imwarail oh (2) uhdahn song en sewese arail peneinei en iangala padahk mehlel.
NANTIHONG AHNEKI POPOHL NAN PENEINEI
3. Dahme kahrehda Kristian men anahne nantihong ahneki popohl nan eh peneinei?
3 Tohn peneinei kakete iangala padahk mehlel ma mie popohl nan imwarail. (Wadek Seims 3:18.) Mehnda ma tohnpeneinei saikinte kin papah Siohwa, Kristian men anahne nantihong ahneki popohl nan eh peneinei. Ia duwen eh kak wia met?
4. Ia duwen atail kak kolokol popohl nan loalatail?
4 Kitail anahne kolokol atail popohl oh meleilei nan loalatail. Pwehn wia met, kitail anahne kapakapki “sapwellimen Koht popohl, me inenen laudsang uwen atail dehdehki.” (Pil. 4:6, 7) Nsenamwahu oh popohl kin kohsang atail sukuhlki duwen Siohwa oh mourki mour me pahrekiong kaweid kan en Paipel. (Ais. 54:13) Kitail pil anahne iang towehda mihting kan en mwomwohdiso oh ngoangki doadoahk en kalohk ma kitail men ahneki popohl oh nsenamwahu. Irail akan me kin mi nan peneinei ehu me kaidehn koaros kin papah Siohwa kak kalapw diarada ahl akan ren wia soahng kesempwal pwukat. Karasepe, emen sister me adaneki Enza pwoudiki ohl emen me kin uhwong ni elen lemei.a E kin kohla kalohk mwurin e kanekehla eh doadoahk en imweo. Enza koasoia, “Siohwa kin ketin kapaiehda laud pwe ni ehuehu ahnsou me I kin nantihong ehukihong meteikan rongamwahwo, e kin imwila mwahu.” Kapai pwukat kin kihong ih popohl, nsenamwahu oh peren.
5. Dahme pahn kak apwal ong irail me arail peneinei sohte iang padahk mehlel? Ia wasa irail kak diarada ie sawas?
5 Kitail anahne nantihong ahneki popohl rehn tohn atail peneinei me sohte iang padahk mehlel. Mwein met kak apwal pwehki ekei pak re ele men kitail en wia soahng kan me uhwong kaweid kan en Paipel. Ekei nan atail peneinei me sohte iang padahk mehlel ele kin lingeringerda ni atail kin loalopwoat idawehn Paipel. Kitail en dehr mweidohng met en kauhkitaildihsang wia dahme pwung. Ma kitail nantihong, ele ehu rahn kitail pahn ahneki popohl nan atail peneinei. Ahpw kitail kin wia uwen atail kak en ehuong tohn atail peneinei me pid mehkot me sohte uhwong kaweid kan en Paipel. Ni ahl wet, kitail kin soikala kahpwal kan me sohte anahne wiawi. (Wadek Lepin Padahk 16:7.) Ni ahnsou me kahpwal ehu kin pwarada, e kesempwal kitail en rapahki kaweid en Paipel sang sawasepen Paipel kan me pwihn en ladu lelepek oh loalokong wiahda oh pil kaweid sang elder kan.—Lep. Pad. 11:14.
6, 7. (a) Dahme kahrehda ekei kin uhwong tohnpeneinei kan me tepida onop rehn Sounkadehdehn Siohwa kan? (b) Ia duwen tohnsukuhl en Paipel men de Sounkadehde men eh pahn mwekidki uhwong sang eh peneinei?
6 Kitail kak ahneki popohl nan atail peneinei ma kitail likih Siohwa oh song en wehwehki pepehm en tohn atail peneinei. (Lep. Pad. 16:20) Tohnsukuhl en Paipel kapw kan pil kak song wia met. Ekei ohl de lih pwopwoud kan me saikinte iang padahk mehlel ele sohte pahn uhwong arail pwoud kan ma re kin onop Paipel. Re kakete nda me met kak mwahu ong arail peneinei. Ahpw ekei ele pahn uhwong laud. Esther, me met wia Sounkadehdehn Siohwa men, nda me e uhdahn lingeringerda ni eh pwoudo eh tepida onop rehn Sounkadehdehn Siohwa kan. E nda, “Ma I sohte kin koskihla nah pwuhk ko a I kin isikala.” Howard kin uhwong eh pwoudo ni eh tepida onop Paipel. E nda me ohl pwopwoud tohto kin masak me arail pwoud ko iangalahr pwihn en pelien lamalam ehu me kin pitih irail. E pil nda me pwehki ohl pwopwoud men ele medewe me eh pwoudo mi nan keper, e kakete koasoi oh mwekid ni lemei.
7 Kitail anahne sewese tohnsukuhl en Paipel men me eh pwoudo kin uhwong pwe en wehwehki me e sohte anahne uhdi onop Paipel. E pahn kak kalapw kamwahwihala eh irairo sang ni eh pahn kin kadek oh kasalehda me e wauneki eh pwoudo. (1 Pit. 3:15, 16) Howard nda, “I uhdahn kalahnganki me ei pwoudo kin meleilei oh sohte mwehlda!” Eh pwoudo nda me Howard kin ndahng me en uhdi onop Paipel pwehki eh medewe me Sounkadehde ko kin pitipitih. E kawehwehda: “I sohte akamai ahpw I ndahng me e kakete pwung, ahpw I pil ndahng me I sohte kak diarada ia mwomwen arail kin pitih ie. Eri I ndahng en wadek pwuhk me I kin onohnopki. E wadek pwuhko oh sohte kak sapwungki dahme pwuhko koasoia. Met uhdahn kamwakid ih laud.” E kesempwal en tamataman me aramas akan kakete sangat de medewe me arail pwopwoud mi nan keper ni arail pwoud ko kin kohla iang towehda mihting kan de iang kalohk. Ahpw tohnsukuhl en Paipelo de Sounkadehdeo kak doadoahngki lokaia kadek oh limpoak ong eh pwoudo. Met pahn sewese eh pwoudo en dehr pwunod.
SEWESE IRAIL REN IANGALA PADAHK MEHLEL
8. Kaweid dahieu wahnpoaron Pohl kihong irail me arail pwoud kaidehn Kristian men?
8 Wahnpoaron Pohl kaweidki Kristian akan me re sohte kak kohkohsang arail pwoud ihte pwehki ih kaidehn Kristian men.b (Wadek 1 Korint 7:12-16.) E pahn sewese Kristian men en nsenamwahu ma e tamataman me ehu rahn, eh pwoudo kakete iangala padahk mehlel. Ahpw e pahn mwahu ma e kanahieng mwomwen eh song en sewese eh pwoudo wehwehki padahk mehlel. Kitail pahn tehkpene dahme wiawihong ekei.
9. Dahme Kristian men anahne kanahieng wia ni eh tepin ehukihong eh peneinei padahk mehlel?
9 Jason uhdahn perenda ni eh tepin sukuhlki padahk mehlel. E nda, “I men padahkihong aramas koaros!” Ni tohnsukuhl en Paipel men eh esehda me dahme e sukuhlki nan Paipel iei me mehlel, mwein e pahn uhdahn peren kahrehda e kin koasoakoasoia ahnsou koaros. Mwein e kin kasik me eh peneinei pahn mwadang alehda padahk mehlel, ahpw mwein re sohte pahn pwungki dahme e medewe. Ia duwen ahn Jason pwoudo eh mwekidki eh perendao? E nda me e pehm me Jason sohte kin uhdi koasoakoasoia duwen padahk mehlel. Emen lih iangala padahk mehlel sounpar 18 mwurin eh pwoudo eh iangala. Liho nda me e anahne ekisekis sukuhlki padahk mehlel. Mwein ke kin wia onop Paipel rehn emen me eh pwoudo sohte men iangala padahk mehlel. E pahn mwahu en kasalehiong tohnsukuhlo ia duwen eh pahn kawehwehda padahk mehlel ni ahl ehu me sohte pahn kansensuwedihada eh pwoudo. Soukohp Moses nda: “Ei padahk pahn pwiliwei rasehng dingiding en keteu oh mwerediong pohn sampah rasehng pwoaiken lahng. Ei pato kan pahn mweredi rasehng keteu pohn poadakapw en wahnsahpw.” (Deud. 32:2) Atail kin koasoia ekis duwen padahk mehlel ni ahl pwung oh ni ahnsou konehng pahn kalapw pweida mwahu sang nda soahng tohto.
10-12. (a) Kaweid dahieu wahnpoaron Piter kihong irail me arail pwoud kaidehn Kristian? (b) Ia duwen emen tohnsukuhl en Paipel eh esehla idawehn kaweid me ntingdi nan 1 Piter 3:1, 2?
10 Koht ketin kamwakid wahnpoaron Piter en kihda kaweid mwahu ong lih pwopwoud Kristian akan me arail pwoud kaidehn Kristian. E nda: “Kumwail lih pwopwoud kan, kumwail peikiong amwail pwoud kan, pwe ma ekei irail sohte pwoson mahsen en Koht, re en alehkihla pwoson amwail mouren wiewia mwahu. Kumwail sohte anahne kapahrekiong irail, pwe re pahn pein kilang amwail mour mwakelekel oh duwen amwail wauneki Koht.” (1 Pit. 3:1, 2) Sang ni lih pwopwoud men eh kin aktikitik oh kasalehda me e wauneki eh pwoud mehnda ma e kin lemeiong, liho ele kakete sewese ohlo en iangala padahk mehlel. Oh en ohl pwopwoud Kristian men eh mwekid anahne duwehte dahme Koht kupwurki oh e anahne wia tapwin peneinei limpoak men mehnda ma eh pwoudo kin uhwong.—1 Pit. 3:7-9.
11 Kristian tohto rahnwet paiekidahr ar kapwaiada ahn Piter kaweid. Selma wia ehu karasepe. Ni ahnsou me e tepida onop Paipel rehn Sounkadehdehn Siohwa kan, eh pwoudo Steve sapwungki. E nda me e lingeringerda, luwakada oh masepwehkada. Selma nda me pil mwohn e esehla padahk mehlel, e kin apwal en mi rehn eh pwoudo. E anahne inenen kanahieng duwen soahng koaros me e kin nda oh wia. E pil nda me ahnsou koaros Steve kin kehlingeringer, ahpw kahpwal wet suwedla ni eh tepida onop Paipel. Dahme sewese kamwahwihala kahpwalo?
12 Selma kin tamataman mehn kasukuhl ehu e sukuhlki sang Sounkadehdeo me onop reh. E nda: “Ehu pak, I sohte men onop Paipel rahno. Nipwong mwohn rahno, Steve uhdahn lingeringerda ni at akamaida, oh I nsensuwedla oh poakehla pein ngehi. Mwurin ei padahkihong sistero dahme wiawi oh ei pepehm, e ndahng ie en wadek 1 Korint 13:4-7. Ni ei wadek, I tepida medewe, ‘Steve sohte kin kasalehiong ie soangen wiewiahn limpoak pwukat.’ Ahpw sistero kahrehiong ie en wekidala ei madamadau ni eh idek, ‘Nanpwungen soangen wiewiahn limpoak pwukat, meh depe ke kin kasalehiong omw pwoud?’ Ei pasapengo iei, ‘Sohte, pwehki e kin inenen apwal en mi reh.’ Sistero ni kadek nda, ‘Selma, ihs me songosong wia Kristian men? Kowe de Steve?’” Selma diarada me e anahne wekidala eh madamadau. E nda: “I kapakap ong Siohwa pwehn ketin sewese ie kalaudehla ei poakohng Steve. Ekisekis, at irairo tepida wekiwekila.” Mwurin sounpar 17, Steve iangala padahk mehlel.
IA DUWEN METEIKAN AR KAK SAWAS?
13, 14. Dahme kitail kak wia pwehn sewese irail me mi nan peneinei me kaidehn koaros kin papah Siohwa?
13 Duwehte dingiding en keteu kin kalamwur pwehl oh sewese wahnsahpw kan en kekeirda, emenemen kitail nan mwomwohdiso kak sewese irail me kin mi nan peneinei me kaidehn koaros kin papah Siohwa pwe ren nsenamwahu. Elvina nan Brazil nda, “Limpoak en riei Kristian akan me sewese ie en tengediong padahk mehlel.”
14 Kadek oh nsenoh sang Kristian akan nan mwomwohdiso kak wekidala mohngiong en me sohte iang padahk mehlel. Emen brother nan Nigeria me iangala padahk mehlel sounpar 13 mwurin eh pwoudo eh iangala nda: “Ni ei iang emen Sounkadehde seiseiloak, were sidohsao ohla. E rapahkihda ienge Sounkadehde ko nan kahnimw kan me karanih wasao, oh re mweidohng kiht sen pweidi rehrail pwohngo. Re apwalih kiht likamwete se ese irail sangete ni at tikitik. I mwadangete pehm limpoak en Kristian me ei pwoudo kin kalapw koasoia.” Nan England, sister men me iangala padahk mehlel sounpar 18 mwurin eh pwoudo eh iangala tamanda: “Sounkadehde ko kin luke kiht koaros en iang irail mwenge. Ahnsou koaros I pehm me re perenkin ie.c Ohlen England men me pil kedekedeo wiahla Sounkadehde men nda: “Brother oh sister kan kin mwemweitdo de lukeikihtlahng imwarail, oh I diarada me re uhdahn nsenohkin ie. Met uhdahn sansalda ni ei kapidelong ni imwen wini oh tohto pwarek ie.” Ke kak kasalehda soangen nsenohute ong tohnpeneinei kan me saikinte iangala padahk mehlel?
15, 16. Dahme kak sewese irail kan me arail peneinei sohte iang padahk mehlel en kolokol arail nsenamwahu?
15 Ni mehlel, mehnda ma kitail wia dahme pwung oh ni kadek ehukihong meteikan padahk mehlel erein sounpar tohto, kaidehn koaros nan atail peneinei pahn iangala padahk mehlel. Ekei sohte pahn perenki oh pahn doulahte uhwong laud. (Mad. 10:35-37) Ahpw ni atail kin kasalehda irair en Kristian akan, met kak uhdahn imwila mwahu. Emen ohl me wiahla Sounkadehde men mwurin eh pwoudo nda me mwein ke pahn sehse ia duwen irair kaselel en Kristian ko ar pahn kamwakid madamadau oh mohngiong en omw pwoud me saikinte iangala padahk mehlel. E pil nda, “Dehr uhdihsang sewese omw pwoud me saikinte iangala padahk mehlel.”
16 Irail me arail peneinei sohte iangala padahk mehlel kak pil nsenamwahu. Emen sister kin nantihong ehukihong eh pwoud padahk mehlel erein sounpar 21, ahpw e sohte iangala. E koasoia me e kak kolokol eh peren sang ni eh kin song en kaperenda Siohwa, loalopwoatohng, oh nantihong ahneki nanpwungmwahu reh. E pil nda me e kin kedirepwki wia pein eh onop en Paipel, towehda mihting kan, kalohk oh sewese meteikan nan mwomwohdiso. Met kin sewese en karanihala Siohwa oh kolokol eh lelepek ong ih.—Lep. Pad. 4:23.
KE DEHR UHDI!
17, 18. Ia duwen Kristian emen eh kak kolokol eh koapworopwor nan peneinei ehu me kaidehn koaros kin papah Siohwa?
17 Ma kowe emen Kristian lelepek nan peneinei me kaidehn koaros kin papah Siohwa, ke dehr uhdihsang omw nannanti. Tamataman me Siohwa sohte pahn ketin likidmeliehla sapwellime aramas akan. (1 Sam. 12:22) E pahn ketin ieiang uhk erein omw kin ieiang ih. (Wadek 2 Kronikel 15:2.) Eri perenkihla omw kin suksukuhlki duwen Siohwa, oh “likih.” (Mel. 37:4, 5) “Poadidiong kapakap ahnsou koaros” oh ahneki pwoson me Samatail nanleng me limpoak kak ketin sewese iuk ken dadaur soangen kahpwal koaros.—Rom 12:12.
18 Kapakap ong Siohwa oh peki reh sapwellime manaman pwehn sewese iuk ken ahneki popohl nan omw peneinei. (Ipru 12:14) Ma ke kin wia met, ele ke pahn kak kamwakid laud tohn omw peneinei me saikinte iangala padahk mehlel. Ke pahn nsenamwahu oh ahneki popohl nan loalomw ni omw kin wia mehkoaros “ong ni kalinganpen Koht.” (1 Kor. 10:31) Ke pil kak kamehlele me riomw Kristian akan pahn kasalehiong uhk limpoak oh seweseiuk.
[Nting tikitik kan me mi pah]
a Ahd kan wekidekla.
b Ahn Pohl kaweid sohte keinepwihsang Kristian akan en tohrohrasang arail pwoud ma re lelohng apwal laud kan. Met pilipil kesempwal ehu. Menlau kilang pwuhken “Dadaurete ni Limpoak en Koht,” pali 251-253.
c Paipel sohte keinepwih atail iang irail me sohte iang padahk mehlel mwenge.—1 Kor. 10:27.
[Kilel nan pali 30]
Pilada ahnsou me konehng en kawehwe dahme ke kamehlele
[Kilel nan pali 31]
Kasalehda omw kin nsenohki omw pwoud me saikinte iangala padahk mehlel