Ke Kak Nantihong oh Sewese en Emen Pwoud me Sohte Iang Padahk Mehlel?
1. Dahme kahrehda kaidehnte irail Kristian akan me ar pwoud sohte iang padahk mehlel me kin men sewese ar pwoud en iangala kaudok mehlel?
1 Mie ekei sounkalohk kan me arail pwoud sohte kin iang padahk mehlel? Ma ei, e sansal me sounkalohk pwukat kin men arail pwoud en iang irail nan kaudok mehlel. Ahpw kaidehn irail kelehpw me men arail pwoud kan en iang padahk mehlel. Duwehte Koht, tohnmwomwohdiso pwon men “aramas koaros en ale komourparail oh marainkihla me mehlel.” (1 Tim. 2:4) Ahpw ia duwen atail kak sewese en sounkalohk pwukat arail pwoud kan?
2. Ia duwen kupwurokong eh pahn sewese kitail ni atail kin sewese ohl de lih pwopwoud me sohte iang padahk mehlel?
2 Keieu, kitail anahne wehwehki madamadau en arail pwoud kan. Tohto ohl de lih pwopwoud pwukat ele kin poakohng arail peneinei oh kin song en wia ohl de lih pwopwoud mwahu. Re pil kin song en wia pahpa de nohno mwahu. Mwein re kamehlele padahk kan en arail pelien lamalam me weksang atail. Irail mwein sohte nohn ese duwen Sounkadehdehn Siohwa kan ahpw ihte re kin rong koasoi likamw kan me iengerail kan ndaiong irail. Ekei, sohte kin pwungki uwen ahnsou me arail pwoud Kristian kin doadoahngki ong arail kaudok pwe ih met me e kin kihong eh peneinei mahs. Kupwurokong pahn sewese atail wiewia en mwahu ong irail pwukat me sohte iang padahk mehlel oh wauneki irail oh dehr nohk saloh ni atail kin mi rehrail.—Lep. Pad. 16:20-23.
3. Ia ahl me ele pahn keieu mwahu en sewese ohl de lih pwopwoud me sohte iang padahk mehlel?
3 Nsenohkin Irail: Ahl me ele pahn keieu mwahu en sewese ohl de lih pwopwoud me sohte iang padahk mehlel, iei atail wiewia mwahu a kaidehn en mwadangete koasoia duwen Paipel ong irail. (1 Pit. 3:1, 2) Me pid duwen ire wet, nsenohkin irail ni mehlel uhdahn kesempwal. Sister kan kak sewese lih pwopwoud me sohte iang padahk mehlel a brother kan kak wia met ong ohl pwopwoud me sohte iang padahk mehlel. Ia duwen?
4. Ia duwen atail kak kasalehda atail nsenoh?
4 Ma ke saikinte tuhwong ohl de lih pwopwoud me sohte iang padahk mehlel, mwein ke kak koasoiong mahs arail pwoud Kristian kan. Ke dehr nsensuwedkihla ma me sohte iang padahk mehlelo sohte mwekidki omw kasalehda omw nsenoh. Atail kadek oh nsenoh kakete kamwakid ih en wekidala eh madamadau ong Sounkadehdehn Siohwa kan. (Rom 12:20) Ekei Kristian koahiek kan kin luke emen me sohte iang padahk mehlel oh eh peneinei en iang irail mwengehn soutik pwe irail en kak esehla oh sewese ih en kihsang sohte lipilipil madamadau sapwung me e kakete ahneki. Re kin koasoia duwen dahme e kin perenki a kaidehn iding ih en koasoia duwen mehkan me pid Paipel. Mwuhr, ni ahnsou me emeno kin kakehr koasoakoasoi ong irail, mwein koasoiepen mehkan me pid Paipel kakehr wiawi. De mwein e kakete pwungki luhk en iang towehda mihting kan pwehn kilang dahme eh pwoud kin suksukuhliki, oh met pwehki miehier me e ese nan mwomwohdiso. Mehnda ma e saikinte onopada pwehn sukuhlki padahk mehlel, e konehng en kapinga ih pwehki eh utung eh pwoud me iang padahk mehlel.
5. Ia duwen elder kan ar kak nantihong sewese me sohte iang padahk mehlelo?
5 Keieu laud, elder kan me anahne nantihong sewese irail ohl de lih pwopwoud pwukat me sohte iang padahk mehlel oh rapahki ahnsou mwahu pwehn ehukihong irail padahk mehlel. Meno me sohte iang padahk mehlel oh sohte kin men rong duwen Paipel mahs kakete rong iren kangoang kan ahnsou me e kapidelong nan imwen wini de lelohng soumwahu laud kan. Ma peneinei ehu me kaidehn towe kan koaros kin iang padahk mehlel lelohng kahpwal me duwehte mehlahn emen tohn peneinei, elder kan kak luke me sohte iang padahk mehlelo en iang irail ni arail pahn sewese peneineio.
6. Ia kahrepen atail pahn nantihong sewese ohl de lih pwopwoud me sohte iang padahk mehlel?
6 Medewehla peren me emen Kristian nan atail mwomwohdiso pahn ahneki ni eh pwoud pahn mwekidki oh iangala padahk mehlel! Met pahn pil kaperenda laud Siohwa, tohnleng kan oh tohnmwomwohdiso pwon. (Luk 15:7, 10) Ahpw, ma me sohte iang padahk mehlelo sohte mwadang mwekid, kitail kak kolokolete atail peren pwehki atail nannanti kin kaperenda Siohwa, me “sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.”—2 Pit. 3:9.
[Blurb nan Pali 6]
Ahl me ele pahn keieu mwahu en sewese ohl de lih pwopwoud me sohte iang padahk mehlel, iei atail wiewia mwahu a kaidehn en mwadangete koasoia duwen Paipel ong irail