Kolokol Madamadau oh Pepehm Pwung en Mwomwohdiso

“Kalahngan en atail Kaun Sises Krais en ketin ieiang kumwail koaros [“amwail madamadau,” NW].”​—PIL. 4:23.

IA DUWEN ATAIL KAK KAMWAKID METEIKAN NAN MWOMWOHDISO EN AHNEKI MADAMADAU OH PEPEHM PWUNG . . .

ni atail kin werekiong riatail Kristian kan?

sang ni atail kin ngoangki kalohk?

sang ni atail kin padahkihong elder kan duwen dihp laud ehu me kitail esehda?

1. Dahme kahrehda Pohl oh Sises kapinga mwomwohdiso kan en Pilipai oh Daiadaira?

KRISTIAN kan nan Pilipai ni mwehin wahnpoaron ko semwehmwe. Ahpw re sapan oh kin kasalehda limpoak laud ong riarail Kristian akan. (Pil. 1:3-5, 9; 4:15, 16) Ihme kahrehda Pohl ntinglahng rehrail oh nda: “Kalahngan en atail Kaun Sises Krais en ketin ieiang kumwail koaros [“amwail madamadau,” NW].” (Pil. 4:23) Pwehki Kristian akan nan Daiadaira ahneki soangen madamadauohte de pepehmohte, Sises Krais mahseniong irail: “I ese omw wiewia kan. I ese omw limpoak, omw loalopwoat, omw kohwa doadoahk, oh omw kanengamah. I ese omw doadoahk en ahnsou wet me laudsang mehlel omw doadoahk en mahso.”​—Kaud. 2:19.

2. Ia duwen atail pepehm oh madamadau ara kin kamwakid mwomwohdiso?

² Ehuehu mwomwohdiso en Sounkadehdehn Siohwa kan rahnwet kin kasalehda soangen madamadau de pepehm tehieu. Ekei mwomwohdiso kin sansalkihda arail kin kadek limpoak. A ekei kin kasalehda arail ngoangki laud utungada doadoahk en kalohk de pioneer. Ni ahnsou me kitail koaros kin nantihong ahneki madamadau oh pepehm pwung, kitail kin sewese mwomwohdiso en miniminpene oh pil kolokol madamadau oh pepehm pwung. (1 Kor. 1:10) Ahpw ma ekei ahneki madamadau de pepehm suwed, ele met kak kamwakid tohnmwomwohdiso en katikala arail kin papah Koht, sohla ngoangki kalohk oh pil sohla katapanki ma mie me wiahda dihp. (1 Kor. 5:1; Kaud. 3:15, 16) Soangen madamadau oh pepehm dah me omw mwomwohdiso kin kasalehda? Ia duwen omw kak sewese mwomwohdiso en kasalehda madamadau oh pepehm pwung?

KANGOANGE MWOMWOHDISO EN KASALEHDA MADAMADAU OH PEPEHM PWUNG

3, 4. Ia duwen atail kak kapinga Siohwa nan mwomwohdiso?

³ Depit koulkihong Siohwa: “I ahpw pahn kapingkalahngan ong komwi mwohn pokon en sapwellimomwi aramas akan; I pahn kapinga komwi mwohrail koaros.” (Mel. 35:18) Sounmelkahka menet kin kapinga Siohwa ni eh kin mi rehn sapwellimen Koht ladu teikan. Atail mihting kan en mwomwohdiso ehuehu wihk, duwehte Onop en Kahn Iroir kin kihda ahnsou mwahu en kasalehda atail ngoang oh pwoson sang atail kin pasapeng. Kitail koaros anahne pein idek rehtail: I kin pasapeng nan mihting kan ni uwen ei kak? I kin kaunopada mwahu pwe I en kak kihda pasapeng mwahu kan? Nin duwen tapwin peneinei, I kin sewese nei seri kan mwohn mihting ren kaunopada arail pasapeng kan oh padahkihong ren pasapeng ni pein arail lokaia?

⁴ Mwomwen atail kin koul nan mihting kan kak kasalehda me kitail kin koasoanehdi teng en wia dahme pwung. Depit koasoia: “Maing Koht, ni ei koapworopwor unsek, I pahn koul oh kapinga komwi!” (Mel. 57:7) Koul kan me kitail kin koulki nan atail mihting kan kin kihong kitail ahnsou mwahu en “koul oh kapinga” Siohwa sang ni mohngiong kehlail. Ma kitail sohte nohn ese ekei koul ko, ele kitail kak koulki koul pwukat nan atail kaudok en peneinei. Kitail men duwehte sounmelkahkao me nda: “I pahn kokouliong KAUN-O erein ei mour; I pahn kin koul kapikapinga ei Koht erein ei mour.”​—Mel. 104:33.

5, 6. Ia duwen atail kak kadek oh sapan ong meteikan? Ia duwen met eh kak sewese mwomwohdiso?

⁵ Ni atail kin kasamwo riatail Kristian akan, kitail pil kin kangoange mwomwohdiso en kasalehda limpoak. Ni kaimwiseklahn irelaud nan nah kisinlikowo ong mehn Ipru kan, Pohl ntingihdi: “Kumwail kin kataman epwelpen mehn keiru kan nan imwamwail kan.” (Ipru 13:1, 2) Ehu ahl kaselel en wia met iei en luke sounapwalih me kin seiloak oh eh pwoud, de irail kan me kin doadoahngki pali laud en ar ahnsou ong doadoahk ong Koht nan mwomwohdiso ren iang kitail mwenge. Mwein ekei pak, kitail men luke liohdi kan, de peneinei kan me sohte arail pahpa de sohte nohno, de meteikan ren iang kitail mwenge de iang atail kaudok en peneinei.

⁶ Pohl padahkihong Timoty en kangoange meteikan ren wia mepwukat: “Re en kin wia me mwahu, re en kepwehpwehki doadoahk mwahu, re en sapan oh perenki sewese meteikan. Ih duwen met ar pahn kaunopada ehu pai kesempwal ong pein irail, me pahn wia ehu poahsoan kehlail ong ni ahnsou kohkohdo. Eri, irail ahpw pahn kak lelohng ni mouro me uhdahn mour mehlel.” (1 Tim. 6:17-19) Pohl kin kangoange rie Kristian akan en kakairada irair en sapan. Mehnda ma mie kahpwal en mwohni, kitail kak kadek. Karasepe, ma mie weromw sidohsa, ele ke kak wahda ekei kohla wasahn kalohk de ni mihting kan. Oh ia duwen irail me ale soangen sawas wet arail kak kasalehda me re kalahnganki oh kangoange mwomwohdiso en kasalehda madamadau oh pepehm pwung? Irail kak kihda uwen arail kak en sewese pwain pweinen kahs me kin pweilaudla oh pweinen apwalih sidohsa. Pil ehu ahl en kahrehiong riatail en pehm me kitail anahne oh poakohng irail iei en kalaudehla atail ahnsou en mi rehrail. Ni atail kin wia me mwahu ong “irail kan me kisehn atail pwoson” oh perenki doadoahngki atail ahnsou oh kepwe kan en sewese irail, atail limpoak ong irail kin kekeirda, oh kitail kin kamwakid meteikan nan mwomwohdiso ren ahneki pepehm oh madamadau pwung.​—Kal. 6:10.

7. Ia duwen atail sohte kin ndaseli duwen meteikan eh kin sewese mwomwohdiso en ahneki madamadau oh pepehm pwung?

⁷ Atail kin kompoakepahnki emen oh sohte kin ndaseli dahme e sohte men meteikan en ese pil kin kakehlaka limpoak nanpwungen riatail kan. (Wadek Lepin Padahk 18:24.) Ma kompoakpatail men ndaiong kitail mehkot duwen ih, kitail kin kasalehda me kitail wia kompoakepah mehlel men ma kitail sohte kin ndaiong meteikan. Ni ahnsou me emen riatail kin ndaiong kitail eh madamadau oh pepehm rir kan oh e kak likih me kitail sohte pahn ndaiong meteikan, limpoak me mi nanpwungatail kin kehlailla. Eri, kitail en wia kompoakepah men me sohte kin ndaseli mehkot duwen emen oh sewese mwomwohdiso en wia peneinei limpoak ehu.​—Lep. Pad. 20:19.

NGOANGKI DOADOAHK EN KALOHK

8. Dahme Sises mahsanihong mehn Laodisia kan? Dahme kahrehda?

⁸ Sises mahsanihong mwomwohdisohn Laodisia: “I ese omw wiewia kan; I ese me ke sohte karakar de ke pil sohte lemwulemwur. Eri, I ahpw men ke en lemwulemwur de karakar! A pwehki omw lou, sohte karakar de lemwulemwur rehmw, iei me I nektehn mwuskinuhkeweisang nan eweiet!” (Kaud. 3:15, 16) Mehn Laodisia ko sohte ngoangki doadoahk en kalohk. Irair wet ele kin kamwakid arail pepehm duwen emenemen nan mwomwohdisowo. Eri Sises mahsanihong irail ni limpoak: “I kin lipwoare oh keme irail koaros me I kin poakepoake. Eri, ngoangda oh sohpeisang dipomw kan.”​—Kaud. 3:19.

9. Ia duwen atail ngoangki doadoahk en kalohk eh kin kamwakid mwomwohdiso?

⁹ Ma kitail men mwomwohdiso en kasalehda madamadau oh pepehm pwung, kitail anahne ngoangki doadoahk en kalohk. Ehu kahrepen mwomwohdiso iei en diarada aramas mehlel kan nan wasahn kalohk oh padahkihong irail padahk mehlel. Eri kitail en kahlemengih Sises oh ngoangki wia doadoahk en katohnpadahk. (Mad. 28:19, 20; Luk 4:43) Atail kin kalaudehla atail ngoangki kalohk pahn kalaudehla atail miniminpene nin duwen “tohndoadoahk kei me kin iang Koht.” (1 Kor. 3:9) Ni atail kin iang meteikan nan doadoahk en kalohk oh kilang arail utung dahme re kamehlele oh kasalehda arail limpoak ong Siohwa oh padahk mehlel, atail limpoak oh wauneki irail pahn laudla. Oh atail kin doadoahkpene nan kalohk kin imwikihla miniminpene nan mwomwohdiso.​—Wadek Pilipai 1:27.

10. Ia duwen atail kin kamwahwihala atail doadoahk en kalohk eh kin kamwakid tohnmwomwohdiso teikan?

¹⁰ Atail kin nantihong kamwahwihala atail doadoahk en kalohk pil kin kamwakid mwahu meteikan. Ma kitail kalaudehla atail nsenohki aramas akan me kitail tuhwong nan kalohk oh nantihong sairada arail mohngiong kan, atail ngoangki kalohk pahn laudla. (Mad. 9:36, 37) Ma kitail kin ngoangki kalohk, irail me kin iang kitail pil pahn ngoangkihla kalohk. Sises kin poaronehla sapwellime tohnpadahk ko ren kalohk, kaidehn ren wad emen ahpw ren wad riemen. (Luk 10:1) Met kaidehn pwehn ihte kangoange oh kaiahne irail ahpw pil kahrehiong irail en kalaudehla arail ngoangki kalohk. Kitail uhdahn kin perenki iang sounkalohk ngoang kan! Arail ngoang kin kangoange kitail oh sewese kitail en doulahte nan atail doadoahk en kalohk.​—Rom 1:12.

DEHR KAULIM DE EKIHLA DIHP LAUD

11. Soangen madamadau oh pepehm dah me mehn Israel ko ahneki ni mwehin Moseso? Dahme met kahrehiong irail en wia?

¹¹ Wihk kei mwurin Siohwa eh ketin wiahiong mehn Israel kan ren wiahla wehi ehu, irail tepida lipahned oh kaulim. Met kahrehiong irail en uhwongada Siohwa oh Moses oh Aaron me kin weliwelian ih. (Eks. 16:1, 2) Nanpwungen mehn Israel kan me kohkohsang Isip, me malaulaute me mweimweiong pedolong nan Sapwen Inowo. Pil Moses sohte mweimweiong en pedolong nan sahpwo pwehki mwomwen eh mwekidki madamadau oh pepehm suwed en mehn Israel ko. (Deud. 32:48-52) Dahme kitail kak wia rahnwet pwehn liksang met?

12. Dahme kak sewese kitail en dehr kin kaulim?

¹² Kitail anahne kanahieng pwe kitail en dehr kin kaulim. Aktikitik oh wauneki irail me ahneki manaman pahn sewese kitail en liksang met. Pil ehu me kak sewese kitail iei en pilada mwahu ihs me kitail en werekiong. E pahn imwila suwed ma kitail pilada mehn kamweit suwed kan de nohn doadoahngki ahnsou laud en mi rehn aramas akan me sohte kin peikiong Siohwa ni atail wasahn doadoahk de imwen sukuhl. E pahn konehng en dehr kalapw werekiong irail kan me kin kaulim de song en liaktohrohr.​—Lep. Pad. 13:20.

13. Soangen kahpwal dah kan kaulim kak kahrehda nan mwomwohdiso?

¹³ Ma tohnmwomwohdiso kin kalapw kaulim, met kak kahrehda kahpwal teikan me pahn kauwehla arail nanpwungmwahu rehn Siohwa. Karasepe, kaulim kak kauwehla popohl oh minimin nan mwomwohdiso. Laudsang met, kaulimki iengetail Kristian kan kak kaidehn ihte kamedekih irail, ahpw kak kahrehda dihp en karaun likamw oh kauwe aramas. (Lip. 19:16; 1 Kor. 5:11) Ekei me kin kaulim nan mwomwohdiso en tepin Kristian kan kin “mwamwahliki manaman en koht; re kin lahlahwe [“me lingan kan,” NW].” (Sud 8, 16) Soangen kaulim me kin wiawi ong ohl akan me ahneki pwukoa nan mwomwohdiso sohte kin ale sapwellimen Koht kupwuramwahu.

14, 15. (a) Dahme kak wiawihong mwomwohdiso ma e kin mweimwei dihp laud en kin wiewiawi? (b) Dahme kitail anahne wia ma kitail ese me emen wiahda dihp ahpw e ekihla?

¹⁴ Ia duwen ma ke esehda me emen ekihla dihp laud me duwehte nim sakau daulihala, de kilang kilel suwed de kin wia tiahk samin? Dahme ke pahn wia? (Ep. 5:11, 12) Ma kitail pohnsehsehla dihp laud, Siohwa kak ketikihsang sapwellime manaman nan mwomwohdiso. Met kak kahrehda eh sohla popohl nan mwomwohdiso. (Kal. 5:19-23) Pohl padahkihong Kristian ko nan Korint me re anahne koahkoahsang rehrail “kisin ihs kitei en dihp.” Pil ni ahlohte rahnwet, kitail en dehr mweidohng suwed en mi nan mwomwohdiso pwe kitail en kak pere madamadau oh pepehm pwung me mi loale. Dahme kitail kak wia pwehn kolokol popohl nan mwomwohdiso?

¹⁵ Nin duwen atail koasoiapenehr, e kesempwal en dehr ndaseli ekei ire kan, ahpw mehlel ni ahnsou me meteikan padahkihong kitail arail pepehm oh madamadau rir kan. E sapwung oh sohte kadek en ndaiong meteikan ire pwukat! Ahpw ma emen wiahda dihp laud ehu, elder kan nan mwomwohdiso anahne ese duwen met. Nin duwen Paipel kasalehda, irail me ahneki pwukoa en apwalihala ireo. (Wadek Lipai 5:1.) Eri ma kitail ese me emen riatail Kristian wiahda dihp laud, kitail anahne padahkihong en tuhwong elder kan oh peki sawas. (Seims 5:13-15) Ahpw ma e sohte mwadang tuhwong elder kan, eri kitail me anahne wia met.

16. Ia duwen atail kin pere mwomwohdiso sang ni atail kin padahkihong elder kan ma kitail esehda dihp laud ehu wiawi?

¹⁶ Mwomwohdisohn Kristian anahne wia wasa ehu me koaros sohte anahne perki mehkot, oh kitail anahne sawas pwehn perehla ni atail kin padahkihong elder kan ni emen eh kin wiahda dihp laud. Ma elder kan sewese aramaso me wiahda dihp en wehwehki uwen laud en dihpo, koluhla oh ale peneu, madamadau oh pepehm en mwomwohdiso sohla pahn mi nan keper. Ahpw ia duwen ma me wiahda dihpo sohte koluhla oh sohte men ale sawas me elder kan kihda ni limpoak? Eri e pahn piskenla. Ni ahl wet, irair suwedo kin kohsang oh elder kan kak pere madamadau oh pepehm en mwomwohdiso. (Wadek 1 Kor. 5:5, NW.a) Eri kitail koaros pwukoahki en padahkihong elder kan ma kitail ese duwen dihp laud ehu oh idawehn arail koasoandi. Kitail en wia dahme keieu mwahu ong riatail kan oh pere mwomwohdiso.

KANGOANGE MWOMWOHDISO EN KOLOKOL “EHUPENE EN MADAMADAU”

17, 18. Dahme pahn sewese kitail en kolokol miniminpene nan mwomwohdiso?

¹⁷ Sang ni arail kin “poadidiong ale padahk sang rehn wahnpoaron ko,” sapwellimen Sises tohnpadahk ko kin sewese mwomwohdiso en miniminpene. (Wiewia 2:42) Re kin kesempwalki kaweid me ohl mah kan kin kihong irail me poahsoankihda iren Paipel kan. Pil ni ahlohte rahnwet, mwomwohdiso ahneki sawas oh kangoang me anahn pwe ren miniminpene pwehki elder kan kin idawehn kaweid me kohsang pwihn en ladu lelepek oh loalokong. (1 Kor. 1:10) Ni atail kin peikiong kaweid sang nan Paipel me sapwellimen Siohwa pwihn kin kihong kitail oh idawehn kaweid en elder kan, kitail kin kasalehda me kitail kin ‘nantihong dadaurete en kapwaiada ehupene en madamadau nan popohl me kin kaminiminkitailpene.’​—Ep. 4:3, NW.

¹⁸ Kitail en wia soahng koaros me kitail kak pwehn sewese mwomwohdiso en ahneki oh kolokol madamadau oh pepehm pwung. Ma kitail kin wia met, kitail kak kamehlele me “kalahngan en atail Kaun Sises Krais” pahn ieiang atail madamadau oh pepehm me kitail kin kasalehda.​—Pil. 4:23.

[Nting tikitik me mi pah]

[Kilel nan pali 24]

Ke kin kangoange mwomwohdiso en kasalehda madamadau oh pepehm pwung sang ni omw kin kaunopada pasapeng mwahu kan?

[Kilel nan pali 25]

Kangoange mwomwohdiso en kasalehda madamadau oh pepehm pwung sang atail esehla atail koul kan