En Iang Doadoahko Me Sohte Pahn Pwurehng Wiawi
1 Erein poadoapoad en aramas, Siohwa anahne kadeikada sapwellime imwintihti kan. Siohwa kin sapwellimaniki mahk, ihme E wiahda ahl ong me pwung kan pwehn ale kamourparail. (Melkahka 103:13) Ma irail mwekidki dahme irail sukuhliki me pwung, irail pahn mourla.
2 Karasepe ieu, mwohn Nohliko, nan 2370 B.C.E., Noha me adaneki “sounpadahk en pwungen Koht.” Irail me mehla nan Nohliko me irail me sohte mwekidki dahme Noha kaweidki irail en wia. (2 Piter 2:5; Ipru 11:7) Mwohn ohlahn Serusalem nan 70 C.E., Sises kasalehda ni sansal dahme aramas pahn wia ma irail men pitsang ohlahn kahnimwo. Irail me sohte rong Sises oh mwekidki mehla. (Luk 21:20-24) Kadeik kan duwehte mehpwukat wiawi pak tohto erein poadoapoad en aramas.
3 Doadoahk en Peneu Nan Atail Ahnsou: Sangete mahs, Siohwa kin padahkiong aramas me sapwellime engieng pahn lel oh e pahn kasohrala koasoandi suwed en ahnsouwet oh ihte irail me opampap akan pahn pitsang. (Sepanaia 2:2, 3; 3:8) Ahnsou en kalohki rohng wet kerenieng pahn uhdi! “Kahn kamakam kowahlap” kerenieng lel, oh me opampap akan kohkohpene ni ahnsouwet. Mehlel, kitail anahne “kilengwong mwetuwel kan, wahrail kan mahier oh mwahuongehr en dondol” ni ahnsouwet. Sohte pil ehu doadoahk me kesempwal oh karuwaru duwehte doadoahk wet.—Madiu 24:14, 21, 22; Sohn 4:35.
4 Kitail pahn anahne iang doadoahk en peneu me wiawi ni ahnsouwet “mehnda ma irail pahn rong uhk de soh.” Doadoahk wet kohsang rehn Koht, ihme kahrehda kitail sohte kak pohnsehsehla doadoahk wet. (Esekiel 2:4, 5; 3:17, 18) Ma kitail wia uwen me kitail kak en iang doadoahk wet, met pahn kasalehda atail limpoak laud ong Koht, atail nsenohki mehn mpatail kan, oh atail pwoson kehlail atail Sounkomour, Sises Krais.
5 Ansoun Mwekid Ahnsouwet: Mwurin kadeik sang Siohwa wiawi mahs, suwed kin pil ehu pwarada pwehki Sehdan oh ienge ko momourte. Ahpw, kadeik me pahn wiawi ni ahnsou kohkohdo pahn weksang kadeik kan me wiawi mahs. Siohwa pahn kihsang soahng koaros me mwekidki manaman en Sehdan, e pahn kasohrala soahng suwed koaros, oh doadoahk en pakairki kadeik me pahn kohdo sohlahr pahn anahn. (Kaudiahl 20:1-3) Kitail anehki pwais kaselel en iang doadoahk wet me sohte pahn pwurehng wiawi. Met iei ahnsou en iang wia doadoahk kesempwal wet.
6 Ni ahnsou me Pohl koasoi duwen doadoahk en kalohk me e kin wia ni ngoang, e mahsanih: “Ma mehmen kumwail pahn salongala, I sohte pahn pwukoahki.” (Wiewia 20:26) E sohte pahn pwukoahki arail mehla pwehki e pakairkihong irail duwen kadeik me pahn kohdo. Pwekida? Pohl kak ndahki pein eh doadoahk en kalohk: “I kin wia doadoahk laud oh apwal pwe I en kapwaiada ei kohwa wet, I kin doadoahngki sapwellimen Krais roson lapalap me kin doadoahk loalei.” (Kolose 1:29) Kitail pahn nsenamwahuki atail wia uwen me kitail kak en iang doadoahko me sohte pahn pwurehng wiawi!—2 Tim. 2:15.