Kalohk ong Ohl akan

1. Anahn laud dahieu mie ong doadoahk en kalohki Wehio?

¹ Pwehki doadoahk en kalohki Wehio kin lalaudla nan rahnpwukat, anahn laud mie ong ohl akan me kin koahiek en apwalih mwomwohdiso. (Mark 4:30-32; Wiewia 20:28; 1 Tim. 3:1-13) Ahpw nan ekei wasa, ohl malaulaute kin mwekidki rongamwahu en Wehio. Nan ekei tiahk nan sahpw kan, ohl akan kin mweidala lih akan en pwukoahki padahkihong neirail seri kan mehkan me pid kaudok. Ia duwen atail kak kangoange ohl tohto pwehn nsenohki arail anahn en ahneki nanpwungmwahu rehn Koht oh iang kitail kaudok mehlel?

2. Ia duwen en Pohl oh Piter ara kalohk kin imwila mwahu?

² Kalohk ong Ohl akan: Ma tapwin peneinei men kin iangala padahk mehlel, e kin kalapw kamwakid meteikan nan eh peneinei en pil iangala padahk mehlel. Karasepe, ni ahnsou me Pohl oh Sailas sensel nan imweteng, ira kalohk ong tohnimwetengo, kahrehda ohlo oh eh peneinei pwon papidaisla. (Wiewia 16:25-34) En Pohl kalohk nan Korint me kahrehda “Krispus, soumas en sinakokeo, ahpw pwosonla Kaun-o, iangahki eh peneinei koaros.” (Wiewia 18:8) Siohwa ketin doadoahngki Piter en kalohk ong Kornilius, kaunen sounpei men me wia “ohl mwahu men, me kin pwongih Koht.” Kornilius oh eh peneinei iangahki kompoakepah kan papidaisla.—Wiewia 10:1-48.

3. Duwehte Pilip, aramas “lapalap” dah kei me ke kak kalohk ong?

³ En kalohk ong ohl “lapalap akan” pahn kak kamwakid aramas tohto. (1 Tim. 2:1, 2) Karasepe, sapwellimen Siohwa tohnleng men padahkihong Pilip en kalohk ong “ohl lapalap kesempwal emen” me kin apwahpwalih wasahn nekinek en lih nanmwarkien Idiopia. Pilip rong en ohlo “wadewadek pwuhken soukohp Aiseia” oh kawehwehiong ih rongamwahu duwen Sises. Ohlen Idiopia menet wiahla tohnpadahk men oh ele kalohki rongamwahu ni eh mwesel pwurala nan sapweo. Mwein e pil kalohk ong lih nanmwarkio oh meteikan me kin iang liho kousoan nan tehnpeseo. Irail pwukat sohte pahn kak rong rongamwahu ma ohlen Idiopia menet sohte kalohk ong irail.—Wiewia 8:26-39.

4. Ia duwen atail kak kalohki rongamwahu ong ohl tohto?

⁴ Duwen Atail Kin Kak Kalohk ong Ohl Tohto: Pwehki ohl akan kin kalapw doadoahk, ke pahn kak koasoanehdi omw ahnsou pwe ken kak kalohk ni soutik kan, ni imwin wihk kan de rahn en kommoal teikan? En kaukaule kalohk nan wasahn doadoahk kan pil pahn kihong uhk ahnsou mwahu en kalohk ong ohl akan me sohte kin kalapw mi ni imwarail kan. Brother kan pil kak nantihong kalohk ong iangarail tohndoadoahk ohl akan. Ma kalohk en ihmw lel ihmw kin wiawi nan wasa kan me kalohk kin kalapw wiawi, brother kan ele kak idek ma re kak koasoiong ohl kan ni ihmw ko.

5. Dahme sister men anahne wia ma e pahn tuhwong emen ohl me perenki rong rongamwahu en Wehio?

⁵ Ma emen sister tuhwong emen ohl me perenki rong padahk mehlel, en dehr kelehpw pwurala reh. Eh pwoud de emen sounkalohk kak iang ih. Ma ohl menet tepida kekeirda, e pahn keieu mwahu en kihong emen brother en kohla reh.

6. Ia duwen atail kak alasang Pohl pwehn “kahluwahiong uwen tohtohn aramas me kak rehn Krais”?

⁶ Pilada Ire kan me Ohl kan Kin Perenki Rong: Wahnpoaron Pohl kin medemedewe duwen irail kan me e kin kalohk ong oh wekidala mwomwen eh padahk kan pwehn kak “kahluwahiong uwen tohtohn aramas me kak rehn Krais.” (1 Kor. 9:19-23) Duwehte Pohl, kitail pil anahne medewe duwen ire kan me pahn kamwakid ohl akan me kitail pahn tuhwong oh kaunopada mwahu. Karasepe, ohl akan kin kalapw nsenohki kahpwal en mwohni, kaunda mwahu, oh onepek mwahu en arail peneinei. Irail ele pahn nsenohki en ese kahrepen mour, dahme pahn wiawihong sampah, oh dahme kahrehda Koht kin ketin mweidohng kahpwal kan en wiawi. Re pahn perenki rong atail padahk kan duwen Wehio ma kitail pahn doadoahngki ire pwukat.—Lep. Pad. 16:23.

7. Ia duwen tohnmwomwohdiso koaros ar kak kamwakid ohl pwopwoud kan me iang towehda mihting kan?

⁷ Sewese Ohl Pwopwoud kan me Saikinte Iang Padahk Mehlel: Patehng en lih Kristian akan arail wiewia mwahu kan me kin kamwakid arail pwoud me saikinte iang padahk mehlel, tohnmwomwohdiso pil kak iang sawas. (1 Pit. 3:1-4) Ni ahnsou me ohl pwopwoud men iang eh pwoud towehda mihting kan, atail kin kasamwo ih pahn kak kamwakid ih. Eh iang towehda mihting kin kasalehda me mwein e men ese padahk mehlel oh pahn perenki tepida onop Paipel.

8. Ia duwen brother kan ar kak song en sewese ohl pwopwoud kan me kin saikinte kasalehda arail men esehla padahk mehlel?

⁸ Ekei ohl pwopwoud kan sohte kin kasalehda arail men onop Paipel nin tapio, ahpw mwein mwuhr re pahn men koasoia duwen Paipel rehn emen brother me re perenki. Brother kan nan ehu mwomwohdiso kin nantihong en mwemweitla rehn ehu peneinei me ohl pwopwoudo saikinte iang padahk mehlel pwehn koasoiaiong ohlo duwen soahng kan me e kin perenki. Met kamwakid ohlo en tepida koasoia duwen Paipel, oh met e papidaislahr. Pil emen brother kin sewese ohl pwopwoud men me kin perenki Sounkadehdehn Siohwa kan pwehn wiahda kelen imweo. Eh kin nsenohki ohlo kahrehda e tepida onop Paipel rehn ohlo. (Kal. 6:10; Pil. 2:4) Ma kowe emen brother, ke sou pahn song en sewese emen ohl pwopwoud de tohtohsang me saikinte iang padahk mehlel?

9. Kapai dah kan kin kohsang kaiahnehda ohl akan?

⁹ Kaiahnehda Ohl akan: Ohl akan me kin mwekidki rongamwahu en Wehio oh nantihong ale pwukoa kan nan doadoahk en Siohwa ele kak wiahla “sapwellime kisakis kan” nin duwen elder kan. Irail kin doadoahngki arail koahiek oh kehl pwehn apwalih mwomwohdiso kan me wiawihkihda sapwellime aramas akan. (Ep. 4:8; Mel. 68:18) Soangen ohl pwukat kin perenki apwahpwalih mwomwohdiso. (1 Pit. 5:2, 3) Irail kin wia kapai laud ong pirien en Kristian koaros nan sampah pwon!

10. Ia duwen en Ananaias sewese Pohl eh kin wia kamwahu ong me tohto?

¹⁰ Karasepe, Sohl wiahla “wahnpoaron en mehn liki kan” mendahki e kin kaloke Kristian akan mahs. (Rom 11:13) Pwehki met, tohnpadahk Ananaias kin pweiek en kalohk ong Sohl nin tapio. Ahpw, Ananaias peikiong sapwellimen Kaun-o kehkehlik oh kohla tuhwong ohl menet me wiahla wahnpoaron Pohl. Erein sounpar kei, en Pohl kin kalohk kin sewese aramas kid kei me rong eh padahk. Leledo met, aramas rar kei kin paiekihda nah kisinlikou kan me kileldi nan Paipel.—Wiewia 9:3-19; 2 Tim. 3:16, 17.

11. Dahme kahrehda kitail anahne koasoanehdi koasoandi kan pwehn kak kalohk ong ohl akan?

¹¹ Eri, kitail en koasoanehdi koasoandi kan me anahn pwehn kak kalohk ong ohl akan. Ni atail kin wia met, kitail kak kamehlele me Siohwa pahn ketin kapaiada atail kin nantihong kapwaiada kupwure oh utung doadoahk en Wehio.